ال 16 جىل بويى بيلىكتە بولعان پرەمەر-مينيستر ۆيكتور وربان جەڭىلىسىن مويىنداپ, قارسىلاسىن جەڭىسىمەن قۇتتىقتادى. ول «فيدەس» پارتياسىمەن بىرگە ەندى وپپوزيتسيادا وتىرىپ, ەلگە قىزمەت ەتۋدى جالعاستىراتىنىن مالىمدەدى. وربان سايلاۋ ناتيجەلەرىن «اۋىر» دەپ باعالاعانىمەن, ولاردىڭ ايقىن ەكەنىن اتاپ ءوتتى.
الدىن الا قورىتىندىلارعا سايكەس, بيۋللەتەندەردىڭ شامامەن 99%-ى سانالعاننان كەيىن «تيسا» پارتياسى 199 مانداتتىڭ 138-ءىن يەلەنىپ وتىر. بۇل كورسەتكىش پارتياعا پارلامەنتتە ۇشتەن ەكى, ياعني كونستيتۋتسيالىق باسىمدىق الۋعا مۇمكىندىك بەرەدى. ال «فيدەس» پارتياسى 54-ورىنعا يە بولسا, «Mi Hazánk» ء(بىزدىڭ وتان) پارتياسىنا 6 ماندات بۇيىرعان. ۆەنگريا زاڭناماسىنا سايكەس, پارتيالار پارلامەنتكە ءوتۋ ءۇشىن 5% مەجەدەن اسۋى ءتيىس.
سايلاۋدىڭ رەسمي ناتيجەلەرى 18 ساۋىرگە دەيىن تولىق جاريالانۋى كەرەك. دەگەنمەن, سوڭعى ەسەپتى كۇتپەي-اق وربان قارسىلاسىن جەڭىسىمەن قۇتتىقتاپ ۇلگەردى.
جەڭىس ميتينگىندە بۋداپەشتتىڭ ورتالىعىندا ءسوز سويلەگەن ماديار: ء«بىزدىڭ قولىمىزدان كەلدى!» دەپ مالىمدەدى. ونىڭ ايتۋىنشا, بۇل – تەك پارتيانىڭ عانا ەمەس, بۇكىل ۆەنگريا حالقىنىڭ ورتاق جەڭىسى. ء«بىز بىرگە ۆەنگريانى ازات ەتتىك, وربان رەجيمىن قۇلاتتىق», دەدى ول جاقتاستارىنىڭ الدىندا.
ۆەنگرياداعى Radio Free Europe قىزمەتى قارجىلاندىرۋ قىسقارۋىنا بايلانىستى جۇمىسىن توقتاتتى
سايلاۋ ەل تاريحىنداعى ەڭ جوعارى بەلسەندىلىكپەن ءوتتى. داۋىس بەرۋ اياقتالۋىنا ەكى ساعات قالعاندا قاتىسۋ دەڭگەيى 74,23%-عا جەتىپ, كەيىن رەكوردتىق كورسەتكىشكە ۇلاسقانى ايتىلدى. ساراپشىلار مۇنى قوعامداعى وزگەرىسكە دەگەن سۇرانىستىڭ ارتقانىمەن بايلانىستىرادى.
سەمسەرلەسۋدەن قازاقستان قۇراماسى كوماندالىق سىندا ۆەنگريادان جەڭىلدى
ماديار الداعى ۋاقىتتا جەمقورلىقپەن كۇرەستى كۇشەيتىپ, جۇيەلى رەفورمالار جۇرگىزۋگە, جاڭا كونستيتۋتسيا ازىرلەۋگە نيەتتى. سونىمەن قاتار, ول ۆەنگريانىڭ سىرتقى ساياساتىنا وزگەرىستەر ەنگىزىپ, ەۋرووداق پەن ناتو اياسىنداعى سەرىكتەستىكتى كۇشەيتۋدى كوزدەيتىنىن جەتكىزدى.
