بانك وكىلدەرىنىڭ ايتۋىنشا, «ۇماي» باعدارلاماسى ايەلدەردىڭ ەكونوميكالىق بەلسەندىلىگىن ارتتىرۋعا جانە ولاردىڭ باسپانا الۋ مۇمكىندىگىن كەڭەيتۋگە باعىتتالعان. باعدارلاما بويىنشا باستاپقى جارنا تومەندەتىلگەن شارتتارمەن بەرىلەدى, تۇرعىن ءۇيدى ەلىمىزدىڭ كەز كەلگەن وڭىرىنەن ساتىپ الۋعا بولادى. بۇعان دەيىن بۇل جوبا اياسىندا 3 660 ايەل باسپانالى بولعان.
باعدارلاما قاتىسۋشىلارى باستاپقى جانە قايتالاما نارىقتاعى, سونداي-اق قۇرىلىس كەزەڭىندەگى پاتەرلەردى (كەپىلدىك نەمەسە ساقتاندىرۋ تەتىكتەرى ارقىلى) ساتىپ الا الادى. سونىمەن قاتار تۇرعىن ءۇيدى جوندەۋگە دە قوسىمشا نەسيە راسىمدەۋ مۇمكىندىگى بار.
وتباسى بانك كەيبىر وتانداستارىمىزدى تۇرعىن ءۇي كەزەگىنە قويۋدان نەگە باس تارتتى؟
استانا مەن الماتى قالالارىندا بانك تۇرعىن ءۇي قۇنىنىڭ 80%-ىنا دەيىن, ال وزگە وڭىرلەردە 85%-ىنا دەيىن قارجىلاندىرادى. قالعان بولىگى باستاپقى جارنا رەتىندە تولەنەدى. نەسيەنىڭ ەڭ جوعارى سوماسى – 50 ملن تەڭگە, مەرزىمى – 25 جىلعا دەيىن. قاتىسۋ ءۇشىن وتباسىنىڭ ايلىق تابىسى 1,25 ملن تەڭگەدەن اسپاۋى ءتيىس.
«ۇماي» باعدارلاماسى بويىنشا الىنعان تۇرعىن ءۇي ايەلدىڭ اتىنا راسىمدەلەدى, نەكەدە بولعان جاعدايدا ورتاق مەنشىك رەتىندە تىركەلەدى. بىرنەشە قارىز الۋشىنى تارتۋعا دا رۇقسات ەتىلەدى.
ال «جاسىل يپوتەكا» باعدارلاماسى ەنەرگيا ۇنەمدەيتىن تۇرعىن ۇيلەردى ساتىپ الۋعا باعىتتالعان. سەبەبى ەلدەگى تۇرعىن ۇيلەردىڭ باسىم بولىگى جوعارى ەنەرگيا تۇتىناتىن ساناتقا جاتادى. بۇل باعدارلاما كوممۋنالدىق شىعىنداردى ازايتۋعا جانە ەكولوگيالىق ستاندارتتارعا ساي قۇرىلىس نارىعىن دامىتۋعا ىقپال ەتەدى.
«جاسىل يپوتەكا» ارقىلى OMIR سەرتيفيكاتى (كۇمىس, التىن نەمەسە پلاتينا دەڭگەيى) بار تۇرعىن ۇيلەردى ساتىپ الۋعا بولادى. شارتتارى «ۇماي» باعدارلاماسىنا ۇقساس: 80%-عا دەيىن قارجىلاندىرۋ, 50 ملن تەڭگەگە دەيىن نەسيە, 25 جىلعا دەيىنگى مەرزىم جانە قوسىمشا جوندەۋ نەسيەسى قاراستىرىلعان.
ەكى باعدارلاما بويىنشا دا سوڭعى 6 ايداعى رەسمي تابىس راستالۋى قاجەت. تۇرعىن ءۇيدى ەلدىڭ كەز كەلگەن وڭىرىنەن, تىركەۋگە قاراماستان ساتىپ الۋعا بولادى.
باعدارلامالاردىڭ ناقتى ىسكە قوسىلۋ ۋاقىتى قوسىمشا حابارلانادى.
