مەملەكەت باسشىسىنىڭ تاپسىرماسىنا سايكەس, «قازاۆتوجول» ۇلتتىق كومپانياسى ءوڭىردىڭ كولىك ينفراقۇرىلىمىن دامىتۋعا جانە قازاقستاننىڭ حالىقارالىق ترانزيتتىك الەۋەتىن ارتتىرۋعا باعىتتالعان ءىرى جوبانى ىسكە اسىرىپ جاتىر.
2026 جىلعى 5 ساۋىردە رەسپۋبليكالىق ماڭىزى بار «سارىاعاش اينالما جولىنىڭ» قۇرىلىسى رەسمي تۇردە باستالدى. ءىس-شاراعا «قازاۆتوجول» ۇك» اق باسقارما توراعاسى دارحان يماناشەۆ, تۇركىستان وبلىسىنىڭ اكىمى نۇرالحان كوشەروۆ جانە سالالىق مەكەمەلەردىڭ وكىلدەرى قاتىستى.
دارحان يماناشەۆتىڭ ايتۋىنشا, جوبا ءوڭىر ءۇشىن ستراتەگيالىق ماڭىزعا يە. ونىڭ ىسكە اسۋى ترانزيتتىك كولىكتى قالا اۋماعىنان شىعارىپ, جولدارداعى جۇكتەمەنى ازايتادى ءارى كورشىلەس ەلدەرمەن قاتىناستى جاقسارتادى. بۇل باعىتتاعى جولداردىڭ وتكىزۋ قابىلەتى مەن قاۋىپسىزدىگىن ارتتىرۋعا مۇمكىندىك بەرەدى.
جوبا اياسىندا ۇزىندىعى 102,6 شاقىرىم بولاتىن I-ا ساناتتاعى ءتورت جولاقتى زاماناۋي اۆتوجول سالۋ جوسپارلانعان. جول حالىقارالىق ستاندارتتارعا سايكەس جوبالانىپ, ۇزدىكسىز ءارى قاۋىپسىز قوزعالىستى قامتاماسىز ەتەدى.
اينالما جولدىڭ سالىنۋى ءوڭىر ەكونوميكاسىنا دا وڭ اسەرىن تيگىزەدى: جۇك جانە جولاۋشىلار تاسىمالى جەڭىلدەيدى, شەكارا ماڭىنداعى ساۋدا داميدى, ال تۇركىستان وبلىسىنىڭ حالىقارالىق كولىك دالىزدەرىندەگى ماڭىزى ارتا تۇسەدى.
سونىمەن قاتار, وبلىستا جول ينفراقۇرىلىمىن جاڭعىرتۋ جۇمىستارى جالعاسىپ جاتىر. قازىرگى تاڭدا رەسپۋبليكالىق ماڭىزى بار جولداردىڭ جالپى ۇزىندىعى 678 شاقىرىمدى قۇرايدى. وسى باعىتتا 99,2 شاقىرىم جولعا كۇردەلى جانە ورتاشا جوندەۋ جۇرگىزىلۋدە, ونىڭ ىشىندە كوپىرلەر مەن جول توراپتارىن جاڭارتۋ دا بار.
2026 جىلى «شىمكەنت – قىزىلوردا» باعىتىندا دا جۇمىستار جوسپارلانعان. بۇل جولدا جالپى ۇزىندىعى 103 شاقىرىم بولاتىن ورتاشا جوندەۋ جوبالارى جۇزەگە اسىپ, قوزعالىستى اۆتوماتتاندىرىلعان باقىلاۋ جۇيەلەرى ورناتىلادى. بۇل شارالار جول ساپاسىن ارتتىرىپ, كولىك قوزعالىسىن تيىمدىرەك ەتەدى.
جالپى العاندا, اتالعان جوبالار وڭىردە زاماناۋي ءارى قاۋىپسىز جول جۇيەسىن قالىپتاستىرۋعا, كولىك قىزمەتىنىڭ ساپاسىن كوتەرۋگە جانە قازاقستاننىڭ ترانزيتتىك مۇمكىندىكتەرىن نىعايتۋعا باعىتتالعان.
