فوتو: اشىق دەرەككوز
Reuters اگەنتتىگىنىڭ دەرەگىنشە, الەمدىك مۇناي نارىعىنداعى احۋال گەوساياسي شيەلەنىستەرگە بايلانىستى كۇردەلەنە تۇسكەن. اقش پەن ءيزرايلدىڭ يرانعا قارسى اسكەري ارەكەتتەرى قارا التىن تاسىمالىنا كەرى اسەر ەتىپ, جەتكىزۋ تىزبەگىندە ىركىلىستەر تۋعىزعان.
سالدارىنان وپەك-ءتىڭ جەتەكشى وندىرۋشىلەرى – ساۋد ارابياسى, يراك, كۋۆەيت جانە بىرىككەن اراب امىرلىكتەرى ءوندىرىستى قىسقارتۋعا ءماجبۇر بولدى. بۇل جاعداي الەمدىك نارىقتاعى ۇسىنىستىڭ ازايۋىنا ىقپال ەتكەن.
ماڭىزدى فاكتورلاردىڭ ءبىرى – ورمۇز بۇعازى ارقىلى وتەتىن مۇناي كولەمى. ساراپشىلاردىڭ مالىمەتىنشە, الەمدە ساۋدالاناتىن مۇنايدىڭ 20%-دان استامى ءدال وسى باعىتپەن تاسىمالدانادى. سوندىقتان بۇعازداعى كەز كەلگەن تۇراقسىزدىق جاھاندىق نارىققا تىكەلەي اسەر ەتەدى.
وسىنىڭ شەڭبەرىندە Brent ماركالى مۇناي باعاسى سوڭعى ءتورت جىلداعى ەڭ جوعارى دەڭگەيگە كوتەرىلىپ, باررەلىنە شامامەن 120 دوللاردى قۇرادى.
ال وپەك+ قۇرامىنداعى رەسەي, قازاقستان, الجير جانە ومان سەكىلدى ەلدەر بۇعازداعى جاعدايدان تىكەلەي زارداپ شەكپەگەنىمەن, ولاردىڭ دا ءوندىرىستى كۇرت ارتتىرۋ مۇمكىندىگى شەكتەۋلى. بۇل ءوز كەزەگىندە ۇسىنىستىڭ تەز ارادا قالپىنا كەلۋىن قيىنداتادى.
ساراپشىلاردىڭ پىكىرىنشە, الداعى شەشىم نارىقتاعى تەپە-تەڭدىكتى ساقتاۋعا باعىتتالعانىمەن, قىسقا مەرزىمدە مۇناي باعاسىنا ەلەۋلى وزگەرىس اكەلمەۋى مۇمكىن.
رەسەي مۇنايىنىڭ قازاقستان ارقىلى ءترانزيتى 2027 جىلعا دەيىن جالعاسادى
