وتكەن جىلى ERG ديرەكتورلار كەڭەسىنىڭ توراعاسى شۋحرات يبراگيموۆتىڭ قولداۋىمەن «قازىرگى زامانعى قازاق رومانى» بايگەسى جاريالاندى. اتالعان اۋقىمدى باستاما قازىرگى قازاق پروزاسىن دامىتۋعا سەرپىن بەرىپ, جازۋشىلار مەن وقىرمان اراسىنداعى بايلانىستى نىعايتۋدى كوزدەگەنى انىق. بايقاۋعا 3000-نان استام ءوتىنىم ءتۇسىپ, قوعامدا ادەبيەتكە دەگەن قىزىعۋشىلىقتىڭ ءالى دە جوعارى ەكەنىن دالەلدەدى. ىرىكتەۋ كەزەڭىنەن وتكەن سەگىز اۆتوردىڭ جەتەۋى 3 ميلليون تەڭگەدەن قالاماقى الدى. ال باس جۇلدە يەگەرىنە ون بەس ميلليون تەڭگە بەرىلدى.
جوبانىڭ ماڭىزدى ناتيجەلەرىنىڭ ءبىرى – فيناليست شىعارمالاردىڭ كىتاپ بولىپ باسىلىپ شىعۋى. ءار شىعارما 1000 دانا تارالىممەن جارىق كورىپ, سالتاناتتى ءىس-شارادا وقىرمانعا ۇسىنىلدى. ونىڭ 750 داناسى الماتىداعى ۇلتتىق كىتاپحاناعا تاپسىرىلىپ, الداعى ۋاقىتتا ەل كىتاپحانالارى ارقىلى كەڭىنەن تاراتىلادى.
جوباعا دۋمان رامازان «سىناق», قۋانىش جيەنباي «ارالقۇمداعى اقىرعى ايالداما», نۇرجان قۋانتاي ۇلى «وپاسىز ويىن», اسقار التاي «كاسكاد», مۇرات الماسبەك «ەكى جاعالاۋ», قۋات بوراش «تاۋبە», ايىم اقىلتاي «قارىز» اتتى روماندارىمەن قاتىسىپ, بايگەگە ءتۇسىپتى.
سارالاۋدان وتكەن سوڭ, باس جۇلدە 15 ميلليون تەڭگە جازۋشى جۇسىپبەك قورعاسبەككە «كەلندەگى كوكجال» رومانىنا بەرىلدى. سونىمەن بىرگە اتالعان تۋىندىنىڭ جەلىسى بويىنشا كوركەم فيلم ءتۇسىرۋ جوسپارى دا جاريالاندى.
«قازىرگى زامانعى قازاق رومانى» جوباسى بۇگىنگى ادەبي ۇدەرىستى قولدايتىن ماڭىزدى باستامالاردىڭ ءبىرى رەتىندە باعالانىپ وتىر. ERG ديرەكتورلار كەڭەسىنىڭ توراعاسى شۋحرات يبراگيموۆ وسى جوباعا قاتىسۋشىلارعا جولداعان قۇتتىقتاۋىندا ۇلتتىق ادەبيەتتىڭ ماڭىزىن اتاپ ءوتىپ, جازۋشىلارعا ۇلكەن ءۇمىت ارتاتىنىن جەتكىزدى. ونىڭ پىكىرىنشە, قازىرگى جاس ۇرپاق ءۇشىن ۇلتتىق قۇندىلىقتىڭ ورنى ەرەكشە. بۇل قۇندىلىق تەرەڭ تاريحپەن ساباقتاسىپ قانا قويماي, يننوۆاتسيالار مەن تسيفرلىق تەحنولوگيالار ۇستەمدىك ەتكەن اشىق الەمدە بولاشاقتى باعدارلاۋعا ءتيىس. سونداي-اق جاڭا ءداۋىردىڭ جاڭا كەيىپكەرلەرىن قالىپتاستىرۋ – ادەبيەتتىڭ باستى مىندەتتەرىنىڭ ءبىرى. وسى تۇرعىدا مۇنداي بايقاۋلار جاس قالامگەرلەرگە مۇمكىندىك بەرىپ, ۇلتتىق يدەيانى جاڭا قىرىنان تۇسىندىرۋگە جول اشادى.
ارينە, الەمدەگى ءار جەتىستىكتىڭ ارتىندا رۋحانياتتىڭ وزەگى تۇرعانى شىندىق. اسپانعا ۇشقان ۇشقىش تا, الىپ شىڭداردى باعىندىرعان الپينيست تە, نيۋ-يوركتىڭ قور بيرجاسىنىڭ قوجايىنى دا تىڭ ويدى, جاڭا يدەيانى ەڭ الدىمەن, كىتاپتان الادى. سوندىقتان «قازىرگى زامانعى قازاق رومانى» جوباسىن شىعارماشىلىق قاۋىمعا دەگەن ۇلكەن ىقىلاستان, تازا پەيىلدەن تۋعان جوبا دەپ تۇسىنەمىز. ەندىگى جەردە وسىنداي جاڭا جوبالار كوبەيە تۇسسە, ۇلت دامۋىنىڭ نەگىزى بولعان رۋحانياتىمىزعا قوسىلعان ۇلەس بولار ەدى.
