ءوزىم ءبىلىم الىپ جۇرگەن ءال-فارابي اتىنداعى قازاق ۇلتتىق ۋنيۆەرسيتەتىندە وسىنداي بىلىكتى ۇستازداردىڭ ءتالىمىن كورىپ كەلەمىن. سولاردىڭ ءبىرى – عىلىمي جەتەكشىم, اسا قادىرلى ۇستازىم باقىتگۇل ىلەسوۆا. ول – سانالى عۇمىرىن ءبىلىم مەن عىلىم سالاسىنا ارناعان تاجىريبەلى پەداگوگ. قازىرگى تاڭدا ءال-فارابي اتىنداعى قازاق ۇلتتىق ۋنيۆەرسيتەتىنىڭ اقپاراتتىق جۇيەلەر كافەدراسىندا كافەدرا مەڭگەرۋشىسىنىڭ وقۋ-ادىستەمەلىك جانە تاربيە ءىسى جونىندەگى ورىنباسارى ءارى اعا وقىتۋشى قىزمەتىن اتقارادى. ۇستازدىق جولىندا ۇلكەن جاۋاپكەرشىلىك تانىتىپ, بولاشاق مامانداردى دايارلاۋ ىسىنە ەلەۋلى ۇلەس قوسىپ ءجۇر.
ۇستازدىڭ شىنايى بولمىسى تەك كاسىبي بىلىكتىلىگىمەن عانا ەمەس, شاكىرتتەرگە دەگەن جاناشىرلىعى مەن ادامگەرشىلىك قاسيەتتەرى ارقىلى ايقىندالادى. باقىتگۇل ەرالىقىزىنىڭ تالاپشىلدىعى, ىسكەرلىگى, بىلىمگە دەگەن ادالدىعى ستۋدەنتتەرگە ءاردايىم ۇلگى. ونىڭ ەڭبەگى تالاي شاكىرتتىڭ عىلىم مەن ءبىلىم جولىنا سەنىممەن قادام باسۋىنا سەبەپ بولىپ وتىر.
ءبىلىم سالاسىندا تابىستى ەڭبەك ەتۋ – ۇلكەن توزىمدىلىكتى, تەرەڭ ءبىلىمدى جانە جۇرەك جىلۋىن تالاپ ەتەدى. وسى تۇرعىدان العاندا, باقىتگۇل ىلەسوۆا – ءوز ماماندىعىنا ادالدىق تانىتىپ كەلە جاتقان ابزال جان. ونىڭ ونەگەلى جولى مەن ۇلاعاتتى ءىسى – جاس ۇرپاققا, ارىپتەستەرىنە ۇلگى. وسىنداي وقىتۋشىلاردىڭ ەسەلى ەڭبەگى ارقىلى ءبىلىم وردالارىنىڭ بەدەلى ارتىپ, ەل ەرتەڭىن سەنىپ تاپسىراتىن بىلىكتى ماماندار
قالىپتاسادى.
جاننۇر زاتىحان,
ءال-فارابي اتىنداعى قازۇۋ-دىڭ 4-كۋرس ستۋدەنتى
