اقتاۋ قالاسىندا حالىقارالىق ستاندارتتارعا ساي سالىنعان وليمپيادالىق ۇلگىدەگى نىسان ەكى قاباتتى عيماراتتان تۇرادى. مۇندا مۇزايدىنى, سپورتشىلارعا ارنالعان كيىم اۋىستىرۋ بولمەلەرى, جاتتىقتىرۋشىلار كابينەتتەرى, اكىمشىلىك بولمەلەر, كەلۋشىلەرگە ارنالعان كافە قاراستىرىلعان, سپورتشىلار مەن قوناقتارعا بارلىق قاجەتتى جاعداي جاسالعان.
سپورت كەشەنىنىڭ اشىلۋ سالتاناتىندا ءسوز سويلەگەن ءوڭىر باسشىسى نۇرداۋلەت قيلىباي:
«جاستاردىڭ سپورتپەن جۇيەلى تۇردە اينالىسۋىنا جان-جاقتى جاعداي جاساۋ – ءبىزدىڭ باستى باسىمدىقتارىمىزدىڭ ءبىرى. مەملەكەت باسشىسى قاسىم-جومارت توقاەۆ اتاپ وتكەندەي, بۇقارالىق سپورتتى دامىتۋ, زاماناۋي سپورت ينفراقۇرىلىمىن قالىپتاستىرۋ – ستراتەگيالىق ماڭىزدى مىندەتتەر. وسى ورايدا بۇقارالىق سپورتتى دامىتۋعا ەرەكشە كوڭىل ءبولۋ قاجەت. اسىرەسە قىسقى سپورت تۇرلەرىن جاستار اراسىندا كەڭىنەن ناسيحاتتاۋ اسا ماڭىزدى. مۇنداي باستامالار وسكەلەڭ ۇرپاقتىڭ قىزىعۋشىلىعىن ارتتىرىپ قانا قويماي, ولاردىڭ الەۋەتىن اشۋعا مۇمكىندىك بەرەدى. بولاشاقتا وبلىسىمىزدان وليمپيادا چەمپيوندارى شىعادى دەپ سەنەمىن», دەپ اتاپ ءوتتى.
مەملەكەت باسشىسى جەكە ينۆەستورلاردىڭ قوعامدىق ماڭىزى بار جوبالارعا, ونىڭ ىشىندە سپورت نىساندارىن سالۋعا قارجى سالۋعا ءتيىس ەكەندىگىن ايتقان بولاتىن. وسى تاپسىرماعا سايكەس جاڭا مۇز سارايى جەكە ينۆەستيتسيا ەسەبىنەن جۇزەگە اسقان جوبا بولۋىمەن ەرەكشە, ءارى ماڭعىستاۋدا بيزنەستىڭ الەۋمەتتىك ينفراقۇرىلىمدى دامىتۋعا قالاي قاتىساتىنىنا مىسال بولا الادى. «باۋىرجان لتد» جشس ديرەكتورى, كاسىپكەر ۇلىقپان كوبەسوۆتىڭ بۇل جوباسى «دامۋ» قورى ارقىلى جۇزەگە اسىرىلاتىن «ورلەۋ» باعدارلاماسى اياسىندا مەملەكەتتىك قولداۋعا يە بولدى.
مۇز سارايىنىڭ اشىلۋ سالتاناتىنا مانەرلەپ سىرعاناۋدان حالىقارالىق دارەجەدەگى سپورت شەبەرى, ەلىمىزدىڭ بەس دۇركىن چەمپيونى, جاڭاوزەن قالاسىنىڭ تۋماسى گاۋحار ناۋرىزوۆا, شايبالى حوككەيدەن حالىقارالىق دارەجەدەگى سپورت شەبەرى, ماڭعىستاۋ وبلىسىنىڭ باس جاتتىقتىرۋشىسى دميتري شاحوۆ, سونداي-اق سانكت-پەتەربۋرگتەن ارنايى شاقىرىلعان جاتتىقتىرۋشى – مانەرلەپ سىرعاناۋدان سپورت شەبەرلىگىنە كانديدات, ماڭعىستاۋ وبلىسىنىڭ اعا جاتتىقتىرۋشىسى الەنا پانكراتوۆا قاتىستى.
ۇلتتىق قۇرامانىڭ مۇشەسى, ەلىمىزدىڭ نامىسىن حالىقارالىق ارەنادا قورعاپ جۇرگەن سپورتشى, ەل چەمپيونى, حالىقارالىق جارىستاردىڭ جۇلدەگەرى, ءتورت قۇرلىق چەمپيوناتىنىڭ, الەم چەمپيوناتىنىڭ, ازيا ويىندارىنىڭ, قىسقى ۋنيۆەرسيادانىڭ قاتىسۋشىسى, سەرىكتەسىمەن بىرگە ISU حالىقارالىق رەيتينگىندە ۇزدىك 50 جۇپتىڭ قاتارىنا ەنگەن گاۋحار ناۋرىزوۆا تۋعان ولكەسىندە جاڭا سپورت نىسانىنىڭ اشىلۋىنا ريزاشىلىعىن ءبىلدىرىپ, نىساننىڭ جاستاردى سالاماتتى ءومىر سالتى تۇرعىسىندا دامىتۋعا تيگىزەتىن ىقپالىن, بولاشاق چەمپيونداردى تاربيەلەۋدەگى ءمان-ماڭىزىن اتاپ ءوتتى.
ء«بىزدىڭ قالادا مانەرلەپ سىرعاناۋ ونەرى ءالى باستاپقى دەڭگەيدە. دەگەنمەن جاڭا مۇزايدىنىنىڭ اشىلۋىمەن بۇل تاماشا سپورت ءتۇرى قارقىندى دامىپ, باتىل دا تالانتتى بالالاردى وزىنە تارتاتىنىنا سەنىمدىمىن. جاسوسپىرىمدەر بۇل سپورتتا باعىن سىناۋدان قورىقپاي, تاباندىلىق تانىتىپ, تۇعىردىڭ بيىگىنەن كورىنەدى دەپ ۇمىتتەنەمىن. زاماناۋي ءزاۋلىم سارايدا ولارعا بارلىق مۇمكىندىك بار. مۇزايدىنىنىڭ اشىلۋى – ۇلكەن وقيعا, ولكەم ءۇشىن ماقتانامىن, بارشا سپورتشىلارىمىزعا ۇلكەن جەتىستىكتەر تىلەيمىن», دەدى, قازىرگى ۋاقىتتا يسپانيادا بەلگىلى سپورتشىلار, وليمپيا ويىندارىنىڭ قاتىسۋشىلارى, گران-پري كەزەڭدەرىنىڭ جۇلدەگەرلەرى كيريلل حالياۆين مەن سارا ۋرتادونىڭ جەتەكشىلىگىمەن جاتتىعىپ جۇرگەن سپورتشى گ.ناۋرىزوۆا.
شىنىندا دا, اقتاۋدا اشىلعان مۇزايدىنى سارايى ءوڭىردىڭ سپورت سالاسىنداعى ۇلكەن جاڭالىق بولدى. ماڭعىستاۋ ءوڭىرىنىڭ سپورتتىق ينفراقۇرىلىمىن دامىتۋداعى ماڭىزدى نىسان جاس سپورتشىلاردى كاسىبي دايارلاۋعا جول اشادى. وليمپيادالىق سپورتتىڭ حوككەي, مانەرلەپ سىرعاناۋ, شورت-ترەك, كيورلينگ سياقتى ءتورت ءتۇرىن دامىتۋعا مۇمكىندىك بەرەتىن نىسانعا استانا, وسكەمەن, قاراعاندى قالالارىنان بىلىكتى جاتتىقتىرۋشىلاردى تارتۋ جوسپارلانىپ وتىر. نەگىزگى باسىمدىق حوككەي مەن مانەرلەپ سىرعاناۋعا بەرىلەدى.
نىساننىڭ اشىلۋى ماڭعىستاۋ وبلىسىندا قىسقى سپورت تۇرلەرىن دامىتۋعا, جاس سپورتشىلاردى قولداۋعا, بۇقارالىق سپورتتى ناسيحاتتاۋعا تىڭ سەرپىن بەرەتىنى ءسوزسىز.
ماڭعىستاۋ وبلىسى
