«تاۋتان», «شونجىك», «سارىماق» دەپ بابالارىمىز ادەمى اتاۋلار بەرگەن سۇيكىمدى شونجىكتەر العاشقى اپتالاردا ەنەسىمەن بىرگە تۇرسا, كۇننىڭ كوزى جىلىعاننان كەيىن ەركىندىككە شىعىپ, جاڭا ورتاعا, كوپشىلىككە ۇيرەنە باستاعانى بايقالادى. تاۋتاندار ەنەسىن ەمىپ جۇرگەنىمەن, قاتتى ازىقتارعا قىزىعۋشىلىق تانىتىپ, كۇن وتكەن سايىن شيراپ كەلەدى.
ەڭ قىزىعى, ناۋرىز مەيرامى قارساڭىندا الماتى حايۋاناتتار باعى وتانداستارىمىزدان امۋر جولبارىستارىنىڭ سۇيكىمدى سارىماقتارىنا ادەمى ات قويۋدى سۇراعان ەدى. ەل مۇنداي ادەمى ۇسىنىسقا بىردەن ەلەڭ ەتىپ, ەركەك تاۋتاندارعا ءتۇرلى-ءتۇرلى ەسىمدەر ۇسىنىلسا, اقىرى ولارعا ەڭ ءجيى اتالعان ارلان, تارلان, الان اتاۋلارى بۇيىردى. شونجىكتەردى «بريۋس, دجەكي, چاك», «لەو, ستيچ پەن سيمبا», «موتسارت, باح, بەتحوۆەن», «شەرحان, «داستان, تەمىرلان», «مارس, مەركۋري, يۋپيتەر» دەپ اتاعىسى كەلگەندەر دە كوپ بولدى.
«مەرەكە كۇندەرى زووباققا 40 مىڭعا جۋىق قوناق كەلدى. بۇل وتكەن جىلدىڭ وسى كەزەڭىمەن سالىستىرعاندا 23%-دان استامعا ارتىق. قالا تۇرعىندارى مەن قوناقتارىنىڭ تابيعاتقا دەگەن قىزىعۋشىلىعى وسكەنىن بايقاپ وتىرمىز. امۋر جولبارىستارىنىڭ كۇشىكتەۋى ماڭىزدى وقيعا عانا ەمەس, ماماندارىمىزدىڭ قاجىرلى ەڭبەگىنىڭ ناتيجەسى», دەيدى زووباق ديرەكتورى سەيىلحان اكىلبەكوۆ.
قازىر زووباقتا ينفراقۇرىلىمدى دامىتۋ, جانۋارلاردى كۇتىپ-باعۋعا قولايلى جاعداي جاساۋ جۇمىسى جالعاسىن تاۋىپ جاتىر. سونىمەن قاتار كەلۋشىلەرگە ارنالعان تانىمدىق باعدارلامالاردىڭ دا اۋقىمى ۇلعايدى.
الماتى
