كوممۋنالدىق تاريفتەر: موراتوري اياقتالدى
2025 جىلدىڭ قازان ايىنان بەرى قولدانىستا بولعان كوممۋنالدىق تاريفتەردى كوتەرۋگە قاتىستى موراتوري 1 ساۋىردەن باستاپ ءوز كۇشىن جويادى. بۇل جارىق, جىلۋ, سۋ سەكىلدى قىزمەتتەردىڭ قىمباتتاۋىنا اكەلۋى مۇمكىن.
ساراپشىلاردىڭ بولجامىنشا, تاريفتەر بىردەن ەمەس, كەزەڭ-كەزەڭىمەن وسەدى. ورتاشا ءوسىم 5–10 پايىز دەڭگەيىندە بولۋى ىقتيمال, ال كەي وڭىرلەردە بۇل كورسەتكىش جوعارى بولۋى مۇمكىن. اسىرەسە ينفراقۇرىلىمى توزعان سولتۇستىك, شىعىس جانە باتىس ايماقتاردا تاريفتەردىڭ كوتەرىلۋى جيىلەدى.
ۇكىمەت وكىلدەرى بۇل قادامدى ينفراقۇرىلىمدى جاڭارتۋ جانە قىزمەت ساپاسىن ساقتاۋ ءۇشىن قاجەتتى شارا دەپ تۇسىندىرەدى.
قارجى نارىعى: نەسيە الۋ قيىندايدى
ساۋىردەن باستاپ بانكتەر بولشەك نەسيەلەر بويىنشا تاۋەكەلدەردى قاتاڭ باعالاي باستايدى. تولەم مەرزىمىن كەشىكتىرگەن نەمەسە قارىز جۇكتەمەسى جوعارى ازاماتتارعا نەسيە الۋ قيىنداي تۇسەدى.
سونىمەن قاتار ميكروقارجى ۇيىمدارى ءۇشىن شەكتى مولشەرلەمە 40 پايىزعا دەيىن تومەندەتىلىپ, بۇل سالاداعى كەيبىر ونىمدەردىڭ ءتيىمسىز بولۋىنا ىقپال ەتۋى مۇمكىن.
بۇدان بولەك, بانكتەر ءۇشىن مىندەتتى رەزەرۆتىك تالاپتاردىڭ ارتۋى ولاردىڭ نەسيە بەرۋ مۇمكىندىگىن شەكتەيدى.
سالىق جانە ەسەپتىلىك: ماڭىزدى مەرزىمدەر
1 ءساۋىر – كولىك سالىعىن تولەۋدىڭ سوڭعى كۇنى. بۇل مەرزىمنەن كەيىن بەرەشەككە ءوسىمپۇل ەسەپتەلە باستايدى.
سونداي-اق وسى كۇنى كاسىپكەرلەرگە ارنالعان سالىقتىق راقىمشىلىق تا اياقتالادى. ۋاقىتىندا نەگىزگى قارىزىن وتەگەندەر عانا ايىپپۇلداردان بوساتىلادى.
سالىق جۇيەسىندە تەحنيكالىق وزگەرىستەر دە بار: ەسكى دەكلاراتسيا نىساندارى كەزەڭ-كەزەڭىمەن قابىلدانبايدى. بۇل بيزنەس وكىلدەرىن جاڭا تسيفرلىق جۇيەلەرگە كوشۋگە ءماجبۇر ەتەدى.
مەملەكەتتىك قىزمەت: تولىق تسيفرلاندىرۋ
1 ساۋىردەن باستاپ مەملەكەتتىك قىزمەتكە قابىلداۋ تولىقتاي ونلاين فورماتقا كوشەدى. كونكۋرس مەرزىمى قىسقارىپ, ىرىكتەۋ پروتسەسى جەدەلدەيدى.
مەملەكەتتىك قىزمەتكە ىرىكتەۋ: 1 ساۋىردەن باستاپ وتىنىشتەر ونلاين قابىلدانادى
جاڭا جۇيەدە تەستىلەۋ, ەسسە, سۇحبات جانە پسيحومەتريالىق باعالاۋ ەنگىزىلەدى. ساراپشىلار بۇل وزگەرىستەر ادامي فاكتوردى ازايتىپ, اشىقتىقتى ارتتىرادى دەپ ەسەپتەيدى.
بالالار قاۋىپسىزدىگى: ليتسەنزيا مىندەتتەلەدى
بالالارعا ارنالعان لاگەرلەر مەن ءبىلىم بەرۋ ورتالىقتارى ءۇشىن جاڭا تالاپتار كۇشىنە ەنەدى. ەندى مۇنداي ۇيىمدار مىندەتتى تۇردە ليتسەنزيا الۋى ءتيىس.
جاڭا ەرەجەلەر پەداگوگتەردىڭ بىلىكتىلىگىنە, قاۋىپسىزدىككە, مەديتسينالىق قىزمەتكە جانە سانيتارلىق جاعدايعا قويىلاتىن تالاپتاردى كۇشەيتەدى. بۇل بالالاردىڭ قاۋىپسىزدىگىن ارتتىرۋعا باعىتتالعان.
تسيفرلىق باقىلاۋ: ءموبيلدى اۋدارىمدار نازاردا
بانكتەر ءموبيلدى اۋدارىمدار تۋرالى مالىمەتتەردى سالىق ورگاندارىنا تاپسىرا باستايدى. الايدا بارلىق وپەراتسيالار ەمەس, تەك بەلگىلى ءبىر شەكتەن اسقان اۋدارىمدار عانا باقىلاۋعا الىنادى. بۇل شارا كولەڭكەلى تابىستاردى انىقتاۋعا باعىتتالعانىمەن, قاراپايىم ازاماتتاردىڭ شوتتارى اۆتوماتتى تۇردە بۇعاتتالمايدى.
ءموبيلدى اۋدارىمدار: 2026 جىلدان باستاپ قانداي وزگەرىستەر ەنەدى؟
كوللاجدى جاساعان – زاۋرەش سماعۇل, «EQ»
جاڭا قىزمەتتەر مەن نارىقتاعى وزگەرىستەر
ساۋىردەن باستاپ جۇرگىزۋشى كۋالىگىن ونلاين اۋىستىرۋ مۇمكىندىگى ىسكە قوسىلادى. بۇل قىزمەت eGov پلاتفورماسى ارقىلى قولجەتىمدى بولادى.
جۇرگىزۋشى كۋالىگىن ونلاين اۋىستىرۋ: جاڭا قىزمەتتى قالاي راسىمدەيمىز؟
سونىمەن قاتار بىرقاتار الەۋمەتتىك ماڭىزى بار تاۋارلارعا ەڭ تومەنگى باعا ەنگىزىلىپ, نارىقتاعى تۇراقتىلىقتى ساقتاۋ كوزدەلەدى.
تەمىرجول سالاسىندا دا جاڭالىق بار: ەلدە زاماناۋي Stadler ۆاگوندارى ىسكە قوسىلىپ, جولاۋشىلار تاسىمالىنىڭ ساپاسىن ارتتىرۋ جوسپارلانىپ وتىر.
ساراپشىلاردىڭ پىكىرىنشە, ءساۋىر ايىنان باستاپ كۇشىنە ەنەتىن وزگەرىستەردىڭ باسىم بولىگى ەكونوميكانى تۇراقتاندىرۋعا, تسيفرلاندىرۋدى دامىتۋعا جانە الەۋمەتتىك قاۋىپسىزدىكتى كۇشەيتۋگە باعىتتالعان.
الايدا كوممۋنالدىق تاريفتەردىڭ ءوسۋى مەن نەسيە شارتتارىنىڭ قاتايۋى حالىقتىڭ قارجىلىق جاعدايىنا بەلگىلى ءبىر قىسىم ءتۇسىرۋى مۇمكىن. سوندىقتان ازاماتتارعا قارجىلىق جوسپارلاۋعا مۇقيات قاراپ, جاڭا تالاپتارعا بەيىمدەلۋ ماڭىزدى.
جالپى العاندا, بۇل وزگەرىستەر قازاقستاننىڭ جاڭا ەكونوميكالىق جانە الەۋمەتتىك كەزەڭگە قادام باسقانىن كورسەتەدى.
