قارلىعاش اپا كىلەم توقۋدى اجەسى زەينەپتەن ۇيرەنگەن. سول كىسىنىڭ قاسىندا ءجۇرىپ, ءجۇن ساباۋدىڭ, ءجۇن ءتۇتۋ, ءيىرۋ, بوياۋ, ارقاۋ دايىنداۋ دەگەننىڭ نە ەكەنىن كوزبەن كورىپ ءوستى.
«ول كەزدە انالارىمىز بۇزاۋدىڭ باس جىبىنەن باستاپ, ارقان-شىلبىر, ساپتاما ەتىككە دەيىن قولدان جاساي بەرەتىن. ەشكىنىڭ تۇبىتىنەن قولعاپ, بوكەباي, ەر ادامدارعا شالما توقيتىن. جەتپىسىنشى جىلدارعا دەيىن تۋعانداردىڭ ءبارى كىلەم توقۋدى بىلەتىن. ءبىرىنشى سىنىپتان باستاپ كىلەم توقۋعا ارالاستىم. ءتورتىنشى سىنىپتا كورشى ۇيدە ءبىر اپتا جاتىپ, كوپتەگەن توقۋ ءادىسىن ۇيرەندىم», دەيدى شەبەر.
قارلىعاش نۇريددەنقىزى كىلەمنىڭ سارىباي, قارامان, ارابى, كەستەلى, التىاۋىل دەپ اتالاتىن ءداستۇرلى تۇرلەرىن توقىپ كورگەن. ويۋ-ورنەگى كەلىسكەن تۇكتى, تاقىر كىلەمدەردىڭ ءبىرازىن بۇگىندە كەلىندەرى, قىزدارى, جاقىن اعايىندارى تۇتىنىپ وتىر.
ىسمەردىڭ ايتۋىنشا, كىلەم توقۋ ونەرىندەگى ءار ويۋدىڭ, ءار بوياۋدىڭ ءوز سىرى, ءوز تاريحى بار. كىلەمنىڭ ارقاۋىن دايىنداۋ, ءتۇر جىپتەرىن بوياۋ, ءجىپ ءيىرۋدىڭ ءوزى قول يكەمىمەن قوسا, ءتوزىم مەن تاباندىلىقتى تالاپ ەتەدى.
قارلىعاش نۇريددەنقىزى قىرىق ءبىر جىل مەكتەپتە فيزيكا پانىنەن ساباق بەردى. مۇعالىمدىك پەن قولونەردى قاتار الىپ جۇرگەن ۇلاعاتتى ۇستاز 2019 جىلى زەينەت دەمالىسىنا شىققان سوڭ, اجەسىنەن قالعان كىلەم اعاشىن قولعا الىپ, كىلەم توقۋدى باستايدى. العاشقى كىلەمىن قىزىنىڭ جاساۋىنا ارناپ توقىعان.
«سودان بەرى جىلىنا ءبىر كىلەم توقيمىن. بىلتىر دا ءبىر تۇكتى توسەنىشتى جالعىز ءوزىم توقىپ شىقتىم. كەزىندە قازىرگى ارالباي اۋىلىندا ساليقا وماربەكوۆا دەگەن اتاقتى كىلەمشى كىسى تۇردى. ول كىسى وبلىستىق, اۋداندىق ۇلكەن كورمەگە ارنايى تاپسىرىسپەن امانگەلدى يمانوۆتىڭ, ءالىبي جانگەلديننىڭ پورترەتتەرىن توقىعان. ساليقا اپا سۇيەكپەن توقيتىن. مەنى كىلەمنىڭ شەتىن توقۋعا وتىرعىزاتىن. ول كىسىگە مەنىڭ ءورىپ-شيراتقانىم ۇنايتىن. ساليقا اپادان قارسى توقۋ, بوس كەستە, ەكى جىپپەن توقۋ دەگەندى ۇيرەندىم. كەيىن ارقالىق قالاسىنىڭ كىلەم تسەحىنىڭ ارنايى شاقىرتۋىمەن كوشىپ كەتتى», دەيدى شەبەر.
