سۋرەت: facebook.com/kisi.kz
كونستيتۋتسيالىق رەفورما ءاربىر وتانداسىمىزدىڭ كۇندەلىكتى ومىرىنە تىكەلەي نەمەسە جاناما تۇردە اسەر ەتەدى, قۇقىقتاردىڭ, مىندەتتەردىڭ جانە قاتىسۋ مۇمكىندىكتەرىنىڭ شەڭبەرىن انىقتايدى. الەۋمەتتانۋ تۇرعىسىنان العاندا, جاڭا قۇجات ازاماتتىق قاتىسۋدى نىعايتۋ, كەرى بايلانىس ارنالارىن كەڭەيتۋ جولىندا جاڭارتىلعان نەگىز قالايدى دەپ بولجاۋعا بولادى. بۇل ءوز كەزەگىندە ساياسي ساۋاتتىلىق پەن ازاماتتىق بەلسەندىلىكتىڭ وسۋىنە ىقپال ەتە الادى.
بۇل تۇرعىدان العاندا حالىق كەڭەسى ينستيتۋتى كونسۋلتاتيۆتىك جانە وكىلدىك فورۋم رەتىندە قۇرۋ ەرەكشە ماڭىزعا يە. ونىڭ مارتەبەسى كونستيتۋتسيادا بەكىتىلگەن, وندا ينستيتۋتقا بىرقاتار ناقتى وكىلەتتىك بەرىلۋى كوزدەلگەن. ناقتىراق ايتقاندا, قازاقستان حالىق كەڭەسى: ىشكى مەملەكەتتىك ساياساتتىڭ نەگىزگى باعىتتارى, قوعامدىق كەلىسىمدى, ۇلتتىق بىرلىك پەن ىنتىماقتاستىقتى نىعايتۋ, قازاقستان رەسپۋبليكاسىنىڭ نەگىزگى قاعيداتتارى مەن ۇلتتىق قۇندىلىقتاردى ىلگەرىلەتۋ بويىنشا ۇسىنىستار مەن ۇسىنىمدار ازىرلەيدى; قۇرىلتايعا زاڭ جوبالارىن ەنگىزەدى; رەسپۋبليكالىق رەفەرەندۋم تاعايىنداۋ تۋرالى باستاما كوتەرەدى; كونستيتۋتسيالىق زاڭعا سايكەس باسقا دا وكىلەتتىكتەردى جۇزەگە اسىرادى. بۇل وكىلەتتىلىكتەر اياسى ينستيتۋتتىڭ فۋنكتسيونالدىق مارتەبەسىن رەسمي تۇردە كەڭەيتەدى جانە ونى تەك كەڭەسشى ورگان شەگىنەن شىعارادى.
قازاقستان حالىق كەڭەسىنىڭ قۇرامى قازاقستان ازاماتتارىنان تۇرادى. ۇلتتىق قۇرىلتايدا جاريالانعانداي, ونىڭ قۇرامىنا 126 مۇشە كىرەدى: ياعني ەتنومادەني بىرلەستىكتەر, قوعامدىق ۇيىمدار جانە ايماقتاردان ء(ماسليحاتتار مەن قوعامدىق كەڭەستەر ارقىلى) 42 وكىلدەن الىنادى. بۇل قۇرىلىم قوعامدىق, ايماقتىق جانە ەتنومادەني وكىلدىكتىڭ تەپە-تەڭدىگىن بىلدىرەدى.
حالىق كەڭەسى مەملەكەت پەن وڭىرلەردىڭ وكىلدەرىن, كاسىبي قاۋىمداستىقتار مەن ەتنومادەني بىرلەستىكتەردى بىرىكتىرە وتىرىپ, ءتۇرلى قوعامدىق توپتار اراسىنداعى ديالوگتى جۇيەلى نەگىزدە قالىپتاستىرۋعا باعىتتالادى. بۇل قۇرىلىم مۇددەلەردى ءبىلدىرۋ جانە الەۋمەتتىك ماڭىزى بار ماسەلەلەردى تالقىلاۋ ماقساتىندا قوسىمشا الاڭ رەتىندە قىزمەت ەتەدى.
دەگەنمەن بۇل تەتىكتىڭ تيىمدىلىگى ونىڭ قۇرىلۋىنا عانا ەمەس, سونىمەن قاتار ونىڭ پروتسەدۋرالىق اشىقتىعىنا, شىنايى وكىلدىك دارەجەسىنە جانە شەشىمدەرگە پراكتيكالىق اسەرىنە دە بايلانىستى بولادى. نەگىزىنەن حالىق كەڭەسىنىڭ ناقتى ءرولىن ازاماتتىق قاتىسۋ دەڭگەيى, بەرىلگەن قاتىسۋ قۇرالدارىن پايدالانۋعا دايىندىق, ەلدە بولىپ جاتقان ۇدەرىستەر ءۇشىن جاۋاپكەرشىلىك ايقىندايدى.
جانار ناقىپباەۆا,
پرەزيدەنت جانىنداعى قسزي قوعامدىق پىكىردى زەرتتەۋ ءبولىمىنىڭ باس ساراپشىسى
