الامان ايتىسقا ەلىمىزگە تانىمال ءسوز شەبەرلەرى, كىل مىقتىلار قاتىسىپ, ءوزارا باق سىناستى. ساحنا تورىندە وتكەن تارتىستى دودادا اقىندار سۋىرىپسالمالىق ونەردىڭ ۇزدىك ۇلگىسىن كورسەتىپ, ەل بىرلىگى, ۇلتتىق قۇندىلىق پەن قوعامداعى وزەكتى ماسەلەلەردى كەڭىنەن جىرلاپ, كورەرمەنگە ەرەكشە رۋحاني سەرپىلىس سىيلادى. ارينە, بەكارىس شويبەكوۆ تە اقىندار نازارىنان تىس قالعان جوق. ونىڭ قوعامداعى ورنى, ايتىس ونەرىنە قوسقان ۇلەسى, ادامي بولمىسى اقىندار جىرىنا ارقاۋ بولدى. ءازىل-شىنى ارالاس جىر جولدارى دا ارنالدى. مىسالى, يرانعايىپ اقىن: «اتقا مىنسە قالادى قىزىق بولماي, ات باسىنداي التىن دا, كۇمىسىڭ دە. ايتىستىڭ شايىن ءىشىپ كورمەسەدە, ايتىس ءۇشىن باراتىن «ۋ» ىشۋگە. «ارىستان», «كيللەر» اقىن اتاندى عوي, مەيىرىم بولماعان سوڭ دىم ىشىندە. بەزبۇيرەك بەكارىستى ءدال وسىلاي, ماقتايمىن دەپ ويلاماپپىن تىرىسىندە...» دەپ ازىلدەسە, ەركەبۇلان قاينازار: «بەكەڭدى «ارىستان» دەپ تەككە ايتپايدى, ارتتاعى ىنىلەرى قۇراق ۇشقان. تۋىپ-وسكەن جەرىندە جاتىر ونىڭ, قوجا احمەت ءياساۋيدىڭ ءپىرى ارىستان. مۇزبالاق مۇقاعالي ايتقاندايىن, ءسوزىمدى كەلتىرەيىن قۇراپ ىقشام. ء«بىر ارىستان ومىردەن وتكەنىمەن, ءومىر ءسۇرىپ كەلەدى ءتىرى ارىستان», دەپ جىرعا قوستى.
ايتىستىڭ قازىلار القاسىنا اقىن, «وتان» وردەنىنىڭ يەگەرى, قازاقستاننىڭ حالىق جازۋشىسى ءجۇرسىن ەرمان توراعالىق ەتىپ, قازاقستاننىڭ ەڭبەك سىڭىرگەن قايراتكەرى, «پاراسات» جانە «قۇرمەت» وردەندەرىنىڭ يەگەرى, بەلگىلى اقىن امانجول ءالتاي جۇرگىزدى. كوپشىلىكتىڭ كوڭىلىنەن شىققان جىر دوداسىنىڭ قورىتىندىسى بويىنشا باس جۇلدەنى استانا قالاسىنان كەلگەن يرانعايىپ كۇزەنباەۆ يەلەندى. ال ءىى ورىن تۇركىستاندىق داۋرەن اقساقالوۆ پەن باتىس قازاقستان وبلىسىنان جانسايا مۋسيناعا بۇيىردى. ءىىى ورىندى قىزىلوردا وبلىسىنان مۇحتار نيازوۆ پەن مەيىربەك سۇلتانحان ەنشىلەدى.
ايتا كەتەلىك, تۇركىستانداعى دوستىق ۇيىندە بەكارىس شويبەكوۆتىڭ «ايتىستىڭ التىن ايدار بەكارىسى» اتتى ءتورت تومدىق كىتابىنىڭ تۇساۋى كەسىلىپ, ساحنا شەبەرلەرىنىڭ ابىزىنا, اقىلشىسىنا اينالعان ءجۇرسىن ەرمان مەن ايتىستىڭ قازىرگى ۇيىمداستىرۋشىسى امانجول ءالتاي باستاعان توپ جىلى لەبىزدەرىن ءبىلدىردى.
تۇركىستان
