قازاقى ويۋ-ورنەكپەن ارلەنگەن اسەم قوراپشالارداعى ۇلتتىق ونىمدەردى ساۋدا سورەسىنە سامساتىپ قويعان كىم ەكەن دەگەن ويدا ءجۇر ەدىك. ۇلىستىڭ ۇلى كۇنى قارساڭىندا جولىمىز بولىپ, وسى جوبانىڭ اۆتورى گۇلنۇر كاكىمبەكپەن جۇزدەسۋدىڭ ءساتى تۇسە كەتتى.
جاس كاسىپكەر العاشقى ونىمدەرىن 2020 جىلى كارانتين قىسپاعىندا وتىرىپ شىعارا باستاعان. تالاپتى جاستىڭ ۇلتتىق ءونىم جاساپ, ونى تۇراقتى تابىس كوزىنە اينالدىرۋىنا اناسىنىڭ تاربيەسى كوپ ىقپال ەتسە كەرەك.
ء«وزىم امانگەلدى اۋدانىندا تۋىپ-ءوستىم. اۋىلدا ءار ۇيدە دوربا-دوربا قۇرت, تەگەش-تەگەش جەنت تۇراتىن. ءۇيدىڭ ۇلكەنى بولعان سوڭ, انام ءبىراز جۇمىستى مەنىڭ موينىما ارتاتىن. ۇيدە شارۋا بىتپەيدى عوي, بالا كەزىمىزدەن كەلى ءتۇيىپ, بيداي ۇشىرىپ, ونى قازانعا سالىپ قۋىرىپ, ديىرمەن تارتىپ, ودان شىققان تالقاندى ماي, قايماق, سۇتكە شىلاپ جەپ وستىك. پاندەميا كەزىندە كىشكەنتاي بالالارىما قىزىق بولسىن دەپ ارنايى كونديتەرلىك قالىپتاردى ساتىپ الىپ, ءارتۇرلى فورمادا جەنت جاساپ كوردىم. ءبىر كۇنى سۋرەتىن الەۋمەتتىك جەلىگە سالدىم. سونى كوپ ادامدار قىزىق كورىپ, «قايدان الدىڭ, باعاسى قانشا ەكەن؟» دەپ سۇراي باستادى. ول كەزدە قازىرگىدەي دۇكەندەر جوق ەدى. تالقاننىڭ ءوزىن بازار ارالاپ ءجۇرىپ ارەڭ تاباتىنبىز. اتا-اجەم اۋىلدا تۇرادى, كەيدە سول كىسىلەر بەرىپ جىبەرەتىن. سودان جولداسىم ەكەۋمىز اقىلداسىپ, جەنت جاساپ, ساۋداعا شىعارىپ كورەيىك دەپ شەشتىك. العاش ناۋرىز مەرەكەسى قارساڭىندا ءتۇرلى مەكەمەدەن تاپسىرىس كوپ ءتۇستى. بىرتە-بىرتە سۇرانىس كوبەيدى. كەيىن اسەمدەپ-كوركەمدەپ توي-قۋانىشتارعا ارناپ ىشىندە جەنت, قۇرت, ىرىمشىگى بار قورجىن كادەلەر جاساي باستادىم», دەيدى جاس كاسىپكەر.
ۇلتتىق ونىمگە ەلدىڭ قىزىعۋشىلىعى بار ەكەنىن كورگەن گۇلنۇر كاكىمبەك 2022 جىلى قوستانايدىڭ ورتالىعىنان العاشقى دۇكەنىن اشادى. قاسىنا جەنت جاسايتىن كومەكشى الىپ, قالعان جۇمىستىڭ ءبارىن ءوزى اتقارادى. بىرتە-بىرتە جارنامانى كۇشەيتىپ, «Qazaq برەند» اتاۋىنىڭ تارالۋىنا كوپ كۇش سالا باستايدى. وسىلايشا, 2024 جىلى قوستاناي قالاسى مەن زارەچنىيدان تاعى ەكى دۇكەن اشادى. بىلتىر «اەروپورت» شاعىن اۋدانىندا, بيىل «بەرەكە» شاعىن اۋدانىندا ساۋدا نۇكتەلەرى ىسكە قوسىلدى. گۇلنۇردىڭ ونىمدەرى شالعايداعى جەتىقارا قالاسىندا دا ساتىلادى.
«Qazaq برەند» ونىمدەرى 2024 جىلى استانادا مەملەكەت باسشىسى قاسىم-جومارت توقاەۆتىڭ قاتىسۋىمەن وتكەن «ناۋرىز دۋمان» كورمەسىنە قاتىسىپ, كوپشىلىكتەن لايىقتى باعاسىن العانىن دا ايتا كەتۋ كەرەك.
«پرەزيدەنت ءوزى كەلىپ, ونىمدەرىمىزدىڭ ساپاسىن باعالاپ, ريزاشىلىق ءبىلدىردى. ارينە, بۇل – ءبىز ءۇشىن ۇلكەن ماقتانىش. العا ۇمتىلۋعا, جاڭا ىزدەنىسكە تالپىنۋعا قۇلشىنىس بەردى. وتكەن جىلى ء«بىر اۋىل – ءبىر ءونىم» جوباسىنىڭ قولداۋىمەن استانا تورىندە 89 مەملەكەتتىڭ قاتىسۋىمەن وتكەن دۇنيەجۇزىلىك كوشپەلىلەر ويىندارىنا دا قاتىسىپ, ونىمدەرىمىزدى ساتتىق. ۇلتتىق تاتتىلەرىمىزدى تۋريستەرگە تانىستىرىپ, ناسيحاتتادىق. جالپى, بۇرىن قوستاناي تۇرعىندارىنىڭ كوبى ۇلتتىق ءدام دەگەندى ەت, قىمىز, باۋىرساق دەپ قانا تۇسىنەتىن. ال جەنت, ىرىمشىك, قۇرت ءتارىزدى تاعامدارعا اسا ءمان بەرە بەرمەيتىن. ءبىز ءونىم شىعارا باستاعالى قازىر ۇلتتىق تاتتىلەر اس مازىرىنەن ءوز ورنىن تاۋىپ, ەل ىشىندە كەڭىنەن تانىلا باستادى. ءوزىمىز تۇگىلى, وزگە ۇلت وكىلدەرىنىڭ ءوزى قىزىعىپ الىپ, شەتەلدە تۇراتىن جاقىندارىنا, بالالارىنا تۋعان جەردىڭ ءدامى دەپ جىبەرىپ تۇرادى. مىسالى, بالاسى اقش-تا تۇراتىن ءبىر تۇتىنۋشىمىز جىلىنا بىرنەشە رەت كەلىپ الىپ كەتەدى. گەرمانياعا ءجيى قۇرت جىبەرەمىز. كەزىندە وسى جەردەن كوشىپ كەتكەن نەمىستەر قۇرتتى وتە قاتتى قادىرلەيدى. ول جاققا جىبەرۋ اسا قىمباتقا شىعادى, بىراق سوعان قاراماستان كوپ الدىرادى. ءبىزدىڭ ونىمدەردى, اسىرەسە, رەسەي قازاقتارى جاقسى كورەدى. ەلوردادان دا كوپ تاپسىرىس تۇسەدى. ايىنا جيىرما-وتىز رەت ءونىم جىبەرەمىز. استاناعا جارمەڭكەگە بارعانىمىزدا ءبىراز جۇرت ءبىزدى ارنايى ىزدەپ كەلىپ, ونىمدەرىمىزدى ساتىپ الادى. الداعى ۋاقىتتا باس شاھاردان دا ءبىر ساۋدا نۇكتەسىن اشۋدى جوسپارلاپ وتىرمىز. تاراز, قىزىلوردا, سەمەي, وسكەمەن, اقتاۋ, اتىراۋعا دەيىن ۇلتتىق تاتتىلەردەن قۇرالعان قورجىن, سەبەتتەر جىبەرەمىز», دەيدى گۇلنۇر.
جاس كاسىپكەر ارمانى ۇلتتىق تاتتىلەرىمىزدى نان, ءسۇت, قانت ءتارىزدى كۇندەلىكتى پايدالانىلاتىن ونىمدەر قاتارىنا قوسۋدى اڭسايدى. ۇيدەگى داستارقاننان قۇرت, ىرىمشىك, جەنت ۇزىلمەسە ەكەن دەگەن ارمانى بار. سوندىقتان قوستانايدىڭ ءاربىر شاعىن اۋدانىنان ساۋدا نۇكتەسىن اشۋعا ۇمتىلىس جاساپ جاتىر. مۇنىڭ ءبارى وڭاي جۇمىس ەمەس ەكەنى تۇسىنىكتى. قازىر قوستانايدىڭ وزىندە 6 شاعىن اۋداندا «Qazaq برەند» دۇكەندەرى جۇمىس ىستەپ تۇر.
«ۇلتتىق تاعام – ۇلت مادەنيەتىنىڭ ءبىر كورسەتكىشى. سوندىقتان ەندىگى ويىم – قوستانايدا ۇلكەن تسەح سالساق دەيمىن. ۇلتتىق ءونىم ۋاقىت تالابىنا ساي زاماناۋي ءوندىرىس ورنىندا جاسالسا ەكەن دەپ ارماندايمىن. مىسالى, مەن قازىر قۇرتتىڭ ءبىر-اق ءتۇرىن جاساپ جاتىرمىن. ەگەر تسەح بولسا, تۇيە سۇتىنەن جاسالعان, يوگۋرت سياقتى ءتۇرلى دامدەر قوسىلعان ءتۇرلى ءتۇستى قۇرتتىڭ نەشە ءتۇرىن شىعارۋعا بولادى. مۇمكىندىك بولماعاندىقتان, ونى باسقا قالادان الدىرتىپ وتىرمىز. مەملەكەتتىك باعدارلامالارعا دا قاتىسىپ, ءتيىستى مەكەمەلەردەن عيمارات سالاتىن جەر سۇراپ كوردىك. ودان ەش ناتيجە شىقپادى. سوندىقتان ازىرشە ءوز ورنىمدى تابا الماي وتىرمىن. بىراق بۇعان مويىمايمىز, بيزنەستە تاباندىلىق كەرەك ەكەنىن تۇسىنەمىز. ءتۇبى جەكە تسەحىمىز ىسكە قوسىلادى دەگەن سەنىمدەمىن», دەيدى جاس كاسىپكەر.
قوستاناي وبلىسى
