فوتو: اقوردا
پرەزيدەنت عىلىمعا بولىنگەن قارجى بىرنەشە ەسە ارتقانىن اتاپ ءوتتى.
«مەملەكەت سوڭعى التى جىلدا عىلىمعا ارنالعان قارجىنى بىرنەشە ەسە ۇلعايتتى. جىل سايىن عىلىمعا 200 ميلليارد تەڭگەدەن استام, ءتىپتى, بۇدان دا كوپ, 500 ميلليون دوللاردان اسا قارجى بولىنەدى. بۇل – قازاقستان ءۇشىن قوماقتى اقشا. الايدا عىلىمدى قارجىلاندىرۋدىڭ ناقتى ناتيجەسىن ازىرگە كورە الماي وتىرمىز. باس پروكۋراتۋرا سالالىق مينيسترلىكتە جانە عىلىم قورىندا كوپتەگەن ءارى اۋقىمدى قارجىلىق زاڭبۇزۋشىلىقتارعا جول بەرىلگەنىن اشكەرەلەدى. نەلىكتەن وسىلاي بولعانىن تاپ باسىپ ايتۋ قيىن. گرانت الۋشىلاردى اككرەديتتەۋدەن باستاپ قارجىلاندىرۋ ۇدەرىسىنىڭ بارلىق كەزەڭىندە كەمشىلىكتەر كوزگە كورىنىپ تۇر. مەنىڭ تۇسىنىگىمدە, عىلىم مەن جەمقورلىق ءبىر بىرىنە كەرەعار قۇبىلىس, ەكەۋى قاتار اتالماۋعا ءتيىس. مەملەكەت قارجىسىن جىمقىرعىسى كەلەتىن كەز كەلگەن ارەكەتكە توسقاۋىل قوياتىن سۇزگى نە كەدەرگى جوق», دەدى مەملەكەت باسشىسى.
توقاەۆ: عىلىمي ازىرلەمەلەردەن اۋىز تولتىرىپ ايتارلىق ەكونوميكالىق اسەر ازىرگە جوق
قاسىم-جومارت توقاەۆتىڭ ايتۋىنشا, عىلىمي ۇدەرىستى دامىتۋ تۇجىرىمداماسى قالىپتاسپاعان.
«عىلىمي ۇدەرىستى دامىتۋدىڭ تۇجىرىمدى كوزقاراسى قالىپتاسپاعان. «ايتەۋىر قاراجاتتى قالايدا يگەرسەك بولدى» دەگەن ۇستانىم تامىر جايعان. عىلىمي جۇمىستىڭ ناقتى پايداسى, جاڭاشىلدىعى قانداي؟ وعان ەشكىم باس قاتىرمايدى. بۇعان قوسا, ساراپتاما ۇزاققا سوزىلادى. جوبالار ۋاقتىلى ىسكە اسپايدى. ۇكىمەت اتالعان ماسەلەلەردى ەگجەي-تەگجەيلى تەكسەرىپ, جاعدايدى تۇزەۋ ءۇشىن شۇعىل شارالار قابىلداۋى قاجەت», دەدى پرەزيدەنت.
پرەزيدەنت: تسيفرلاندىرۋ مەن جاساندى ينتەللەكتىنىڭ دامۋىنا باسا ءمان بەرۋىمىز كەرەك
