ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك جاڭا قارجىلاندىرۋ قۇرالدارىن ەنگىزۋ جونىندەگى باستامالاردى تانىستىردى. جاڭا مودەلگە سايكەس, مەملەكەتتىك ءبىلىم بەرۋ تاپسىرىسىن ءبولۋ ەكونوميكانىڭ ناقتى سۇرانىسىنا باعىتتالادى. ياعني كادر دايارلاۋ ەڭبەك نارىعىنىڭ قاجەتتىلىگىمەن تىعىز بايلانىستىرىلادى.
كەلەسى جىلدان باستاپ جوعارى وقۋ ورىندارىنىڭ قىزمەتىن باعالايتىن ۇلتتىق رەيتينگ ەنگىزىلەدى. بۇل جۇيە وبەكتيۆتى كورسەتكىشتەر مەن ناقتى ينديكاتورلارعا سۇيەنەدى. رەيتينگ ناتيجەلەرى مەملەكەتتىك تاپسىرىستى ورنالاستىرۋ كەزىندە نەگىزگى ولشەمدەردىڭ ءبىرى بولماق.
سونىمەن قاتار ەلىمىزدە «عىلىم جانە ءبىلىم ەنداۋمەنت-قورى» مەملەكەتتىك تىركەۋدەن ءوتتى. بۇل قور جوعارى وقۋ ورىندارىن قارجىلاندىرۋدىڭ جاڭا تەتىگى رەتىندە عىلىم مەن ءبىلىم سالاسىنا قوسىمشا ينۆەستيتسيا تارتۋعا جول اشادى.
ءمينيستردىڭ ايتۋىنشا, جاڭا مودەل كەزەڭ-كەزەڭىمەن ىسكە اسادى جانە ونىڭ باستى ماقساتى – كادر دايارلاۋ ساپاسىن ارتتىرۋ.
«مەملەكەت باسشىسى جوعارى ءبىلىمدى قارجىلاندىرۋدىڭ جاڭا مودەلىن كەزەڭ-كەزەڭىمەن ەنگىزۋ تۋرالى زاڭعا قول قويدى. مودەل كادرلاردى دايارلاۋ ساپاسىن ارتتىرۋعا جانە باسەكەگە قابىلەتتى جوعارى وقۋ ورىندارىن قالىپتاستىرۋعا باعىتتالعان. رەيتينگ ناتيجەلەرى كادرلاردى دايارلاۋعا مەملەكەتتىك ءبىلىم بەرۋ تاپسىرىسىن ورنالاستىرۋ ءۇشىن جوعارى وقۋ ورىندارىن انىقتاۋ كەزىندە ەسكەرىلەدى. رەيتينگتىك كورسەتكىشتەرى جاقسى جوعارى وقۋ ورىندارىنا قوسىمشا اكادەميالىق دەربەستىك بەرىلەدى», دەدى ساياسات نۇربەك.
جالپى, قولعا الىنعان وزگەرىستەر جوعارى ءبىلىم بەرۋ جۇيەسىن جاڭا ساپالىق دەڭگەيگە كوتەرىپ, ۋنيۆەرسيتەتتەردىڭ دەربەستىگىن ارتتىرۋعا, سونداي-اق عىلىم مەن ءبىلىمنىڭ بايلانىسىن كۇشەيتۋگە مۇمكىندىك بەرمەك.
قازاقستانداعى 5 جوو الەمنىڭ ۇزدىك ۋنيۆەرسيتەتتەرىنىڭ تىزىمىنە ەندى
