ەۋرازيالىق ينتەگراتسيا ينستيتۋتىنىڭ دەپارتامەنت باسشىسى ارمان ەشمۇراتوۆتىڭ ايتۋىنشا, داۋىس بەرۋ كۇنى ەلدىڭ كوپتەگەن وڭىرىندە مەرەكەلىك كوڭىل كۇي بايقالدى. جارمەڭكەلەر ۇيىمداستىرىلىپ, كونتسەرتتەر ءوتتى, ءتۇرلى اكتسيالار وتكىزىلدى. تانىمال تۇلعالاردىڭ قاتىسۋى دا حالىقتىڭ بەلسەندىلىگىن ارتتىردى. سونىڭ ناتيجەسىندە رەفەرەندۋم تەك ساياسي ناۋقان ەمەس, ەلدى بىرىكتىرگەن ماڭىزدى وقيعاعا اينالدى.
الدىن الا جۇرگىزىلگەن ءتۇسىندىرۋ جۇمىستارى دا ءوز ناتيجەسىن بەردى. كوپشىلىك بۇل جولعى داۋىس بەرۋدى جاي ءراسىم رەتىندە ەمەس, ەلدىڭ ەرتەڭىنە اسەر ەتەتىن ناقتى مۇمكىندىك رەتىندە قابىلدادى.
ارمان ەشمۇراتوۆ داۋىس بەرۋ پروتسەسى دە تىنىش ءارى رەتىمەن وتكەنىن اتاپ ءوتتى. ۋچاسكەلەردە ەلەۋلى زاڭ بۇزۋشىلىقتار تىركەلمەدى. بۇل حالىقتىڭ ناتيجەگە دەگەن سەنىمىن كۇشەيتتى.
گرۋزيا ديپلوماتى: قازاقستاندا وتكەن رەفەرەندۋم حالىقارالىق تاجىريبەگە تولىق سايكەس كەلەدى
حالىقارالىق بايقاۋشىلار دا رەفەرەندۋمنىڭ اشىق ءارى ءادىل وتكەنىن اتاپ ءوتتى. مۇنداي باعا ەل ىشىندەگى سەنىمدى ودان ءارى ارتتىرا ءتۇستى.
جالپى, جاڭا كونستيتۋتسيا قوعامداعى سۇرانىسقا جاۋاپ بەرگەن قۇجات رەتىندە قابىلداندى. ءبىر جاعىنان, ازاماتتاردىڭ قۇقىقتارى كەڭەيىپ, ولاردىڭ ەل باسقارۋ ىسىنە قاتىسۋ مۇمكىندىگى ارتسا, ەكىنشى جاعىنان, مەملەكەتتەگى تۇراقتىلىق پەن ءتارتىپ ساقتالۋعا ءتيىس.
سوندىقتان 2026 جىلعى 15 ناۋرىزداعى رەفەرەندۋم ەل تاريحىندا ماڭىزدى كۇندەردىڭ ءبىرى رەتىندە قالماق. بۇل – قازاقستاننىڭ جاڭارىپ, العا قادام باسقان ءساتى.
