كوكشەتاۋ قالاسىنداعى وبلىستىق كوپسالالى اۋرۋحانادا قازىر ءۇش ناۋقاس ەم قابىلداپ جاتىر. ولاردىڭ ەكەۋى جانساقتاۋ بولىمىندە اۋىر جاعدايدا, ال تاعى بىرەۋى تراۆماتولوگيا بولىمىندە كومبۋستيولوگ دارىگەرلەردىڭ باقىلاۋىندا. بۇعان دەيىن زارداپ شەككەندەردىڭ ءبىرى ۇيىنە شىعارىلعان.
العاشقى كۇندەرى بەس ادام سانيتارلىق اۆياتسيا ارقىلى ۇلتتىق شۇعىل مەديتسينانى ۇيلەستىرۋ ورتالىعىنا, ياعني استانا قالاسىنا جەتكىزىلگەن.
ششۋچينسكتەگى جارىلىستان قازا تاپقانداردىڭ وتباسىنا 2 ملن تەڭگە بەرىلەدى
ەسكە سالساق, قايعىلى وقيعا 27 اقپانعا قاراعان ءتۇنى ششۋچينسك قالاسىنداعى «پالاۋ ورتالىعى» ءدامحاناسىندا بولعان. كوپقاباتتى تۇرعىن ۇيگە جاپسارلاس ورنالاسقان نىساندا گاز جارىلىپ, ارتىنشا ءورت شىققان.
قايعىلى جاعداي سالدارىنان وقيعا بولعان كۇنى جەتى ادام قازا تاپتى – ولاردىڭ التاۋى ءدامحانا قىزمەتكەرلەرى, سونداي-اق قىزمەتكەرلەردىڭ ءبىرىنىڭ 16 جاستاعى قىزى بولعان. كەيىن جاراقات العانداردىڭ اراسىنان 3 ناۋرىزدا ەكى ادام, 9 ناۋرىزدا تاعى ەكى ناۋقاس كوز جۇمدى. وسىلايشا, قۇرباندار سانى 11 ادامعا جەتتى.
وقيعادان كەيىن قۇقىق قورعاۋ ورگاندارى قىلمىستىق ءىس قوزعاپ, ءدامحانا يەسىن ۇستادى. سوت شەشىمىمەن ول ەكى ايعا قاماۋعا الىندى.
