ەراليەۆ اۋىلىنىڭ جاسى ۇلكەن اناسى اماندىق بولسا, بيىل توقسان التىعا تولادى. ەڭبەكپەن ەسەيىپ, بەينەتپەن بەرەكەسى ارتقان ەل اناسى – كەمەل اۋلەتىنىڭ كەمەڭگەرىندەي.
تاعدىر ونى تەكتى اۋلەتكە كەلىن قىلدى. جولداسى كەمەل قاراتاەۆ – اتى اڭىزعا اينالعان ەرۋباي ءبيدىڭ نەمەرەسى. الايدا «بي-بولىستىڭ تۇقىمى» دەگەن جالامەن قۋعىن كورىپ, وڭتۇستىككە اۋعان كوشتىڭ قۇرامىندا بولدى. شىمكەنتتەگى اششىساي پوليمەتالل كومبيناتىندا ەڭبەك ەتكەن كەمەل قاراتاي ۇلى سول جەردە تىنىشتىق جۇمابەكقىزىمەن تابىسىپ, شاڭىراق كوتەرەدى.
ءسويتىپ, 1948 جىلى ەلگە – ارقاعا ورالىپ, ۇجىمشار جۇمىسىنا ارالاستى. كەلگەن جىلى-اق جەكە وتارمەن قوي باعۋعا شىقتى. سول ساتتەن باستاپ تىنىشتىق انا ەرىنىڭ سەنىمدى سەرىگىنە اينالدى. قوي سوڭىندا ءجۇرىپ, ۇرپاق ءوسىرىپ, شاڭىراقتىڭ شىراعىن جاقتى. تىنىشتىق انا زەينەتكە شىققانشا اۋىل شارۋاشىلىعىنىڭ وركەندەۋىنە ۇلەس قوستى. ۇزاق جىلعى ەڭبەگى مەملەكەت تاراپىنان باعالانىپ, بىرنەشە ماراپات پەن توسبەلگىگە يە بولدى.
زاماننىڭ زوبالاڭى كەمەل اتانى ءبىر اۋلەتتىڭ جالعىز تۇياعى ەتىپ قالدىرعان ەدى. تاعدىر ءۇزىلىپ كەتە جازداعان تەكتىنىڭ تۇقىمىنا تىنىشتىق انانى جولىقتىردى. التىن قۇرساقتى انا ون التى بالانى ومىرگە اكەلدى. بۇگىندە سول ۇل-قىزدارىنان 45 نەمەرە, 118 شوبەرە, 1 شوپشەك تاراپ, ءبىر اۋلەت تامىرىن تەرەڭگە جايىپ وتىر. ءبىر كەزدە ۇزىلۋگە شاق تۇرعان كەمەل اۋلەتى بۇگىندە الىپ بايتەرەكتەي بوي تۇزەدى. سول بايتەرەكتىڭ تامىرىندا – تىنىشتىق انانىڭ اق ءسۇتى, ماڭداي تەرى مەن انالىق مەيىرىمى بار.
ول بالالارىمەن قوسا, باۋىرىندا وسكەن نەمەرەلەرىنە دە ەنشى ۇلەستىرىپ, جەكە وتاۋ ەتىپ شىعاردى. عاسىر انا – ءالى دە كۇيلى-قۋاتتى. اۋلەتتىڭ توي-قۋانىشى, باسقا دا شارۋالارى ادۋىندى انانىڭ اقىلىنسىز شەشىلمەيدى.
بۇگىندە توقسان بەسىنشى بەلەسىنەن اسسا دا, نەمەرە-شوبەرەلەرىنىڭ اتىنان جاڭىلمايتىن كورىنەدى. نەمەرە-شوبەرەلەرىن «كەمەلىمنىڭ ۇرپاقتارى عوي», دەپ اينالىپ-تولعانىپ وتىرادى. جاقىندا عاسىر انا شوپشەگىنىڭ دە قولىنان سۋ ءىشىپ, مەيىرىمى قاندى.
اق جاۋلىقتى انانىڭ اق باتاسى – ۇرپاعىنا قۋات, شاڭىراعىنا شۋاق. توقسان التىعا كەلسە دە, ساناسى سەرگەك, ءسوزى سالماقتى. ءار كەلگەن قوناقتى جىلى قارسى الىپ, وتكەن كۇندەردىڭ تاعىلىمىنان سىر شەرتەدى.
جاستايىنان بەينەت كورگەن اكە مەن انا بالالارىن وقىتىپ-توقىتتى. ءاز انانىڭ بالالارى, نەمەرە-شوبەرەلەرى مەكتەپتە ساباق بەرەدى. ءبىر جاعىنان بەرەكەلى اۋلەتتى ۇستازدار ۇستاحاناسى دەۋگە دە كەلەدى. كەلىندەرى دە شاكىرت جۇرەگىنە نۇر قۇيىپ ءجۇر.
عاسىر انانىڭ ۇلكەن ۇلى ورازباي كەمەلوۆ ۇزاق جىل اۋىل مەكتەبىن ابىرويمەن باسقارىپ, قازىر زەينەت كورىپ وتىر. ىبىراي التىنسارين اتىنداعى توسبەلگى يەگەرى, وڭىرگە بەلگىلى ارداگەر ۇستاز بۇگىندە اۋىلدىڭ قادىرلى اقساقالىنا اينالدى.
مۇنىمەن قوسا, بالالارى دا, نەمەرەلەرى دە اتا كاسىپكە ادالدىق تانىتىپ, ءبىر-ءبىر شارۋاشىلىقتى دوڭگەلەتىپ وتىر. ءوندىرىس سالاسىندا ءونىمدى ەڭبەك ەتىپ جۇرگەن بالا-شاعاسى دا بار. جاقسىنىڭ جالعاسى بولعان ولار اۋىلعا يىگىلىك سىيلار ىسكە كەلگەندە ايانىپ قالمايدى.
ارداقتى انانىڭ ەڭ ۇلكەن نەمەرەسى قايىربەك ورازباي ۇلى اۋىلعا دەگەن جاناشىرلىعىمەن, ىسكەرلىگىمەن سوڭىنداعى باۋىرلارىنا ۇلگى. وسىدان ءۇش-ءتورت جىل بۇرىن اۋىل جۇرتى ءۇيى اپاتتى دەپ تانىلعان اناعا اسارلاتىپ ءۇي سالىپ بەردى. سونىڭ باسى-قاسىندا قايىربەكتەي ەل اعاسى ءجۇرىپ, اۋىلداعى اعايىننىڭ العىسىن الدى.
تاعى ءبىر مەدەت ەسىمدى نەمەرەسى – ارقاعا بەلگىلى اتبەگى. باپتاعان نەبىر جۇيرىكتەرى تالاي الاماندا توپ جارىپ كەلدى. ارينە, كورەگەندى ۇل اسىل اناسىنىڭ اق باتاسىن الماي, الامانعا بايگە قوسپايدى.
الىپ انانىڭ باۋىرىندا وسكەن قۋانىش جەڭىس ۇلى دا اجەسىنىڭ ءتالىم-تاربيەسىن بويىنا ءسىڭىرىپ, جاسىنان ەڭبەكپەن شىڭدالدى. سودان دا بولار, قاتارىنىڭ الدى. بۇگىنگى كۇنى قۇرىلىس شارۋاسىنا شيراق قۋانىش الاقانداي اۋىلدان فيرما اشىپ, جاستارعا جۇمىس بەرىپ وتىر. اۋىلدا بوي كوتەرىپ جاتقان ءۇي, قورا, نىساندار – قۋانىش قۇرعان بريگادانىڭ ەڭبەگى.
ءبىر قىزىعى, اۋلەت شاڭىراقتارى اۋىلدان الىسقا ۇزامايدى. ەراليەۆ ەلدى مەكەنىنىڭ ءوسىپ-وركەندەۋىنە ەلەۋلى ۇلەس قوسىپ وتىرعان كەمەل اۋلەتى وسىلايشا عاسىر انالارىنىڭ اق تىلەۋىمەن عيبراتتى عۇمىر كەشىپ جاتىر. وسىعان قاراپ, ونەگەلى ۇرپاعىن قۇنداقتاپ وسىرگەن تىنىشتىق انانى ۇلتتى ساقتاعان ۇلى انالاردىڭ جالعاسىنداي دەسەك, ءبىزدىڭ ارتىق ايتپاعانىمىز شىعار.
ۇلىتاۋ وبلىسى,
جاڭاارقا اۋدانى,
ەراليەۆ اۋىلى
