العاشقىلاردىڭ ءبىرى بولىپ №35 رەفەرەندۋم ۋچاسكەسىنە كەلگەن ءوڭىر باسشىسى ەربول قاراشوكەەۆ بۇل ساياسي ناۋقاننىڭ ەل ەرتەڭى ءۇشىن ماڭىزدى ەكەنىن اتاپ ءوتتى. وبلىس ورتالىعى تاراز قالاسى مەن ون اۋداندا دا رەفەرەندۋم ۋچاسكەلەرىنە اعىلعان جۇرت از بولعان جوق. ولاردىڭ دەنى تۇسكە دەيىن تاڭداۋ جاساپ ۇلگەردى. تاراز شاھارىنداعى ۋچاسكەلەردە ۇلىستىڭ ۇلى كۇنىنە وراي ۇلتتىق ويىنداردان جارىستار ۇيىمداستىرىلىپ, قازاقى ءداستۇر دارىپتەلدى.
№464 رەفەرەندۋم ۋچاسكەسىنە كەلگەن ءجۇزۋ سپورتىنان ريو-دە-جانەيرو پاراليمپياداسىنىڭ چەمپيونى ءزۇلفيا عابيدۋللينا تاعدىرشەشتى ساياسي ناۋقانعا قاتىسۋ ءار ازاماتتىڭ بورىشى ەكەنىن اتاپ ءوتتى.
«جىلدار جىلىستاعان سايىن ۋاقىت جاڭاشىلدىقتى تالاپ ەتەتىنى بارشامىزعا بەلگىلى. سول تۇرعىدان الىپ قاراعاندا, اتا زاڭعا دا وزگەرىستەر ەنگىزىلىپ جاتقانى زاڭدىلىق. بۇل ءۇردىس الەمنىڭ كوپتەگەن دامىعان مەملەكەتىندە دە بار ەكەنىن بىلەمىز. ەل ەرتەڭى ءۇشىن ماڭىزى زور مۇنداي ناۋقاندا ءار ادام ءوز تاڭداۋىن جاساۋعا ءتيىس. سول ءۇشىن دە ۋچاسكەگە ەرتەرەك كەلىپ, ازاماتتىق بورىشىمدى وتەدىم. تاۋەلسىز ەلىمىزدىڭ ەرتەڭى جارقىن بولسىن. ەل دامۋى ءۇشىن اتقارىلىپ جاتقان ءار قادام ءساتتى بولعاي», دەدى ەل ماقتانىشى.
تارازدىق 101 جاسار كەيۋانا رازيا ءادىلوۆانىڭ ءوتىنىشى نەگىزىندە قالاداعى №42 رەفەرەندۋم ۋچاسكەسىنىڭ كوميسسيا مۇشەلەرى ۇيىنە ارنايى باردى. ءوز تاڭداۋىن جاساعان اقجاۋلىقتى اجە ەل بولاشاعى ءۇشىن اتقارىلىپ جاتقان جۇمىس ساتىمەن جالعاسۋىنا تىلەكتەستىگىن ءبىلدىرىپ, اق باتاسىن بەردى.
رەسپۋبليكالىق رەفەرەندۋمعا قاتىسقان قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتىنىڭ رەكتورى كامشات ءتۇسىپوۆانىڭ ايتۋىنشا, اتا زاڭنىڭ جاڭا جوباسىندا عىلىم جانە ءبىلىم سالالارىن دامىتۋعا ايرىقشا باسىمدىق بەرىلگەن. «ساياسي قۇجاتتا ءبىلىم مەن عىلىم سالالارىن وركەندەتۋ, جاڭا بيىككە كوتەرىلۋىنە باسىمدىق بەرۋ ماسەلەسى كەڭىنەن قامتىلعانى كوڭىل قۋانتادى. بۇل – جاي ۇران نەمەسە دەكلاراتيۆتى قۇجات ەمەس, مەملەكەت دامۋىنىڭ قۇقىقتىق نەگىزىن قالىپتاستىراتىن ستراتەگيالىق باعىت», دەيدى ول.
بۇل كۇنى دزيۋدو كۇرەسىنەن وليمپيادا چەمپيونى ەلدوس سمەتوۆ, «قازاقستان بارىسى» جوباسىنىڭ جەڭىمپازى عالىمجان قىرىقباي, گرەك-ريم كۇرەسىنەن ازيا چەمپيونى ەرجەت جارىلقاسىنوۆ, بوكستان ازيا چەمپيونى ولجاس ساتتىباەۆ باستاعان وزگە دە ءوڭىردىڭ بەتكەۇستار سپورتشىلارى رەفەرەندۋم ۋچاسكەسىنە كەلىپ, ءوز تاڭداۋىن جاسادى.
وبلىستىق اۋماقتىق رەفەرەندۋم كوميسسياسىنىڭ توراعاسى سەرعالي ايداپكەلوۆتىڭ ايتۋىنشا, ساياسي ناۋقانعا دايىندىق جۇمىسى جان-جاقتى جۇرگىزىلگەندىكتەن, 513 ۋچاسكەنىڭ بارلىعىندا رەفەرەندۋم زاڭعا سايكەس وتكەن.
جامبىل وبلىسى
