تجم توتەنشە جاعدايلاردىڭ اۋقىمىن جەدەل باعالاۋعا جانە قۇتقارۋشىلاردىڭ ءىس-قيمىلدارىن ۇيلەستىرۋگە مۇمكىندىك بەرە وتىرىپ, ۇۇا تابيعي ءورت وشاقتارىن, مۇزداق كولدەردى, سۋ باسۋ ايماقتارىن جانە باسقا دا توتەنشە جاعدايلاردى اۋەدەن ۆيزۋالدى باقىلاۋ كەزىندە ۇلكەن كومەك كورسەتەتىن ايتتى. سونىمەن قاتار اپپاراتتار گيدروتەحنيكالىق قۇرىلىستاردىڭ, ورمان القاپتارىنىڭ جانە ىقتيمال قاۋىپتى ۋچاسكەلەردىڭ جاي-كۇيىن پروفيلاكتيكالىق باقىلاۋ ءۇشىن پايدالانىلادى. ولارعا ورناتىلعان داۋىس زورايتقىشتاردىڭ كومەگىمەن حالىقتى قۇلاقتاندىرۋ جۇمىستارى دا جۇرگىزىلەدى.
جاساندى ينتەللەكتتى وپتيكالىق جانە تەلەديدارلىق جابدىقتارمەن بىرگە پايدالانۋ بيىكتىكتە جانە ەداۋىر الىس جەردە وبەكتىلەردى: ادام كوزىنە كورىنبەيتىن جەردەگى ادامداردى, كولىك قۇرالدارىن, كەمەلەردى انىقتاۋعا جانە باقىلاۋعا, سونداي-اق وقيعا ورنىندا تىكەلەي جەرگىلىكتى جەردىڭ كارتالارىن جاساۋعا مۇمكىندىك بەرەدى.
بۇگىنگى كۇنى تجم يەلىگىندە 218 ۇشقىشسىز ۇشۋ اپپاراتى بار, ونىڭ ىشىندە 153 ۇۇا جاساندى ينتەللەكت فۋنكتسيالارىمەن جاراقتالعان. 2025 جىلى جانە 2026 جىلدىڭ وتكەن كەزەڭىندە تجم بولىمشەلەرى ۇۇا قولدانۋ ارقىلى 3000-نان استام وپەراتسيا جۇرگىزىپ, ولاردىڭ بارىسىندا 46 ادام قۇتقارىلدى.
تجم زاماناۋي تەحنولوگيالاردى قولدانا وتىرىپ, وپەراتوردىڭ قاتىسۋىنسىز اۆتونومدى رەجيمدە ۇشا الاتىن ۇۇا بەلسەندى قولدانا وتىرىپ, ۇۇا پاركىن كەڭەيتۋدى جالعاستىرۋدا. قازىرگى ۋاقىتتا ەلدى مەكەندەردىڭ اۋماعىندا, سونداي-اق «شىمبۇلاق» تاۋ-شاڭعى كۋرورتىندا ورنالاسقان وسىنداي 75 اپپارات پايدالانىلۋدا. ولاردىڭ جەدەل جاعدايعا تۇراقتى مونيتورينگتى قامتاماسىز ەتە وتىرىپ, بەرەتىن بەينە دەرەكتەرى 24/7 رەجيمىندە تجم بولىمشەلەرىنىڭ جەدەل باسقارۋ ورتالىقتارىنا كەلىپ تۇسەدى.
