جەرگىلىكتى تۇرعىنداردىڭ ايتۋىنشا, كۇدىك تۋدىرعان سومكە بىرنەشە كۇن بويى قوقىس اراسىندا جاتقان. سومكەدەن قولقانى قاباتىن ءيىس شىققاندىقتان, وعان ەشكىم جاقىنداي الماعان.
سول ماڭدا اۋلا سىپىرۋشى بولىپ جۇمىس ىستەيتىن بولات جۇماعاليەۆ بۇل سومكەنى بۇرىننان كورگەنىن ايتادى.
«ول سومكە وسىندا كەشە عانا جاتتى. قاتتى ساسىق ءيىس شىقتى. ابدەن ءشىرىپ كەتكەن سياقتى. ايەلىم ەكەۋمىز وسى ماڭدا تۇرامىز, وسىندا اۋلا سىپىرۋشىمىز. ىشىنە قاراعىم كەلگەن, بىراق يىستەن جاقىنداي المادىم. ءشىرىپ كەتكەن ەت شىعار دەپ ويلادىم. كەشە مۇندا پوليتسيا كەلىپ, ەشكىمدى جاقىنداتپادى. سويتسەك, سومكەنىڭ ىشىندە ادامنىڭ ءمايىتى بولىپ شىقتى», دەدى ول.
سومكەنىڭ قوقىس جاشىكتەرىنىڭ جانىندا قانشا ۋاقىت جاتقانىن ناقتى ەشكىم ايتا المايدى.
اقتوبە وبلىستىق پوليتسيا دەپارتامەنتى بۇل دەرەكتى راستادى. قۇقىق قورعاۋ ورگاندارىنىڭ مالىمەتىنشە, سومكەنىڭ ىشىندە 55 جاستاعى ەر ادامنىڭ ءمايىتى بولعان.
ۆەدومستۆو ازىرگە وقيعاعا قاتىستى تولىق اقپارات جاريالامادى. پوليتسيا تۇرعىنداردى ءتۇرلى قاۋەسەت تاراتپاۋعا شاقىرىپ وتىر.
ء«مايىتتىڭ تابىلۋىنا بايلانىستى قىلمىستىق ءىس قوزعالدى. قاجەتتى تەرگەۋ جانە جەدەل-ىزدەستىرۋ شارالارى جۇرگىزىلىپ جاتىر», دەپ حابارلادى اقتوبە وبلىسى پوليتسيا دەپارتامەنتى.
قازىرگى ۋاقىتتا ادامنىڭ قازا تابۋ سەبەپتەرى مەن وقيعانىڭ ءمان-جايى انىقتالىپ جاتىر.
