بۇدان بولەك, شوۋ بارىسىندا ۇلتتىق قۇندىلىقتاردى ايشىقتايتىن, قازاق حالقى ءۇشىن بەرەكە مەن بىرلىكتىڭ بەلگىسى سانالاتىن شاڭىراق بەينەسى, كوكتەم مەن جاڭارۋدىڭ نىشانى – قىزعالداق گ ۇلى مەن «Digital Nauryz», «ناۋرىز قۇتتى بولسىن!» دەگەن مەرەكەلىك جازۋ بەينەلەندى. سونىمەن بىرگە «قازاقستان», «الماتى وبلىسى» دەگەن جازۋلار دا پايدا بولدى. بۇل ءوڭىردىڭ ەل دامۋىنداعى ورنى مەن ماڭىزىن بىلدىرەتىن سيمۆولدىق كورىنىسكە اينالدى.
شوۋ بارىسىندا ەل ومىرىندەگى ماڭىزدى ساياسي وقيعاعا ارنالعان كومپوزيتسيالار دا ۇسىنىلدى. اسپاندا «15 ناۋرىز – رەفەرەندۋم» جانە «جاڭا كونستيتۋتسيا» دەگەن جازۋلار پايدا بولىپ, الداعى رەسپۋبليكالىق رەفەرەندۋمنىڭ ءمانى مەن ماڭىزىن جەتكىزدى. سونىمەن قاتار داۋىس بەرۋ بەلگىسى بەينەلەنىپ, ازاماتتىق جاۋاپكەرشىلىك پەن ءاربىر ازاماتتىڭ ءوز تاڭداۋىن جاساۋ قۇقىعى سيمۆولدىق تۇردە كورسەتىلدى.
درون-شوۋدى تاماشالاۋعا 5 000-نان استام كورەرمەن جينالدى, ولاردىڭ قاتارىندا الماتى وبلىسى اكىمىنىڭ ورىنباسارى عاني مايلىباەۆ, كواليتسيا مۇشەلەرى, زيالى قاۋىم وكىلدەرى دە بولدى. جينالعان كوپشىلىك الدىندا الماتى وبلىستىق ارداگەرلەر كەڭەسىنىڭ توراعاسى ەربولات تۇرىمبەتوۆ پەن الماتى وبلىستىق قوعامدىق كەڭەسىنىڭ توراعاسى قازىبەك داۋتاليەۆ ءسوز سويلەپ, وبلىس حالقىن رەفەرەندۋمعا بەلسەندى قاتىسۋعا شاقىردى.
«15 ناۋرىز كۇنى ءار ازامات ءوز تاڭداۋىن جاسايدى. بۇل – جاستاردىڭ كونستيتۋتسياسى. ويتكەنى وندا جاستاردىڭ دامۋىنا, تۇلعا رەتىندە قالىپتاسۋىنا جانە ەل ەكونوميكاسىنىڭ ىلگەرىلەۋىنە باسىمدىق بەرىلگەن. ارقايسىمىز ءوز داۋىسىمىزدى بەرىپ, رەفەرەندۋمعا قاتىسايىق», دەدى ەربولات تۇرىمبەتوۆ.
قازىبەك داۋتاليەۆ ءوز سوزىندە قازىرگى كونستيتۋتسيانىڭ ەل دامۋىنا 30 جىل قىزمەت ەتكەنىن اتاپ ءوتىپ, جاڭا قۇجاتتىڭ ماڭىزدىلىعىنا توقتالدى.
«قازاقستاننىڭ قولدانىستاعى كونستيتۋتسياسى حالىققا 30 جىل قىزمەت ەتتى. بۇگىن ءبىز ەگەمەن ەل رەتىندە جاڭا ماڭىزدى قۇجاتتى قابىلداۋ مۇمكىندىگىنە يە بولىپ وتىرمىز. جاڭا كونستيتۋتسيا جوباسىندا ەڭبەك قۇقىق رەتىندە بەلگىلەنگەن. ياعني حالىقتى جۇمىسپەن قامتۋ – مەملەكەتتىڭ ماڭىزدى مىندەتتەرىنىڭ ءبىرى», دەدى ول.
درون-شوۋدان كەيىن كەش كونتسەرتتىك باعدارلامامەن جالعاستى. شارا بارىسىندا قالا تۇرعىندارىنا رەسپۋبليكالىق رەفەرەندۋم تۋرالى اقپاراتتىق بروشيۋرالار تاراتىلدى.
الماتى وبلىسى
