فوتو: gov.kz
«بارلىق دەڭگەيدەگى رەفەرەندۋم كوميسسيالارى دايىندىق جۇمىستارىن اياقتادى. قاجەتتى ۇيىمداستىرۋشىلىق ءىس-شارالار جۇرگىزىلدى, كوميسسيالاردىڭ قىزمەتىنە ادىستەمەلىك قولداۋ قامتاماسىز ەتىلدى, داۋىس بەرۋ راسىمدەرىن قولدانۋ مەن رەفەرەندۋم تۋرالى زاڭ تالاپتارىن ساقتاۋدا بىرىڭعاي ءتاسىل قالىپتاستىرىلدى. بۇل ءبىزدىڭ رەسپۋبليكالىق رەفەرەندۋمدى وتكىزۋگە جانە ونى زاڭ تالاپتارىنا قاتاڭ سايكەس ۇيىمداستىرۋعا تولىق دايىن ەكەنىمىزدى ايتۋعا مۇمكىندىك بەرەدى», دەدى نۇرلان ءابدىروۆ.
دايىندىقتىڭ نەگىزگى باعىتتارىنىڭ ءبىرى كوميسسيا مۇشەلەرىن وقىتۋ بولدى. كۇنتىزبەلىك جوسپارعا سايكەس, 13 ناۋرىزدا وقىتۋدىڭ قورىتىندى كەزەڭى اياقتالدى. جەدەل اقپاراتقا سايكەس دايىندىق بارىسىندا 5 800-دەن استام وقىتۋ سەمينارى وتكىزىلىپ, وعان ءارتۇرلى دەڭگەيدەگى كوميسسيالاردىڭ 71 مىڭنان استام مۇشەسى قاتىستى. دايىندىق دەڭگەيىن قوسىمشاباعالاۋ ماقساتىندا قاشىقتان ونلاين-تەستىلەۋ ۇيىمداستىرىلدى.
ناۋرىزناما ونكۇندىگى اياسىندا «رەفەرەندۋم – 2026» اتتى ونلاين مارافون وتەدى
ورك توراعاسىنىڭ ايتۋىنشا, ىسكە اسىرىلعان كاسكادتىق وقىتۋ جۇيەسى ەل بويىنشا كوميسسيا مۇشەلەرىن دايارلاۋدىڭ بىرىڭعاي ستاندارتتارىن قامتاماسىز ەتۋگە مۇمكىندىك بەردى.
رەفەرەندۋمعا دايىندىق اياسىندا زاڭنامادا كوزدەلگەن بايقاۋ جۇرگىزۋگە قاجەتتى جاعدايلار قامتاماسىز ەتىلدى. رەفەرەندۋم ۋچاسكەلەرىندە بولۋعا قۇقىعى بار وكىلدەرى قاتىسا الاتىن قوعامدىق بىرلەستىكتەر مەن كوممەرتسيالىق ەمەس ۇيىمداردى اككرەديتتەۋ جۇرگىزىلدى. بۇگىنگى تاڭدا 256 ۇيىم اككرەديتتەلدى, ونىڭ ىشىندە 11-ءىن ورتالىق رەفەرەندۋم كوميسسياسى, ال 245-ءىن اۋماقتىق كوميسسيالار اككرەديتتەدى.
رەفەرەندۋم قارساڭىندا تاۋەلسىز باقىلاۋشىلاردىڭ اقپاراتتىق شتابى جۇمىس ىستەيدى
وتىرىس سوڭىندا داۋىس بەرۋ كۇنى ورتالىق رەفەرەندۋم كوميسسياسى ءداستۇرلى تۇردە تىكەلەي ەفيردە بۇقارالىق اقپارات قۇرالدارىنا ەل بويىنشا داۋىس بەرۋ بارىسى تۋرالى ءار ەكى ساعات سايىن اقپارات بەرىپ وتىراتىنى اتاپ ءوتىلدى. اقپارات بەرىلەتىن ناقتى ۋاقىت الدىن الا جاريالانادى.
