WTA رەيتينگىنىڭ جاڭارتىلىپ جاتقان دەرەكتەرىنە سايكەس, قازاقستاندىق سپورتشى ۇپاي سانى بويىنشا پولشا تەننيسشىسى يگا شۆيونتەكتى باسىپ وزدى. پولشا وكىلى ينديان-ۋەللس ءتۋرنيرىنىڭ شيرەك فينالىندا جارىس جولىنان شىعىپ قالعان.
جارتىلاي فينالدا رىباكينا فينال جولداماسى ءۇشىن ۋكراينالىق تەننيسشى ەلينا سۆيتولينامەن كەزدەسەدى. ەگەر بۇل ماتچتا جەڭىسكە جەتسە, وتانداسىمىز WTA رەيتينگىندەگى شۆيونتەكتەن ۇپاي ايىرماسىن ودان ءارى ۇلعايتۋى مۇمكىن.
ايتا كەتەيىك, شيرەك فينالدىق كەزدەسۋدە ەلەنا رىباكينا امەريكالىق تەننيسشى دجەسسيكا پەگۋلانى ەكى سەتتە – 6:1, 7:6 (7:4) ەسەبىمەن جەڭدى.
قازاقستان تەننيس فەدەراتسياسىنىڭ حابارلاۋىنشا, بيىلعى ماۋسىمداعى ەلەنا رىباكينانىڭ باستى ماقساتى – الەمنىڭ ءبىرىنشى راكەتكاسى اتاعى ءۇشىن كۇرەسۋ. وسى ستراتەگيالىق ماقساتقا باسىمدىق بەرىلگەندىكتەن, تەننيسشى الداعى Billie Jean King Cup ءتۋرنيرىنىڭ ىرىكتەۋ كەزەڭىنە قازاقستان ايەلدەر قۇراماسىنىڭ رەسمي تىزىمىنە ەنگىزىلمەگەن.
فەدەراتسيا وكىلدەرىنىڭ ايتۋىنشا, تەننيسشىنىڭ WTA رەيتينگىندە كوش باستاۋ مۇمكىندىگى ەل سپورتى ءۇشىن تاريحي جەتىستىك بولماق. سوندىقتان بارلىق كۇش وسى ماقساتقا جەتۋگە باعىتتالىپ وتىر.
ايتا كەتەيىك, قازىر الەمنىڭ ءبىرىنشى راكەتكاسى مارتەبەسىن رەيتينگتىك ۇپاي بويىنشا ايقىن باسىمدىقپەن بەلارۋس تەننيسشىسى ارينا سوبولەنكو ساقتاپ تۇر.
ينديان-ۋەللس ءتۋرنيرى قازاقستاننىڭ تاعى ءبىر وكىلى ءۇشىن دە ءساتتى ءوتىپ جاتىر. جۇپتىق سىندا وتانداسىمىز اننا دانيلينا سەربيالىق تەننيسشى الەكساندرا كرۋنيچپەن بىرگە بەدەلدى ءتۋرنيردىڭ فينالىنا جولداما الدى.
