ناۋرىزناما ونكۇندىگى اياسىندا ۇيىمداستىرىلعان بۇل جوبا تەك اقپارات تاراتۋ الاڭى ەمەس. مارافون قوعامداعى وزەكتى ماسەلەلەردى تالقىلايتىن, جاڭا يدەيالار مەن تەحنولوگيالىق باستامالاردى تانىستىراتىن پىكىر الاڭى رەتىندە جوسپارلانعان. ءىس-شاراعا ساياسي قايراتكەرلەر, قوعامعا تانىمال ازاماتتار, ءوز سالاسىندا تابىسقا جەتكەن ماماندار, ونەر مەن مادەنيەت وكىلدەرى, سونداي-اق ستارتاپ جوبالارىن جۇزەگە اسىرىپ جۇرگەن جاس كاسىپكەرلەر قاتىسىپ, ەل دامۋىنىڭ ماڭىزدى باعىتتارى جونىندە وي بولىسەدى.
قاسىم-جومارت توقاەۆ جاستاردى رەفەرەندۋمعا بەلسەنە قاتىسۋعا شاقىردى
مارافون بارىسىندا كورەرمەندەرگە تەحنولوگيالىق شەشىمدەرگە نەگىزدەلگەن ەرەكشە باعدارلامالار ۇسىنىلادى. وتاندىق ونەرتاپقىشتار جاساعان روبوتتار جۇرگىزۋشىلەرمەن بىرگە ەفيرگە قاتىسىپ, گولوگرامما-شوۋ ارقىلى قازاقستاننىڭ سوڭعى جىلدارداعى جەتىستىكتەرى كورنەكى فورماتتا تانىستىرىلادى.
جوبا اياسىندا بەس ءتۇرلى الاڭ جۇمىس ىستەيدى. ساحنادا قوعام قايراتكەرلەرى, ونەرتاپقىشتار مەن قايىرىمدى ىستەرىمەن تانىلعان ازاماتتار پىكىر الماسادى. سونىمەن قاتار كونتسەرتتىك باعدارلاما ۇيىمداستىرىلىپ, ساراپشىلار مەن قوعام وكىلدەرىنىڭ قاتىسۋىمەن وزەكتى تاقىرىپتارعا ارنالعان پىكىرتالاستار وتەدى. يننوۆاتسيالىق جوبالار مەن وتاندىق ستارتاپتار تانىستىرىلىپ, قوناقتارمەن بليتس-سۇحباتتار جۇرگىزىلەدى. بۇدان بولەك, ەل ايماقتارى مەن شەتەلدەن تىكەلەي قوسىلىمدار ۇيىمداستىرىلادى.
«رەفەرەندۋم – 2026» ونلاين مارافونى رەسپۋبليكالىق جانە ايماقتىق بۇقارالىق اقپارات قۇرالدارىنىڭ رەسمي سايتتارى مەن الەۋمەتتىك جەلىدەگى پاراقشالارىندا تىكەلەي كورسەتىلەدى. جوباعا قاتىستى جەدەل اقپاراتتار مەن جاڭالىقتار «رەفەرەندۋم – 2026» تەلەگرام ارناسىندا تۇراقتى تۇردە جاريالانىپ وتىرادى.
