سۋرەت: gov.kz
كەزدەسۋدە ورك توراعاسى الداعى رەفەرەندۋمعا دايىندىق بارىسى مەن وتكىزۋ ءتارتىبى تۋرالى كەڭىنەن باياندادى. ن.ءابدىروۆ رەفەرەندۋم كوميسسيالارىنىڭ جۇمىسى, ۋچاسكەلەردىڭ ماتەريالدىق-تەحنيكالىق جابدىقتالۋى, ازاماتتاردىڭ رەفەرەندۋمعا قاتىسۋ قۇقىعىن جۇزەگە اسىرۋعا جاسالعان جاعدايلار جانە اقپاراتتىق-ءتۇسىندىرۋ شارالارى جونىندە ايتتى.
«رەفەرەندۋمدى بايقاۋ ءۇشىن 38 مەملەكەت پەن 11 حالىقارالىق ۇيىمنان 359 بايقاۋشى قاتىسادى. حالىقارالىق بايقاۋشىلاردىڭ قاتىسۋى رەفەرەندۋمدى وتكىزۋدىڭ اشىقتىعى مەن جاريالىلىعىن قامتاماسىز ەتۋگە, سونداي-اق داۋىس بەرۋ ۇدەرىسىنىڭ ۇلتتىق زاڭناماعا سايكەس ۇيىمداستىرىلىپ جاتقانىن حالىقارالىق قاۋىمداستىقتىڭ كورۋىنە مۇمكىندىك بەرەدى», دەدى ول.
كەزدەسۋ بارىسىندا تاراپتار جالپىحالىقتىق ناۋقاندى بايقاۋدى ۇيىمداستىرۋدىڭ جەكەلەگەن ماسەلەلەرىن, حالىقارالىق بايقاۋشىلاردىڭ جۇمىسىنا جاسالاتىن جاعدايلاردى جانە ءوزارا ءىس-قيمىل تەتىكتەرىن تالقىلادى. ءوز كەزەگىندە حالىقارالىق ميسسيالاردىڭ باسشىلارى رەفەرەندۋمدى حالىقارالىق بايقاۋ بويىنشا جۇمىس جوسپارلارىمەن ءبولىستى.
