الدىن الا كورسەتىلىمگە سەنات توراعاسى, قازاقستان بوچچا فەدەراتسياسىنىڭ پرەزيدەنتى ماۋلەن اشىمباەۆ باستاعان پالاتا دەپۋتاتتارى قاتىستى. جاڭا تۋىندىدا كاسىبي اكتەرلەرمەن قاتار بوچچامەن اينالىساتىن پاراسپورتشىلار دا ونەر كورسەتەدى. بۇل تۋىندىنىڭ شىنايىلىعى مەن مازمۇنىن ارتتىرا تۇسكەن قادام بولدى.
م.اشىمباەۆ كورەرمەندى جاڭا كارتينانىڭ جارىق كورۋىمەن قۇتتىقتاپ, پاراسپورتشىلاردىڭ ومىرىنە ارنالعان «ەرەكشە» كوركەم ءفيلمى ەلىمىزدە ينكليۋزيۆتى قوعام قالىپتاستىرۋ ۇدەرىسىنە سەرپىن بەرەتىنىنە سەنىم ءبىلدىردى. سونداي-اق ول بۇل ماسەلە مەملەكەت باسشىسىنىڭ باستى نازارىندا ەكەنىنە توقتالدى.
«پرەزيدەنت قاسىم-جومارت توقاەۆ بارشاعا تەڭ مۇمكىندىك بەرەتىن ينكليۋزيۆتى قوعام قۇرۋ ماسەلەسىنە ۇنەمى باسا ءمان بەرىپ كەلەدى. وسى باستامانى ىسكە اسىرۋ اياسىندا مەملەكەت دەڭگەيىندە ءتيىستى جۇمىس قولعا الىنىپ, كەدەرگىلەردى جويۋ جانە مۇگەدەكتىگى بار ادامداردىڭ قۇقىقتارىن قورعاۋ ءۇشىن كەشەندى شارالار قابىلدانىپ جاتىر. بۇگىندە ەلىمىزدە جۇزەگە اسىرىلىپ جاتقان جاڭعىرتۋلار, سونىڭ ىشىندە كونستيتۋتسيالىق رەفورما دا ادىلەتتىلىك, تەڭ مۇمكىندىكتەر, اشىق ءارى ينكليۋزيۆتى قوعام قاعيداتتارىن نىعايتۋدى كوزدەيدى», دەدى م.اشىمباەۆ.
سونىمەن قاتار سەنات توراعاسى ءفيلمنىڭ ماڭىزى مەن وزەكتىلىگىنە توقتالىپ, ونىڭ قالىپتاسقان قۇندىلىقتاردى جاڭاشا پايىمداۋعا, الەمگە ءار قادامىنىڭ ءوزى ۇلكەن جەڭىسكە اينالاتىن ادامداردىڭ كوزىمەن قاراۋعا مۇمكىندىك بەرەتىنىن ايتتى.
«ينكليۋزيا مادەنيەتى تەك زاڭنامالىق نەگىزبەن قالىپتاسپايدى. ول, ەڭ الدىمەن, شىنايى جاناشىرلىققا, ادامگەرشىلىككە, ءوزارا قولداۋعا تابان تىرەيدى. كينو – وسىنداي قۇندىلىقتاردى دارىپتەۋدىڭ ماڭىزدى تەتىكتەرىنىڭ ءبىرى. «ەرەكشە» ءفيلمى – ەلىمىزدەگى پاراسپورتتى دامىتۋعا, پاراسپورتشىلاردىڭ الەۋەتىن اشۋعا جانە ينكليۋزيا مادەنيەتىن ىلگەرىلەتۋگە قوسىلعان ۇلكەن ۇلەس. بۇل جوبا ونەر مەن جىلى ءازىل ارقىلى ەرەكشە قاجەتتىلىگى بار ادامدارعا قاتىستى ماڭىزدى تاقىرىپتاردى قوزعاۋعا ىقپال ەتەدى. «ەرەكشە» – قايسار مىنەز بەن ەرىك-جىگەر تۋرالى فيلم. بۇل – سەنىم مەن ناقتى ماقسات جولىنداعى قاجىرلى ەڭبەك قوعامداعى ۇلكەن جەڭىستەرگە نەگىز بولاتىنىن كورسەتەتىن اسەرلى وقيعا», دەدى سەنات توراعاسى.
سونداي-اق م.اشىمباەۆ «Kinopark» كينوتەاترلار جەلىسىنىڭ باسشىسى الماز مالدىباەۆقا, فيلم رەجيسسەرى ەرنار نۇرعاليەۆكە, ستسەناري اۆتورى سەرجان سەرىكبايعا, پروديۋسەرلەرگە, اكتەرلىك قۇرام مەن ءتۇسىرىلىم توبىنا اتالعان ماڭىزدى الەۋمەتتىك باستامانى قولعا الىپ, پاراسپورتشىلارعا قولداۋ كورسەتكەنى ءۇشىن العىس ءبىلدىردى.
فيلم تۇسىرىلىمىنە كاسىبي اكتەرلەرمەن قاتار قازاقستان مەن قىرعىزستان بوچچاشىلارى دا قاتىستى. بۇل قادام جارىس اتموسفەراسىن بارىنشا شىنايى جەتكىزۋگە مۇمكىندىك بەردى. باستى رولدەردى جاسۇلان كوپبەرگەن, اقەركە نازاربەكوۆا مەن راسۋل باۋىرجان سومدادى.
كينوكارتينانىڭ سيۋجەتىندە ومىرگە جەڭىل قارايتىن جاس جىگىت ارماننىڭ تاعدىرى سۋرەتتەلەدى. ول ءبىر قاتەلىكتىڭ سالدارىنان سپورت كەشەنىندە قوعامدىق جۇمىس اتقارۋعا ءماجبۇر بولادى. سول جەردە ايگەرىم مەن ونىڭ باۋىرى ديدارمەن تانىسىپ, مۇلدە باسقا الەمگە تاپ بولادى. بۇل جەردە شىنايى كۇش اتاق-داڭق, اقشامەن ەمەس, ءتوزىم, سەنىم, اسقاق رۋحپەن ولشەنەدى.
ايتا كەتەيىك, فيلم قازاقستان بوچچا فەدەراتسياسىنىڭ باستاماسىمەن «Kinopark» كينوتەاترلار جەلىسى مەن «Tiger Films» پروديۋسەرلىك ستۋدياسىنىڭ, باسقا دا سەرىكتەستەردىڭ قولداۋىمەن ءتۇسىرىلدى. جاڭا كارتينانىڭ كينوتەاترلارداعى كورسەتىلىمىنەن تۇسكەن قاراجات مۇگەدەكتىگى بار بالالاردى قولداۋعا جۇمسالادى.
