قۇنانباي كوشەسىندە ورنالاسقان 14 قاباتتى «اباي ەلى» زاماناۋي تۇرعىن ءۇي كەشەنىندە وتكەن سالتاناتتى شاراعا وبلىس اكىمى بەرىك ءۋالي مەن «وتباسى بانك» اق باسقارما ءتورايىمى ءلاززات يبراگيموۆا قاتىستى. كەشەننىڭ ءبىر ەرەكشەلىگى – مۇنداعى ۇيلەرگە اباي, شاكارىم, مۇحتار سىندى ۇلى تۇلعالاردىڭ ەسىمى بەرىلگەن. ايماق باسشىسى تۇرعىنداردىڭ تۇرمىس ساپاسىن ارتتىرۋ – مەملەكەتتىك ساياساتتىڭ باسىمدىعى ەكەنىن اتاپ ءوتتى.
«جىل باسىنان بەرى باسپانامەن قامتۋ جۇمىسى جۇيەلى جالعاسىپ كەلەدى. اقپاندا ۇشاقتار كەنتىندە 26 وتباسىنا كىلت تابىس- تالسا, بۇگىن كوپبالالى وتباسىلار, الەۋمەتتىك وسال توپتار مەن جەتىم بالالار ساناتىنداعى تاعى 50 وتباسى قۋانىشقا كەنەلىپ وتىر. جىل سوڭىنا دەيىن بارلىعى 327 سەمەيلىك باسپانالى بولادى», دەدى ب.ءۋالي.
«وتباسى بانك» اق باسقارما ءتورايىمى ل.يبراگيموۆا وڭىردەگى تۇرعىن ءۇي جيناق جۇيەسىنە سۇرانىس ارتقانىن, قازىر وبلىستىق فيليالدا 80 مىڭنان استام سالىمشى بار ەكەنىن جەتكىزدى.
ساراپشىلاردىڭ پىكىرىنشە, تۇرعىن ءۇي ماسەلەسىن شەشۋ ءوڭىردىڭ دەموگرافيالىق, ەكونوميكالىق تۇراقتىلىعىنا تىكەلەي اسەر ەتەدى. ۇلتتىق ستاتيستيكا بيۋروسىنىڭ مالىمەتىنشە, 2024 جىلدىڭ قورىتىندىسى بو-يىنشا ەلىمىزدە ءبىر تۇرعىنعا شاققانداعى تۇرعىن ءۇي قورى 24 شارشى مەتردەن اسقان. مەملەكەت بۇل كورسەتكىشتى ارتتىرۋ ماقساتىندا الەۋمەتتىك وسال توپتاردى باسپانامەن قامتۋ باعدارلامالارىن كەڭەيتىپ وتىر. سول تۇرعىدا اباي وبلىسىندا دا بىرقاتار اۋقىمدى ءىس اتقارىلىپ جاتىر. بىلتىر سەمەيدىڭ قاراعايلى شاعىن اۋدانىندا جالپى اۋماعى 27 مىڭ شارشى مەتر بولاتىن بەس تۇرعىن ءۇي پايدالانۋعا بەرىلدى. سونىمەن قاتار جىل سوڭىنا دەيىن تاعى ەكى تۇرعىن ءۇيدى ىسكە قوسۋ جوسپارلانىپ وتىر. بيىل الەۋمەتتىك وسال توپتارعا 360 جالدامالى پاتەر ساتىپ الىنىپ, «وتباسى بانك» ارقىلى بەرىلەدى. «اباي جاستارى» باعدارلاماسى اياسىندا 40 پاتەر جاس ماماندارعا ۇسىنىلادى.
تۇرعىن ۇيمەن قامتۋ جۇمىسى تەك وبلىس ورتالىعىندا عانا ەمەس, باسقا قالالاردا دا جالعاسىپ جاتىر. ماسەلەن, وتكەن ايدا كۋرچاتوۆ قالاسىندا 22 وتباسى باسپانالى بولدى. الداعى ۋاقىتتا تاعى 14 پاتەردى بەرۋ جوسپارلانعان. جەكە ينۆەستوردىڭ قارجىسى ەسەبىنەن مەكتەپ كوشەسىندە ورنالاسقان 36 پاتەرلى ءتورت قاباتتى تۇرعىن ءۇي قايتا قالپىنا كەلتىرىلدى. ونىڭ ىشىندە 8 ءبىر بولمەلى, 16 ەكى بولمەلى, 12 ءۇش بولمەلى پاتەر بار.
تۇرعىن ءۇي ماسەلەسى ءبىر كۇندە شەشىلەتىن شارۋا ەمەس. دەگەنمەن جاڭا قونىسقا كىرگەن ءار وتباسىنىڭ شاتتىعى بۇل باعىتتاعى جۇمىستىڭ قوعام ءۇشىن قانشالىقتى ماڭىزدى ەكەنىن ايعاقتاي تۇسەدى.
اباي وبلىسى
