جامبىل وبلىسىنىڭ اكىمى ەربول قاراشوكەەۆ قاتىسۋشىلاردى قۇتتىقتاپ, تاراز ءوڭىرىنىڭ سپورت تاريحىنداعى ەرەكشە ورنىن اتاپ ءوتتى.
«داڭقتى سپورتشى, وليمپيادا چەمپيونى جاقسىلىق ۇشكەمپىروۆ اعامىز باستاعان جامبىل ءوڭىرى كۇرەس شەبەرلەرىنە ءاردايىم باي ەكەنىن دالەلدەپ كەلەدى. وڭىردەن شىققان ساڭلاق سپورتشىلار ەل سپورتىنىڭ تاريحىنا ءوز ەسىمدەرىن التىن ارىپتەرمەن جازدى. بۇل – بۇگىنگى جاس بۋىن ءۇشىن ۇلكەن ونەگە ءارى ماقتانىش. جەتىستىكتەر وڭىردە سپورتتى جۇيەلى دامىتۋعا باعىتتالعان ەڭبەكتىڭ, جاتتىقتىرۋشىلار مەن سپورتشىلاردىڭ تاباندى ىزدەنىسىنىڭ ناتيجەسى. سىزدەرگە جوعارى ناتيجەلەر مەن ءادىل باسەكە تىلەيمىن», دەدى ءوڭىر باسشىسى.
قازاقستان كۇرەس فەدەراتسياسىنىڭ پرەزيدەنتى ەركىن وقاسوۆ چەمپيوناتتىڭ ەلىمىزدەگى كۇرەس سپورتىن دامىتۋداعى ماڭىزىن اتاپ, جاس بالۋاندارعا ساتتىلىك تىلەدى.
«ەل چەمپيوناتىنىڭ كيەلى تاراز تورىندە ءوتۋى – ەرەكشە قۋانىش. سەبەبى بۇل ءوڭىر تالاي الەم جانە وليمپيادا چەمپيوندارىن تاربيەلەگەن قاسيەتتى مەكەن. بالۋانداردىڭ اراسىنان ەلىمىزدىڭ نامىسىن ابىرويمەن قورعايتىن مىقتى چەمپيوندار شىعاتىنىنا سەنەمىن. بۇل جارىس – جاستار ءۇشىن ۇلكەن حالىقارالىق دودالاردىڭ العاشقى باسپالداعى», دەدى ول.
جاپونيانى مويىنداتقان ەرسىن بالتاعۇل بالۋاندارعا ءادىس-تاسىلدەرىن كورسەتتى
بيىلعى چەمپيوناتتا جاس بالۋاندارعا اقشالاي سىياقىلار قاراستىرىلعان:
− U15 ساناتى: چەمپيون – 200 مىڭ تەڭگە, كۇمىس – 100 مىڭ تەڭگە, قولا – 50 مىڭ تەڭگە.
− U23 ساناتى: چەمپيون – 500 مىڭ تەڭگە, ەكىنشى ورىن – 300 مىڭ تەڭگە, ءۇشىنشى ورىن – 150 مىڭ تەڭگە.
سونداي-اق, «قايسار رۋح» جانە «دارا ءتاسىل» نوميناتسيالارىنىڭ جەڭىمپازدارى 150 مىڭ تەڭگەدەن الادى.
چەمپيوناتتىڭ العاشقى كۇندەرى گرەك-ريم كۇرەسىنىڭ U15 ساناتى بويىنشا بەلدەسۋلەر ءوتتى. التىن مەدالعا بەرەكەت يسماگۋلوۆ (38 كگ, ماڭعىستاۋ وبلوسى), رايىمبەك جاقسىلىق (41 كگ, سقو), نۇرالى امانگەلدى (44 كگ, اباي وبلىسى), روللان كيم (48 كگ, الماتى قالاسى), دانيال قاناتباي (52 كگ, الماتى وبلىسى), ايتۋعان وسمان (57 كگ, تۇركىستان وبلىسى), سانجار تۋلەپوۆ (62 كگ, الماتى قالاسى), رۋسلان باكىر (68 كگ, جامبىل وبلىسى), نۇرتۋعان مۇرات (75 كگ, قاراعاندى وبلىسى), ەرالي مۇراتوۆ (85 كگ, اباي وبلىسى) جانە نۇرمۇحاممەد تالعات (+85 كگ, اباي وبلىسى) يە بولدى.
جالپىكوماندالىق ەسەپتە تۇركىستان وبلىسى (1 التىن, 2 كۇمىس, 4 قولا مەدال) 155 ۇپايمەن كوش باستادى. جامبىل وبلىسى (1 التىن, 1 كۇمىس, 3 قولا) – 106 ۇپاي, اباي وبلىسى (3 التىن) – 89 ۇپايمەن ەكىنشى جانە ءۇشىنشى ورىنداردى يەلەندى. ۇپاي سانى United World Wrestling ەرەجەسى بويىنشا ءار سالماق دارەجەسىندەگى كورسەتكىشتەن ەسەپتەلدى.
چەمپيونات 18 ناۋرىزعا دەيىن جالعاسىپ, جاس بالۋانداردىڭ ونەرى كورەرمەندەردى تاعى قۋانتادى.
