فوتو: اتوم ەنەرگياسى جونىندەگى اگەنتتىك
يادرولىق ەنەرگەتيكا جونىندەگى ەكىنشى حالىقارالىق سامميتكە پارلامەنت ءماجىلىسىنىڭ توراعاسى ەرلان قوشانوۆ باستاعان دەلەگاتسيا قاتىستى. قۇرامىندا اتوم ەنەرگياسى جونىندەگى اگەنتتىگىنىڭ توراعاسى الماسادام ساتقاليەۆ بولدى. ءىس-شاراعا 50-دەن استام ەلدىڭ مەملەكەت پەن ۇكىمەت باسشىلارى, حالىقارالىق ۇيىمدار, قارجى ينستيتۋتتارى, ونەركاسىپتىك كومپانيالار, عىلىمي-ساراپشىلىق ورتا وكىلدەرى جينالدى.
جيىن فرانتسيا پرەزيدەنتى ەممانۋەل ماكروننىڭ توراعالىعىمەن وتكەن پلەنارلىق وتىرىسپەن اشىلدى. مەملەكەت باسشىسى ازاماتتىق اتوم ەنەرگەتيكاسى ەنەرگەتيكالىق قاۋىپسىزدىكتى قامتاماسىز ەتۋگە, تۇراقتى ەكونوميكالىق ءوسىمدى قولداۋعا, كليماتتىق مىندەتتەمەلەردى ورىنداۋعا مۇمكىندىك بەرەتىن نەگىزگى فاكتورلاردىڭ ءبىرى ەكەنىنە توقتالدى. بۇل سالا ەنەرگيا جەتكىزىلىمىنىڭ سەنىمدىلىگىن ارتتىرىپ, ەلەكتر قۋاتىنىڭ قۇنىن باسەكەگە قابىلەتتى دەڭگەيدە ۇستاپ تۇرۋعا جول اشادى. كومىرتەگى شىعارىندىلارىن ەداۋىر قىسقارتۋعا ىقپال ەتەدى.
فرانتسيا باسشىسى حالىقارالىق ارىپتەستىكتى كەڭەيتۋ مەن يادرولىق وتىن جەتكىزۋ تىزبەگىن ءارتاراپتاندىرۋدىڭ ماڭىزىن دا تىلگە تيەك ەتتى. وسى باعىتتا ۋران ءوندىرۋشى مەملەكەتتەردىڭ ءرولى ايرىقشا ەكەنى ايتىلدى. مۇنداي ەلدەردىڭ قاتارىندا قازاقستاننىڭ دا ورنى بار.
ءسامميتتىڭ ىسكەرلىك باعدارلاماسىندا الماسادام ساتقاليەۆ «جاھاندىق دەڭگەيدە يادرولىق وتىن جەتكىزۋدىڭ قاۋىپسىزدىگىن قامتاماسىز ەتۋ» تاقىرىبىنداعى دوڭگەلەك ۇستەل جۇمىسىنا قاتىستى. تالقىلاۋ بارىسىندا يادرولىق وتىن جەتكىزۋدىڭ الەمدىك تىزبەگىن ءارتاراپتاندىرۋ, وزىق وتىن تەحنولوگيالارىن دامىتۋ, ۋران ءوندىرۋ مەن قايتا وڭدەۋ الەۋەتىن كەڭەيتۋ, حالىقارالىق ىنتىماقتاستىقتى نىعايتۋ ماسەلەلەرى كوتەرىلدى.
جيىن اياسىندا اگەنتتىك توراعاسى فرانتسيانىڭ اتوم مەن بالامالى ەنەرگەتيكا جونىندەگى كوميسسارياتىنىڭ, ەلدىڭ ەكونوميكا, قارجى جانە ونەركاسىپتىك, ەنەرگەتيكالىق ءارى تسيفرلىق ەگەمەندىگى مينيسترلىگىنىڭ باسشىلىعىمەن, اتوم سالاسىنداعى جەتەكشى كومپانيالار وكىلدەرىمەن كەزدەسۋلەر وتكىزدى. اڭگىمە بارىسىندا ازاماتتىق اتوم ەنەرگەتيكاسى باعىتىنداعى ءوزارا ءىس-قيمىل, عىلىمي-تەحنولوگيالىق بايلانىستاردى دامىتۋ, ونەركاسىپتىك ارىپتەستىكتى كەڭەيتۋ ماسەلەلەرى تالقىلاندى.
سامميت قورىتىندىسىندا قاتىسۋشىلار پاريج دەكلاراتسياسىن قولداۋ باستاماسىن قۇپتادى. قۇجات حالىقارالىق ارىپتەستىكتى كۇشەيتۋگە, تومەن كومىرتەكتى ءارى تۇراقتى ەنەرگەتيكالىق جۇيە قالىپتاستىرۋدا ازاماتتىق اتوم ەنەرگەتيكاسىنىڭ ءرولىن ارتتىرۋعا باعىتتالعان.
اتوم ەنەرگەتيكاسى ماماندارى «بولاشاق» باعدارلاماسى اياسىندا ءبىلىم الادى
