بۇل تەلەەكسپەديتسيانى «قازاقستان-اقتوبە» تەلەكومپانياسى قازاق حاندىعىنىڭ 550 جىلدىعىنا وراي ۇيىمداستىردى. تەلەەكسپەديتسيا قۇرامىنداعى شىعارماشىلىق توپ وبلىستاعى 12 اۋداندى ارالاپ, تاريحي زەرتتەۋلەر جۇرگىزىپ, تىڭ دەرەكتەردى تاۋىپ, بەينەبايان تۇسىرەدى. بۇل جۇمىستاردىڭ ناتيجەسى «اتاجۇرت» باعدارلاماسىندا كورسەتىلەتىن بولادى.
عىلىمي ەكسپەديتسيانىڭ جەتەكشىسى – تاريحشى بەكارىستان مىرزاباي, جوبانىڭ باس دەمەۋشىسى – «كول-اۆتو-اقتوبە» كولىك ورتالىعى, «اتاجۇرت» باعدارلاماسىنىڭ رەداكتورى, تەلەجۇرگىزۋشى – ەربول شىما.
– بيىل كەرەي مەن ءاز ءجانىبەك نەگىزىن قالاعان قازاق حاندىعىنا 550 جىل تولادى. ءبىزدىڭ ۇجىمنىڭ ۇيىتقى بولۋىمەن ۇيىمداستىرىلعان تەلەەكسپەديتسيانىڭ باستى ماقساتى – وسى ەل ومىرىندەگى ەلەۋلى وقيعانىڭ ءوز دەڭگەيىندە اتالىپ وتىلۋىنە ۇلەس قوسۋ بولىپ تابىلادى. ءبىزدىڭ وڭىردە قۇندى جادىگەرلەر, تاريحي ورىندار وتە كوپ. كونەنىڭ كوزىندەي سول تاريحي ورىنداردى زەرتتەپ, زەردەلەپ, كورەرمەندەرگە ۇسىنۋدى ماقسات ەتكەن ەكسپەديتسيا جۇمىسى العا اۋدانىنان باستالادى, – دەيدى «قازاقستان-اقتوبە» تەلەكومپانياسىنىڭ ديرەكتورى راۋكەن وتىنشين. شىعارماشىلىق توپ ءوز جۇمىسىن ەسەت كوكى ۇلى كەسەنەسىنە بارىپ, اتا رۋحىنا تاعزىم ەتىپ, قۇران باعىشتاۋدان باستادى. ودان كەيىن تەلەەكسپەديتسيا بەلگىلى اقىن ءىزتاي مامبەتوۆتىڭ كىندىك قانى تامعان تابانتال-بەسقوسپا سەلولىق وكرۋگىنە بارادى. جوسپار بويىنشا ەكسپەديتسيا مۇشەلەرى ءار اۋدانعا ءبىر كۇننەن ايالدادى. تەلەەكسپەديتسيانىڭ عىلىمي جەتەكشىسى بەكارىستان مىرزاباي ۋاقىتتىڭ تىعىزدىعىن, وسى از ۋاقىتتىڭ ىشىندە مول مالىمەت جيناپ ۇلگەرۋ كەرەكتىگىن ايتادى. ءبىزدىڭ وبلىستىڭ قاي ءوڭىرى بولماسىن, تۇنعان تاريح, تولعان شەجىرە ەكەنىن العا تارتادى. مىسالى, العادا ايگىلى الاش قايراتكەرى احمەت بايتۇرسىنوۆ ءدارىس بەرگەن مەكتەپتىڭ ورنى بار ەكەنىن, الاش كوسەمىنىڭ مۇندا اتاقتى بولىس احمەتكەرەي قوسۋاقوۆتىڭ ارنايى شاقىرتۋىمەن كەلگەنىن جەتكىزدى. ول اعىلشىن ساياحاتشىسى دجون كەستلدىڭ قارعالى, جامان قارعالى وزەندەرىنىڭ بويىندا بىرنەشە كۇن ايالداپ, قورعانداردى قازعانى تۋرالى دەرەكتەر بار ەكەنىن دە تىلگە تيەك ەتتى. سونداي-اق, ءاز جانىبەك حاننىڭ اقىلشىسى بولعان اسان قايعى بابامىزدان قالعان كەرەمەت جىرلاردىڭ حالقىمىزدىڭ جادىندا ساقتالعانىن ەسكە سالا كەلىپ, تەلەەكسپەديتسيا ساپارى بارىسىندا اتقارىلار شارۋالاردىڭ بىرقاتارىنا توقتالدى.
ساتىبالدى ءساۋىرباي, «ەگەمەن قازاقستان».
اقتوبە وبلىسى.
