كىرىسپە سوزدە بۇل جيىننىڭ ماڭىزى وتە زور ەكەنىن ايتقان, ۆيتسە-پرەمەر ج.ماديەۆ الداعى كونستيتۋتسيالىق رەفورماعا ارنالعان رەفەرەندۋم – ەلىمىزدىڭ ساياسي دامۋى ءۇشىن ماڭىزدى ساياسي وقيعا بولاتىنى ءسوزسىز ەكەنىن اتاپ ءوتتى.
– بۇل باستاما ەڭ الدىمەن مەملەكەت پەن قوعامنىڭ ۇزاق مەرزىمدى ستراتەگيالىق دامۋىنا باعىتتالعان. ونىڭ نەگىزگى ماقساتى – ازاماتتاردىڭ قۇقىقتارى مەن بوستاندىقتارىن قورعاۋدى كۇشەيتۋ, مەملەكەتتىك باسقارۋدى جەتىلدىرۋ جانە ۇلتتىق بىرلىكتى نىعايتۋ. ادامنىڭ ار-نامىسى ونىڭ قادىر-قاسيەتىمەن قاتار قول سۇعىلمايتىن قۇندىلىق رەتىندە قورعالادى. بۇل نورما ازاماتتاردىڭ مەملەكەتكە دەگەن سەنىمىن ارتتىرىپ, قوعامدىق ينستيتۋتتاردىڭ تۇراقتىلىعىن نىعايتادى, – دەدى ج.ماديەۆ.
پرەمەر-ءمينيستردىڭ ورىنباسارى ءوز سوزىندە جاساندى ينتەللەكت داۋىرىندە ازاماتتاردىڭ تسيفرلىق قۇقىقتارىن قورعاۋ – بۇل تسيفرلىق مەملەكەتكە دەگەن سەنىمنىڭ نەگىزگى شارتى ەكەنىنە توقتالدى. بۇل نورمالاردى كونستيتۋتسيالىق دەڭگەيدە بەكىتۋ وتانداستارىمىزدىڭ قۇقىقتارىن قورعاۋدى ساپالى جاڭا دەڭگەيگە كوتەرەتىنىنە جانە قاۋىپسىز ءارى ءادىل قوعام قۇرۋعا جول اشاتىنىنا باسا ءمان بەرىپ, وزگەرىستەردىڭ ستراتەگيالىق ماڭىزدىلىعىن اتاپ ءوتتى.
ونىڭ ايتۋىنشا, جاڭارتىلعان كونستيتۋتسيا تەحنولوگيالاردىڭ ادام يگىلىگىنە قىزمەت ەتۋىنىڭ جانە زاڭنىڭ تسيفرلىق الەمدە ءاربىر ازاماتتىڭ مۇددەسىن سەنىمدى قورعاۋىنىڭ كەپىلى بولماق.
سونداي-اق مينيستر ج.ماديەۆ جاڭا كونستيتۋتسيادا ازاماتتاردىڭ جەكە مالىمەتتەرىنىڭ قاۋىپسىزدىگىنە قۇقىقتىق كەپىلدىكتەر بەرىلەتىنىن ايتتى.
– قازىرگى ۋاقىتتا الەم قارقىندى تسيفرلىق وزگەرىستەر كەزەڭىنە قادام باستى. مەملەكەتتىك قىزمەتتەر, قارجى وپەراتسيالارى, ءبىلىم بەرۋ, مەديتسينا جانە الەۋمەتتىك قاتىناستاردىڭ باسىم بولىگى ەلەكتروندى فورماتقا كوشتى. وسىعان بايلانىستى تسيفرلىق داۋىردە دەربەس دەرەكتەردى قورعاۋ ماسەلەسى ەرەكشە ماڭىزعا يە بولىپ وتىر, – دەگەن پرەمەر-ءمينيستردىڭ ورىنباسارى كونستيتۋتسيالىق دەڭگەيدە دەربەس دەرەكتەردىڭ قورعالۋىنا ەرەكشە ءمان بەرۋ – تسيفرلىق كەڭىستىكتە قاۋىپسىز قۇقىقتىق ورتا قالىپتاستىراتىنىن ايتتى.
جاسلان ماديەۆ تسيفرلاندىرۋ ۇدەرىسىن قۇقىقتىق تۇرعىدان بەكىتۋ – بولاشاققا جاسالعان ماڭىزدى قادام دەپ بىلەتىنىن جەتكىزدى. ول ەلدىڭ قاۋىپسىز دامۋىن قامتاماسىز ەتىپ, ازاماتتاردىڭ قۇقىقتارىن قورعاۋدى جاڭا دەڭگەيگە كوتەرەتىنىن اتاپ ءوتتى. ياعني بۇل باعىتتاعى وزگەرىستەر قازاقستان قوعامىنىڭ زاماناۋي, قاۋىپسىز ءارى ادىلەتتى بولاشاعىنا جول اشپاق.
– سونىمەن قاتار جاڭا كونستيتۋتسيادا ۇسىنىلىپ وتىرعان بارلىق وزگەرىستەر, مەملەكەتىمىزدىڭ ساياسي جۇيەسىن جاڭعىرتىپ, ازاماتتاردىڭ تۇرمىس ساپاسىن ارتتىرۋعا, قۇقىقتىق ءتارتىپتى نىعايتۋعا جانە وتانشىلدىق يدەيانى كۇشەيتۋگە باعىتتالعان. بۇل تەك قۇقىقتىق قۇجاتتى وزگەرتۋ ەمەس, ول – قوعامنىڭ دامۋىنىڭ جاڭا كەزەڭىنە قادام جاساۋ. ونىڭ تۇپكى ماقساتى – تۇراقتى, ادىلەتتى جانە وركەنيەتتى مەملەكەت قۇرۋ. الداعى رەفەرەندۋم – ەلىمىزدىڭ بولاشاعىنا قاتىستى ماڭىزدى شەشىم, – دەگەن جاساندى ينتەللەكت جانە تسيفرلىق دامۋ ءمينيسترى جاسلان ماديەۆ ءار ازاماتتىڭ بۇل تاريحي وزگەرىستەرگە جاۋاپكەرشىلىكپەن قاراپ, ەلدىك, مەملەكەتشىلدىك پوزيتسياسىن تانىتۋى – ارقايسىمىزدىڭ ەل بولاشاعىنا قوسقان ناقتى ۇلەسىمىز بولماعىن اتاپ ءوتتى.
جالپى العاندا كەزدەسۋدە مەملەكەتتىك قۇرىلىمنىڭ بولاشاعى مەن ازاماتتاردىڭ قۇقىقتارىن قورعاۋدى ايقىندايتىن كونستيتۋتسيالىق رەفورمالار تۋرالى اشىق ديالوگ ءوربىدى.
