سۋرەتتى تۇسىرگەن – ۆالەري بۋگاەۆ
قازىر وبلىستا جالپى سىيىمدىلىعى 550,9 مىڭ توننانى قۇرايتىن كوكونىس قويمالارى جۇمىس ىستەيدى. سونىڭ ىشىندە 133 قويما (483,8 مىڭ توننا) زاماناۋي قۇرال-جابدىقتارمەن قامتاماسىز ەتىلگەن. بۇدان بولەك, 13 قويما (58 مىڭ توننا) ارنايى توڭازىتقىش قوندىرعىلارىمەن جابدىقتالعان. جالپى العاندا, كوكونىس ساقتاۋ ينفراقۇرىلىمى جەتكىلىكتى دەڭگەيدە دامىعان.
– بىلتىر پاۆلودار وبلىسىندا 711,5 مىڭ توننا كارتوپ, 146,6 مىڭ توننا ءسابىز جينالدى. ءوڭىر تۇرعىندارىنا جىلىنا 75,4 مىڭ توننا كارتوپ قاجەت ەكەنىن ەسكەرسەك, قامتاماسىز ەتۋ دەڭگەيى قاجەتتىلىكتەن 11 ەسە جوعارى. سابىزگە دەگەن جىلدىق قاجەتتىلىك 17,3 مىڭ توننا بولسا, قامتاماسىز ەتىلۋى – ودان 10 ەسە كوپ. ارتىق ءونىم سىرتقا ساتىلادى. وتكەن جىلى وبلىس شارۋالارى 183,4 مىڭ توننا كارتوپتى وزبەكستان, رەسەي, تۇرىكمەنستان مەن تاجىكستان ەلدەرىنە ەكسپورتتادى. سونداي-اق وزبەكستان, رەسەي, قىرعىزستان باعىتتارىنا 24,5 مىڭ توننا ءسابىز جونەلتىلدى. ال جىل باسىنان سىرتقا 36,7 مىڭ توننا كارتوپ پەن 4,6 مىڭ توننا ءسابىز جىبەرىلگەن. بۇل كورسەتكىشتەر ءوڭىردىڭ ەكسپورتتىق الەۋەتىنىڭ جوعارى ەكەنىن بايقاتىپ وتىر, – دەيدى وبلىستىق اۋىل شارۋاشىلىعى باسقارماسى باسشىسىنىڭ ورىنباسارى تولەگەن كوشەرباەۆ.
باسقارما دەرەگىنشە, قازىر جەرگىلىكتى كوكونىس قويمالارىندا 50,4 مىڭ توننا كارتوپ پەن 30 مىڭ توننا ءسابىز ساقتالىپ تۇر. ماماندار بۇل وبلىس حالقىنىڭ جاڭا ءونىم الىنعانعا دەيىنگى قاجەتتىلىگىن تولىق قامتاماسىز ەتۋگە جەتكىلىكتى دەيدى.
وبلىستا اتالعان ونىمدەر بويىنشا كوتەرمە باعالار تۇراقتى دەڭگەيدە ساقتالىپ تۇرعانى بايقالعان. كارتوپتىڭ ءبىر كيلوسى 115-130 تەڭگە ارالىعىندا بولسا, ءسابىز – 130-150 تەڭگە.
اتاپ وتەرلىگى, الداعى ەگىس ناۋقانىندا تۇقىمعا 60,9 مىڭ توننا كارتوپ قاجەت. اتالعان كولەم قازىردىڭ وزىندە دايىن تۇر. ال ءسابىز تۇقىمى كوكتەمگى ەگىس جۇمىسىنىڭ كولەمىنە قاراي ساتىپ الىنادى.
پاۆلودار وبلىسى
