سۋرەتتى تۇسىرگەن – ەرلان ومار, «ەQ»
بۇگىندە ايەلدەر قاۋىمى وتباسىنىڭ بەرەكەسىن كىرگىزىپ قانا قويماي, ەلىمىزدەگى اۋقىمدى وزگەرىستىڭ بەل ورتاسىندا ءجۇر. قوعام ءومىرىنىڭ بارلىق سالاسىندا زور تابىسقا قول جەتكىزىپ, كوشباسشىلىق قاسيەتتەرىمەن تانىلىپ كەلەدى. ەڭ باستىسى – سانالى ۇرپاق تاربيەلەپ, ۇلتتىق قۇندىلىق پەن سالت-ءداستۇر, ادەت-عۇرپىمىزدىڭ ساقتالۋىنا ولشەۋسىز ۇلەس قوسىپ وتىر.
مەملەكەت باسشىسى قاسىم-جومارت توقاەۆ اتاپ وتكەندەي: «ايەل جانى قاشاندا ادەمىلىككە جاقىن. ارۋلارىمىز الەمگە سۇيىسپەنشىلىكپەن قاراپ, جان-جاعىنا جاقسىلىق شاراپاتىن سىيلاپ جۇرەدى. «ايەل ءبىر قولىمەن بەسىكتى تەربەتسە, ءبىر قولىمەن الەمدى تەربەتەدى» دەگەن ءسوز بەكەر ايتىلماعان. ايەل – شاڭىراقتىڭ شىراعى, ۇلتتىڭ ۇيىتقىسى. انا – تىرشىلىك پەن بەرەكەنىڭ باستاۋى, ادامزات بويىنداعى بار ىزگىلىكتىڭ قاينار كوزى. انانىڭ ايالى الاقانى مەن شەكسىز مەيىرىمى ءار ۇيگە جىلىلىق بەرەدى. سالت-ءداستۇرىمىز بەن انا ءتىلىمىزدىڭ بۇگىنگى كۇنگە جەتۋى دە – ەڭ الدىمەن, انالاردىڭ ارقاسى».
قوعامنىڭ وركەنيەتتىلىگى ونىڭ ايەل-انالارعا دەگەن قۇرمەتىمەن, قامقورلىعىمەن ولشەنەدى. انانى ارداقتاۋ – حالقىمىزدىڭ قانىنا سىڭگەن قاسيەت. دەگەنمەن قازىرگى جاھاندانۋ مەن نارىق زامانىندا قۇرمەت ناقتى الەۋمەتتىك قورعاۋ تەتىكتەرىمەن كورىنىس تابۋعا ءتيىس. بۇگىندە انا مەن بالا قۇقىعىن قورعاۋ, دەموگرافيالىق-الەۋمەتتىك ماسەلەلەردى شەشۋ مەملەكەتتىك ساياساتتىڭ باسىم باعىتىنا اينالدى. ەلىمىز – ايەلدەر مەن بالالار قۇقىقتارىن قورعاۋ جونىندەگى حالىقارالىق كونۆەنتسيانىڭ تولىققاندى مۇشەسى. پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونiندەگi ۇلتتىق كوميسسيا تۇراقتى جۇمىس ىستەيدى. ەڭبەك جانە حالىقتى الەۋمەتتىك قورعاۋ, وقۋ-اعارتۋ, دەنساۋلىق ساقتاۋ مينيسترلىكتەرى تاراپىنان كەشەندى شارالار جۇزەگە اسىرىلىپ كەلەدى. ەلىمىزدە 150-دەن استام ۇكىمەتتىك ەمەس ايەلدەر ۇيىمى بەلسەندى قىزمەت ەتىپ جاتىر. ءتۇرلى جاعدايعا بايلانىستى انا مەن بالا قۇقىعىن قورعاۋعا باعىتتالعان زاڭنامالار ۋاقىت تالابىنا ساي ۇزدىكسىز جەتىلدىرىلىپ وتىرادى.
ايەل-انانى قولداۋ – بۇل جاي عانا الەۋمەتتىك كومەك ەمەس, مەملەكەتتىڭ بولاشاعىنا قۇيىلعان ەڭ قوماقتى ينۆەستيتسيا. قوعامداعى ءاربىر انا ەرتەڭگى كۇنىنە سەنىممەن قاراپ, ءوزىن مەملەكەتتىڭ قورعاۋىندا ەكەنىن سەزىنگەندە عانا ۇلتىمىزدىڭ ىرگەسى بەرىك, رۋحى بيىك بولادى.
«ەل بولامىن دەسەڭ, بەسىگىڭدى تۇزە» دەيدى حالىق دانالىعى. ال اق بەسىكتىڭ يەسى – ايەل-انا ەكەنىن ەسكەرسەك, قوعامىمىزدىڭ كەلەشەگى, ەلىمىزدىڭ دامۋى ارداقتى انالارعا بايلانىستى. ارداقتى انالارىمىزعا, اياۋلى قىز-كەلىنشەكتەرىمىزگە جاراتقان يەنىڭ نۇرى جاۋسىن, ايەل-انانىڭ قاجىرى مەن قايراتى, رۋحى مەن جىگەرى, نازىك سەزىمى مەن بيىك پاراساتى ماڭگى جاساي بەرسىن. بارشامىزدى ءاردايىم انا قۇدىرەتى جەلەپ-جەبەپ ءجۇرسىن!
