فوتو: Gov.kz
ۇشىپ كەلگەن ازاماتتاردىڭ باسىم بولىگى ءارى قاراي الماتى قالاسىنا جول تارتقان. ازاماتتار شەتەلدە بولعان كەزەڭدە ەلىمىزدىڭ سىرتقى ىستەر مينيسترلىگى مەن ەلشىلىكتەر تاراپىنان تۇراقتى بايلانىس ورناتىلىپ, جان-جاقتى قولداۋ كورسەتىلگەنىن اتاپ ءوتتى. ارنايى چاتتار اشىلىپ, اقپاراتتىق جانە قۇقىقتىق كومەك بەرىلگەن. قوناق ءۇي مەن تاماق ماسەلەسى دە شەشىمىن تاپقان.
ء«بىز ساۋد ارابياسى, جيددا, دوحا, كاتار باعىتتارىنان جينالىپ, ۋمرا ساپارىنان كەيىن جيددا قالاسىنا توپتاستىرىلدىق. سول جەردەن ۇيىمداستىرىلعان رەيسپەن اقتاۋعا جەتتىك. 2-3 كۇن كىدىرگەنىمىز بولماسا, جاعدايىمىز جاقسى بولدى. سىرتقى ىستەر مينيسترلىگى مەن ەلشىلەر تولىق قولداۋ كورسەتتى. قۇجات راسىمدەۋ بارىسىندا دا كومەكتەستى. وسىنداي ساتتە ەلىمىزدەگى تىنىشتىق پەن تاۋەلسىزدىكتىڭ قادىرىن تەرەڭىرەك تۇسىنەدى ەكەنسىڭ. قازاق حالقىنا, مەملەكەت باسشىسىنا العىس ايتقىم كەلەدى. قازاقستاندىقتارعا بىرلىك تىلەيمىن. ەلىمىز امان, جۇرتىمىز تىنىش بولسىن. اسپانىمىز اشىق بولسىن», دەدى اقتاۋ قالاسىنىڭ تۇرعىنى بيريۋزا يششانوۆا.
تاياۋ شىعىس ەلدەرىنەن قازاقستان ازاماتتارىن ەلگە قايتارۋ جۇمىستارى جالعاسىپ جاتىر. مينيسترلىك مالىمەتىنشە, تاياۋ شىعىستان ەلگە ورالعان ازاماتتاردىڭ سانى 2 151 ادامعا جەتىپ وتىر.
ەسكە سالا كەتەيىك, يزرايل 28 اقپان, سەنبى كۇنى تاڭەرتەڭ يرانعا سوققى جاسادى. دۋباي, ابۋ-دابي جانە راس-ەل-حايمادا جۇرگەن قازاقستان ازاماتتارى رەيستەردىڭ توقتاتىلۋىنا بايلانىستى ەلگە قايتا الماي وتىر. ال «قازپوشتا» تاياۋ شىعىستاعى جاعدايدىڭ شيەلەنىسۋىنە بايلانىستى حالىقارالىق پوشتا جونەلتىلىمدەرىنە ۋاقىتشا شەكتەۋلەر قويىلعانىن مالىمدەدى.
بۇعان دەيىن تاياۋ شىعىستاعى قاقتىعىس سالدارىنان 13 رەيس توقتاتىلعانىن جازعان بولاتىنبىز. سونداي-اق تاياۋ شىعىستاعى احۋالدىڭ ۋشىعۋىنا بايلانىستى قازاقستاننىڭ شەت ەلدەردەگى مەكەمەلەرىنىڭ جەدەل بايلانىس جانە «جەدەل جەلى» نومىرلەرىنىڭ ىسكە قوسىلعانى حابارلانعان ەدى.
كەشە دۋبايدان ومان ارقىلى 467 وتانداسىمىز ەلگە جەتكىزىلدى. سونىمەن قاتار Flydubai اۋە كومپانياسى دۋباي قالاسىنان استانا جانە الماتى قالالارىنا ەكى ەۆاكۋاتسيالىق رەيستى ورىندادى.
