كوكتەمنىڭ العاشقى كۇنىمەن تۇسپا-تۇس كەلگەن كەشكە كورەرمەن كوپ جينالدى. كونتسەرتتە ۇلتتىق ءداستۇرلى مۋزىكا الۋان ءتۇرلى كومپوزيتسيامەن سالتانات قۇردى. سونىمەن قاتار كەشتە فولك, ەتنو-دجاز, ەتنو-پانك جانە زاماناۋي ءۇن ادەمى ۇيلەسىم تاپقان. باعدارلاما اياسىندا قازاق مۋزىكاسىنىڭ تاماشا تۋىندىلارى ورىندالدى.
كەش بارىسىندا قازاقستاننىڭ ەڭبەك سىڭىرگەن قايراتكەرى ەربولات شالدىبەكوۆ, «دارىن» مەملەكەتتىك جاستار سىيلىعىنىڭ لاۋرەاتى ءادىلحان ماكين, رەسپۋبليكالىق جانە حالىقارالىق بايقاۋلاردىڭ لاۋرەاتتارى زاڭعار مۇباراكوۆ, جانتۋ داداباەۆ, اققانات سماعۇلوۆا, جاسلان كارىم سەكىلدى تالانتتى ارتىستەر ونەر كورسەتتى. ولاردىڭ اۋەلەتىپ سالعان اندەرى مەن كۇمبىرلەتىپ تارتقان كۇيلەرى تىڭدارماننىڭ قۇلاق قۇرىشىن قاندىردى. مىڭ بۇرالعان بيشىلەردىڭ شەبەرلىگى دە جۇرتشىلىقتى ءتانتى ەتتى.
ايتا كەتەيىك, «Astana sazy» – ەلىمىزدەگى جەتەكشى شىعارماشىلىق ۇجىمنىڭ ءبىرى. انسامبل مۋزىكانتتارى دومبىرا, قوبىز, شەرتەر, شاڭقوبىز, ساز سىرناي, سىبىزعى, اساتاياق, داۋىلپاز, تۇياقتاس, قوڭىراۋ سەكىلدى حالىق مۋزىكالىق اسپاپتارىندا كەرەمەت وينايدى. ۇجىمنىڭ كوركەمدىك جەتەكشىسى – نۇركەن ياكياەۆ.
ءبىر جاعىنان, فولكلورلىق ءانسامبلدىڭ رەپەرتۋارى وتە باي. اسىرەسە وندا ءتۇرلى حالىقتاردىڭ ءداستۇرلى اسپاپتىق مۋزىكاسى مەن زاماناۋي اۆتورلىق شىعارمالار قامتىلعان. سونداي-اق بۇعان دەيىن ۇجىم ارتىستەرى تاجىكستان, وزبەكستان, قىرعىزستان سەكىلدى بىرنەشە ەلدە ونەر كورسەتكەن.
