سۋرەت: 24.kz
بريفينگ بارىسىندا شتاب وكىلدەرى ونىڭ نەگىزگى مىندەتتەرى مەن جۇمىس تەتىكتەرىن جان-جاقتى تانىستىردى. داۋىس بەرۋ كۇنى شتاب تاڭنان باستاپ قورىتىندى جاريالانعانعا دەيىن ۇزدىكسىز جۇمىس ىستەيدى. قكو بازاسىندا كەڭەيتىلگەن فورماتتا ارەكەت ەتەتىن سيتۋاتسيالىق ورتالىقتا وڭىرلەردەن كەلىپ تۇسەتىن اقپارات جەدەل جيناقتالىپ, سارالانىپ, بۇقارالىق اقپارات قۇرالدارىنا دەر كەزىندە ۇسىنىلماق.
شتاب جۇمىسىنىڭ باستى قاعيداتتارى – اشىقتىق, بەيتاراپتىق جانە زاڭ تالاپتارىن قاتاڭ ساقتاۋ. تاۋەلسىز بايقاۋشىلار ەلىمىزدىڭ بارلىق وڭىرىندە داۋىس بەرۋ ۋچاسكەلەرىندەگى ۇدەرىستى قاداعالاپ, قوعامدىق باقىلاۋ تەتىكتەرى ارقىلى زاڭبۇزۋشىلىقتاردىڭ الدىن الۋعا جانە ولاردى جەدەل تىركەۋگە باسىمدىق بەرەدى. سونىمەن قاتار قۇقىق قورعاۋشىلار مەن ساراپشىلاردىڭ قاتىسۋىمەن تىكەلەي قوسىلىمدار ۇيىمداستىرىلىپ, رەفەرەندۋم بارىسى تۋرالى جان-جاقتى اقپارات بەرىلەدى.
بريفينگتە ءسوز سويلەگەن Independ.kz اقپاراتتىق اگەنتتىگىنىڭ باس رەداكتورى رافاەل گاسانوۆ قوعام ءۇشىن سەنىمدى ءارى دايەكتى اقپاراتتىڭ ماڭىزىن اتاپ ءوتتى. ونىڭ ايتۋىنشا, رەفەرەندۋم سەكىلدى ەل تاعدىرىنا اسەر ەتەتىن تاريحي ساتتە اقپاراتتىڭ اشىقتىعى مەن جەدەلدىگى اسا ماڭىزدى.
«قوعامعا دايەكتى اقپارات بەرۋ – ماڭىزدى. قوعامدىق كوممۋنيكاتسيالار ورتالىعىمەن تىلشىلەر تىعىز بايلانىس ورناتا وتىرىپ, رەفەرەندۋم بارىسىنان رەسمي حابار تاراتادى. بۇگىنگى كۇن – ەركىن مونيتورينگ جاساپ, ۇدەرىستى پايىمدى سارالاي الاتىن كەزەڭ», دەدى ول.
ال بەلگىلى مەديامەنەدجەر نۇرجان مۇحامەدجانوۆا بۇل ناۋقاننىڭ ەل بولاشاعى ءۇشىن ايرىقشا مانگە يە ەكەنىن جەتكىزدى.
ء«دال قازىر – ەلىمىز ءۇشىن ماڭىزدى كەزەڭ. مەملەكەتىمىزدىڭ الداعى بولاشاعىن ايقىندايتىن قۇندى قۇجات قوعام تالقىسىنا ۇسىنىلدى. كوزى اشىق ءاربىر ازامات ساياسي كورەگەندىلىك تانىتىپ, اتا زاڭىمىزدىڭ قابىلدانۋىنا اتسالىسۋعا ءتيىس. ءبىز وسى رەفەرەندۋمنىڭ ءادىل ءارى اشىق ءوتۋىن قالايمىز. تاۋەلسىز جۋرناليستەر باستاعان تاۋەلسىز بايقاۋشىلار قوعام سەنىمىن اقتاۋعا كۇش سالادى. سول كۇنى Independ.kz پورتالى تىكەلەي ەفيردە جۇمىس ىستەيدى. شەتەلدەن كەلگەن بايقاۋشىلارمەن دە تىعىز بايلانىستا بولامىز. باستى ماقسات – رەفەرەندۋمنىڭ ءوتۋ بارىسىن قاداعالاۋ ءارى بۇقاراعا ناقتى, شىنايى حابار جەتكىزۋ», دەيدى ول.
ساراپشىلاردىڭ پىكىرىنشە, مۇنداي ساياسي ناۋقانداردا حالىقتىڭ ساياسي مادەنيەتى ايرىقشا ءرول اتقارادى. اسىرەسە الەۋمەتتىك جەلىلەر قارقىندى دامىعان كەزەڭدە اقپاراتتىڭ شىنايىلىعى مەن دەرەككوزىنىڭ سەنىمدىلىگىنە ءمان بەرۋ – ءار ازاماتتىڭ جاۋاپكەرشىلىگى. جالعان نەمەسە تەكسەرىلمەگەن مالىمەتتەردىڭ تارالۋى قوعامدىق پىكىرگە كەرى اسەر ەتۋى مۇمكىن. سوندىقتان شتاب وكىلدەرى ازاماتتاردى رەسمي جانە تەكسەرىلگەن اقپاراتقا سۇيەنۋگە, سانالى تاڭداۋ جاساۋعا شاقىردى.
ۇيىمداستىرۋشىلاردىڭ مالىمدەۋىنشە, اقپاراتتىق شتابتىڭ قىزمەتى رەفەرەندۋم كۇنىمەن عانا شەكتەلمەيدى. داۋىس بەرۋ قورىتىندىسى جاريالانعانعا دەيىن بارلىق مالىمەت ساراپتالىپ, قوعامعا اشىق تۇردە ۇسىنىلادى. بۇل باستاما ازاماتتىق قوعام ينستيتۋتتارىنىڭ بەلسەندىلىگىن ارتتىرىپ, قوعامدىق باقىلاۋ مادەنيەتىن نىعايتۋعا ىقپال ەتەدى. وسىلايشا, تاۋەلسىز بايقاۋشىلاردىڭ اقپاراتتىق شتابى رەفەرەندۋم ۇدەرىسىنىڭ اشىقتىعى مەن جاريالىلىعىن قامتاماسىز ەتۋگە باعىتتالعان ماڭىزدى الاڭعا اينالماق.
الماتى
