تەمىرتاۋ قالاسىندا كوممۋنالدىق اپات سالدارى اۋىر ءتيدى. جىلۋ ماگيسترالىندەگى اقاۋ سالدارىنان شامامەن وتىز عيماراتتا جىلۋ توقتاعان. دەمالىس كۇندەرى اۋا تەمپەراتۋراسى مينۋس 30 گرادۋسقا دەيىن تومەندەپ, جاعداي كۇردەلەنە ءتۇستى. پاتەرلەردەگى باتارەيالار جارىلىپ, سۋ جانە كارىز جۇيەلەرى قاتىپ قالعان. كەيبىر تۇرعىندار ۇيلەرىن ۋاقىتشا تاستاپ كەتۋگە ءماجبۇر بولدى.
ماسەلەنىڭ تاعى ءبىر قىرى – جىلۋ جەلىلەرىنىڭ قۇقىقتىق مارتەبەسى. انىقتالعانداي, اتالعان ۇيلەرگە جىلۋ جەتكىزەتىن قۇبىرلار رەسمي تۇردە ەشبىر مەكەمەنىڭ بالانسىنا الىنباعان. تۇرعىندار كەزىندە ورتالىق جۇيەگە وزدەرى قوسىلىپ, قىزمەت اقىسىن تولەپ كەلگەنىمەن, قۇبىرلاردىڭ ۇساق اقاۋلارىن ءوز قاراجاتىنا جوندەپ وتىرعان. ال بۇل جولعى اپاتتىڭ اۋقىمى قالالىق قىزمەتتەردىڭ ارالاسۋىن قاجەت ەتكەن.
بيلىك بالاما رەتىندە گازعا قوسىلۋدى ۇسىندى. الايدا كوگىلدىر وتىن جەلىسى بۇل كوشەگە تەك وتكەن جىلدىڭ جەلتوقسان ايىنىڭ سوڭىندا عانا تارتىلعان. تۇرعىندار جاڭا جىلىتۋ جۇيەسىنە كەيىنىرەك كوشۋدى جوسپارلاعان. اپات بۇل جوسپاردى وزگەرتتى.
قوسىلۋ قۇنى كەيبىر وتباسىلار ءۇشىن اۋىر ءتيىپ وتىر. قالا اكىمدىگى بەس جىلعا دەيىن ءبولىپ تولەۋ مۇمكىندىگىن قاراستىرىپ جاتقانىن مالىمدەدى.
«بۇگىندە 26 ءۇيدىڭ 18-ءى تەحنيكالىق شارت الدى. جەتى ۇيدە قۇرىلىس-مونتاج جۇمىستارى اياقتالدى. ءبىر ۇيدە ورتالىق گاز بار», دەدى قالا اكىمىنىڭ ورىنباسارى رينات قىدىربەكوۆ.
قازىر كوشەدە گاز جابدىقتارىن ورناتۋ بويىنشا جۇمىستار جالعاسىپ جاتىر. كەيبىر تۇرعىندار تۋىستارىنىڭ ۇيىنە ۋاقىتشا كوشكەنىمەن, بارلىعى بىردەي باسپاناسىن تاستاپ كەتە الماعان.
قالا بيلىگى اپات سالدارىن جويۋ مەن گازعا قوسۋ جۇمىستارى شامامەن ەكى كۇندە اياقتالادى دەپ سەندىردى. تۇرعىندار بولسا, سۋىق قايتا كۇشەيمەي تۇرىپ ۇيلەرىنە جىلۋ بەرىلسە ەكەن دەپ ۇمىتتەنىپ وتىر.
