جارىستىڭ العاشقى كۇنىندە-اق 19 جاستاعى سولتۇستىك قازاقستان وبلىسىنىڭ تۋماسى 500 مەترلىك قاشىقتىقتى 38.48 سەكۋندتا باعىندىرىپ, التىننان القا تاقتى. بۇل – قازاق سپورتىنداعى ەلەۋلى وقيعا. وتاندىق كونكيشىلەر سوڭعى رەت جاستار اراسىنداعى الەم بىرىنشىلىگىندە وسىدان 16 جىل بۇرىن, ياعني 2010 جىلى توپ جارعان ەدى. ەكاتەرينا ايدوۆانىڭ سول ەرلىگىن اراعا جىلدار سالىپ كريستينا قايتالاپ وتىر. بۇل باسەكەدە كانادالىق دجۋليا سنەلگروۆ (38.78) كۇمىس, پولشالىق ۆيكتوريا دابروۆسكا (38.96) قولا جۇلدەگە يە بولدى.
جەڭىستى كۇندەر مۇنىمەن شەكتەلمەدى. 1 500 مەترلىك سايىستا جەرلەسىمىز 1:56.06 ۋاقىت كورسەتكىشىمەن تاعى دا شاشاسىنا شاڭ جۇقتىرمادى (اۋستريالىق دجانين روسنەر – 1:56.36, جاپونيالىق ايانو سەكيگۋچي – 1:57.97). 1000 مەتردە 1:16.34 ناتيجەسىمەن باس جۇلدەنى ءۇشىنشى مارتە قانجىعاسىنا بايلادى. بۇل قاشىقتىقتا كۇمىس پەن قولا مەدال جاپونيالىق ايانو سەكيگۋچي (1:16.66) مەن اۋستريالىق دجانين روسنەرگە (1:17.00) بۇيىردى.
ايتا كەتەرلىگى, ك.شۋمەكوۆا ينتسەللدە جەكە رەكوردىن دا جاڭارتتى. 3 000 مەترلىك دودادا كۇمىس جۇلدەنى قاناعات تۇتقانىمەن, جەكەلەي قاشىقتىقتار جيىنتىعى جونىندە جەرلەسىمىز تەڭدەسسىز دەپ تانىلدى. بۇل – ەل سپورتىنىڭ تاريحىندا بۇرىن-سوڭدى بولماعان تاريحي وقيعا! وسىنداي ايتۋلى جەڭىستەن سوڭ مەملەكەت باسشىسى قاسىم-جومارت توقاەۆ دارىندى كونكيشىمىزدى وراسان زور تابىسىمەن ارنايى قۇتتىقتاپ, الداعى دودالاردا ساتتىلىك تىلەدى.
ودان كەيىن قۇرامىندا كريستينا شۋمەكوۆا, اناستاسيا بەلوۆودوۆا, ۆارۆارا گلۋحوۆا بار ەلىمىزدىڭ قىزدار قۇراماسى كوماندالىق سپرينتتە توپ جاردى. قۇراما قورجىنىنا تۇسكەن التىنشى التىنعا ماسس-ستارتتا جەڭىسكە جەتكەن ۆاديم چەبارداكوۆ يە بولدى.
