فوتو: اشىق دەرەككوز
پوليتسيا وكىلىنىڭ مالىمەتىنشە, وتباسىلىق-تۇرمىستىق قاتىناستار سالاسىنداعى قۇقىق بۇزۋشىلىقتار بويىنشا تەك ەرلەر ەمەس, ايەلدەر دە كۇدىكتى رەتىندە ءجيى جاۋاپقا تارتىلىپ جاتادى. ونداي ىستەردىڭ قاتارىندا دەنساۋلىققا قاساقانا زيان كەلتىرۋ, اۋىر دەنە جاراقاتىن سالۋ جانە ستالكينگ (ارتىنان قالماي قۋدالاۋ) دەرەكتەرى بار.
ايتان ەلەۋسىزوۆ ناقتى وقيعاعا توقتالىپ, ايەل ادامنىڭ بۇرىنعى قارىم-قاتىناسىن قايتا جانداندىرعىسى كەلگەنىن جەتكىزدى.
«ستالكينگ جاساعان ايەل قارىم-قاتىناستى قايتا جالعاستىرعىسى كەلگەن. بىراق ەكىنشى تاراپ (ەر ادام) ول كەزدە ۇيلەنگەن بولعاندىقتان, ءوز نەكەسىن ساقتاۋ ماقساتىندا پوليتسياعا ارىزدانۋعا ءماجبۇر بولعان», دەدى ول.
پوليتسيا مالىمەتىنشە, ەر ادامداردى قۋدالاعان ايەلدەرگە قاتىستى ازىرگە وسى ءبىر عانا فاكت تىركەلگەن. وقيعا بيىل بولعان. سونىمەن قاتار ەلەۋسىزوۆ قازىرگى ۋاقىتتا بالالارعا قاتىستى ستالكينگ دەرەكتەرى بويىنشا وندىرىستە قىلمىستىق ىستەر جوق ەكەنىن اتاپ ءوتتى.
تەرەزەدەن سىعالاپ, مازاسىن العان: اتىراۋ وبلىسىندا ستالكينگ تۋرالى جاڭا باپ نەگىزىندە ۇكىم شىقتى
پوليتسيا وكىلى قۋدالاۋعا قاتىستى قولدانىلاتىن جازالاردىڭ تيىمدىلىگى تۋرالى دا پىكىر ءبىلدىردى. تاجىريبە كورسەتكەندەي, اگرەسسورلاردىڭ كوبى سوتقا دەيىنگى تەرگەۋ كەزەڭىنىڭ وزىندە-اق قۋدالاۋىن توقتاتادى.
«العاش ۇستالعان كەزدە ادامعا زاڭ تالاپتارى تولىق تۇسىندىرىلەدى. ەگەر ول سوتقا دەيىنگى تەرگەۋ بارىسىندا دا قۋدالاۋىن توقتاتپاسا, بۇل كەيىن سوتتا قوسىمشا اۋىرلاتاتىن جاعداي رەتىندە قاراستىرىلۋى مۇمكىن», دەپ ءتۇسىندىردى ايتان ەلەۋسىزوۆ.
ايتا كەتەيىك, قازاقستاندا ستالكينگ ءۇشىن قىلمىستىق جاۋاپكەرشىلىك قاراستىرىلعان.
