ەكسپوزيتسيادا بىرنەشە جانردى ەركىن مەڭگەرگەن ونەر يەسىنىڭ كوپجىلدىق شىعارماشىلىق جولىنان سىر شەرتىپ, كوركەم قولتاڭباسىن كورسەتەتىن 60-تان اسا تۋىندى ۇسىنىلدى. شەكتەۋگە باعىنبايتىن شەبەر سۋرەتشى ءوز شىعارمالارىندا ءداستۇر مەن جاڭاشىلدىقتى ۇيلەستىرە وتىرىپ, كەڭىستىك پەن فورمانى تاجىريبە ارقىلى زەرتتەيدى. ءتۇس پەن كومپوزيتسيا كورەرمەننىڭ ەموتسيونالدى قابىلداۋىن وياتۋعا تالپىنادى.
قامي ايتقاليەۆتىڭ شىعارماشىلىعى تىنىمسىز ىزدەنىسكە تولى. اۆتور قۇراق قۇراۋ, شي توقۋ, ءجۇن وڭدەۋ سەكىلدى ءداستۇرلى قازاق قولونەرى ادىستەرىن زاماناۋي تۇرعىدا قولدانادى. بۇل تاسىلدەر ۇلتتىق مادەنيەتتىڭ تەرەڭ تامىرىنان قۋات الىپ, جاڭا فورما مەن مازمۇنعا جول اشادى. وسى ارقىلى ونىڭ تۋىندىلارى قازاق ساندىك-قولدانبالى ونەرىن جاڭاشا سەرپىنمەن جانداندىرىپ, وتكەن مەن بۇگىندى بايلانىستىرادى. بۇل ونىڭ «اڭىز انا» (2024), «جاڭبىردان كەيىن» (2024), «كۇتۋ» (2024), «اڭشىلار» (2023) اتتى شىعارمالارىندا ايقىن كورىنىس تاپقان. ءار جۇمىسىندا اۆتور تابيعاتپەن, داستۇرمەن جانە ادامنىڭ ىشكى الەمىمەن ۇندەسكەن ويلار مەن سەزىمدەردى شەبەر جەتكىزىپ, كورەرمەندى جاڭا كوزقاراسقا جەتەلەيدى. كوڭىل باۋراعان كەسكىندەر تەك قولونەردىڭ عانا ەمەس, سونىمەن قاتار فيلوسوفيالىق وي مەن مادەنيەتتىڭ كەڭ ءورىسىن اشادى.
«سۋرەتشى كەسكىندەمە جانرىندا دا وزىندىك شىعارماشىلىق ءتىلىن قالىپتاستىرعان. ونىڭ جۇمىستارىندا مونوحرومدى بوياۋ شەشىمدەرى, ساندىك جانە مونۋمەنتالدىق سيپات ايقىن بايقالادى. بۇل ەرەكشەلىك ايتقاليەۆتىڭ ىشكى كوركەمدىك قاجەتتىلىگىنەن تۋىنداپ, كەڭىستىكپەن ۇيلەسىمدى كومپوزيتسيالىق قۇرىلىم قۇرۋعا باعىتتالعان», دەيدى كورمە جەتەكشىسى اقبوتا اليمحوجينا.
سۋرەتشىنىڭ گرافيكالىق مانەردە ورىنداعان بىرەگەي تۋىندىلارى دا كورمە تورىنەن ورىن العان. بۇل شىعارمالار اۆتوردىڭ پلاستيكالىق ويلاۋ جۇيەسىن, سىزىق پەن ىرعاققا نەگىزدەلگەن ىزدەنىستەرىن ايقىنداي تۇسكەن.
شىعارماشىلىعى ۇلتتىق بولمىستى, تاريحي جادى مەن زاماناۋي كوركەمدىك ىزدەنىستەردى ۇيلەستىرگەن سۋرەتشى بيىل 80 جاسقا تولىپ وتىر. قازاق بەينەلەۋ ونەرىنىڭ دامۋىنا ەلەۋلى ۇلەس قوسىپ جۇرگەن شەبەرگە زور تابىس تىلەيمىز.
الماتى
