كوللاجدى جاساعان – امانگەلدى قياس, «EQ»
بولىس سابيتبەك الماتىداعى ءال-فارابي اتىنداعى قازاق ۇلتتىق ۋنيۆەرسيتەتىندە باكالاۆريات پەن دوكتورانتۋرا بويىنشا ءبىلىم العان. ماگيستراتۋرانى «حالىقارالىق باعدارلامالار ورتالىعى «بولاشاق» باعدارلاماسى ارقىلى اقش-تا تامامداعان. 24.kz مالىمەتىنشە, ول كەيىن لوندوندا, Queen Mary University of London ۋنيۆەرسيتەتىندە قىزمەت ەتىپ, قۇندى كاسىبي تاجىريبە جيناقتاعان. بۇگىندە ول الەمدەگى جەتەكشى زەرتتەۋ وقۋ ورىندارىنىڭ ءبىرى سانالاتىن گەنت ۋنيۆەرسيتەتىندە عىلىمي قىزمەتكەر بولىپ ەڭبەك ەتىپ ءجۇر.
وتانداسىمىز قازىر گيپەربولالىق تەڭدەۋلەر مەن قاتار جاساندى ينتەللەكتىنىڭ نەگىزىندە جاتقان فورمۋلالار, مودەلدەر مەن ەسەپتەۋ ادىستەرىن زەردەلەپ ءجۇر. بولىس سابيتبەك ازىرگە تولىق زەرتتەلمەگەن نەيروجەلى الگوريتمدەرىنىڭ قالاي جۇمىس ىستەيتىنىن ماتەماتيكالىق تۇرعىدان دالەلدەۋگە كۇش سالادى. ءوز كەزەگىندە ۋنيۆەرسيتەت باسشىلىعى ونىڭ عىلىمي ىزدەنىستەرىن قولداپ وتىر.
«وتكەن جىلى جۇمىس ساپارىمەن قازاقستانعا العاش رەت بارعانىمدا ءبىلىم بەرۋ جۇيەسىنىڭ دامۋ قارقىنى مەنى تاڭعالدىردى. ءبىز قازاقستان ۋنيۆەرسيتەتتەرىمەن ىنتىماقتاستىقتى نىعايتۋعا مۇددەلىمىز. قازىردىڭ وزىندە بىرقاتار جوعارى وقۋ ورىندارىمەن ۇزاق مەرزىمدى ارىپتەستىك ورناتىلعان. ءبىزدىڭ پروفەسسورلار قازاقستانعا تۇراقتى تۇردە بارىپ تۇرادى. ايتا كەتۋ كەرەك, گەنت ۋنيۆەرسيتەتى تەك اكادەميالىق الماسۋمەن شەكتەلمەيدى, سونىمەن قاتار بيوتەحنولوگيا, اۋىل شارۋاشىلىعى, جاساندى ينتەللەكت جانە تسيفرلاندىرۋ سالالارىندا بىرلەسكەن عىلىمي جوبالارعا قىزىعۋشىلىق تانىتىپ وتىر», دەيدى گەنت ۋنيۆەرسيتەتىنىڭ رەكتورى پەترا دە سۋتتەر.
قازىر بولىسپەن بىرگە گەنتتە تاعى ەلىمىزدىڭ ەكى عالىمى تاعىلىمدامادان ءوتىپ جاتىر. ولار ەلدىڭ اۋىل شارۋاشىلىعى سالاسىنا روبوتوتەحنيكا مەن جاساندى ينتەللەكتىنى ەنگىزۋدى جوسپارلاپ وتىر. بولىس سابيتبەك بولاشاقتا حالىقارالىق دەڭگەيدەگى جەكە ماتەماتيكالىق زەرتحانا قۇرۋ ءۇشىن ەلگە ورالۋدى كوزدەيدى.
قىسقى جۋرناليستيكا مەكتەبى: جي قۇرالدارىنىڭ جۋرناليستيكاداعى ءرولى قانداي؟
