كەزدەسۋ بارىسىندا پرەمەر-مينيستر ەادب-نىڭ كەزەكتى ستراتەگيالىق كەزەڭىنىڭ اياقتالعانى جانە ەلىمىزدە جوبالاردى جۇزەگە اسىرۋ ۇدەرىسى تۋرالى حاباردار ەتتى.
بانكتىڭ جيناقتالعان پورتفەلىندە ينۆەستيتسيالاردىڭ جالپى كولەمى 19,6 ملرد دوللار بولاتىن 326 جوبا بار. تەك 2022–2026 جىلداردىڭ وزىندە ەادب قاتىسۋشى ەلدەردىڭ ەكونوميكاسىنا 9 ملرد دوللار ينۆەستيتسيا قۇيدى. ونىڭ ىشىندە 5,2 ملرد دوللار ينۆەستيتسيالىق مىندەتتەمەلەر ەلىمىزگە تيەسىلى, بۇل بانكتىڭ بۇعان دەيىنگى 15 جىلداعى ينۆەستيتسيالار كولەمىنە تەڭ. كەيىنگى ءتورت جىلدا ەل ەكونوميكاسىنا سالعان ينۆەستيتسيا كولەمى جىل سايىن 1 ملرد دوللاردان استام بولسا, بىلتىر ول 1,5 ملرد دوللارعا جەتتى. ەلىمىزدىڭ ەادب-نىڭ قازىرگى ينۆەستيتسيالىق پورتفەلىندەگى ۇلەسى بۇگىندە 64,9%-دى قۇرايدى. بانكتىڭ ەلىمىزگە سالعان ينۆەستيتسيالارى نەگىزگى سەكتورلارعا قاراي بولىنگەن: شامامەن 2,1 ملرد دوللار – ونەركاسىپتى دامىتۋعا, 1 ملرد دوللار – ەنەرگەتيكاعا, 1 ملرد دوللار – كولىك ينفراقۇرىلىمىنا, 1 ملرد دوللار قارجى سەكتورىنا باعىتتالعان.
قارجى بولىنگەن ماڭىزدى جوبالاردىڭ ىشىندە «سيللەنو» گاز وڭدەۋ زاۋىتىنىڭ, اتىراۋ وبلىسىنداعى KPI گاز-حيميا كەشەنىنىڭ قۇرىلىسى, تاۋ-كەن مەتاللۋرگيا كەشەنىنىڭ كاسىپورىندارىن جاڭعىرتۋ, قاراعاندى, الماتى, اقتوبە قالالارىنداعى جەو-لاردى قايتا جاڭارتۋ, تاعى باسقالار بار. بانك ءداستۇرلى ەنەرگەتيكانىڭ دا, جاڭارتىلاتىن ەنەرگەتيكانىڭ دا دامۋىن بەلسەندى قولدايدى. اتاپ ايتقاندا, ەلىمىزدە شامامەن ءاربىر 8 كۆت ەادب قاتىسۋىمەن وندىرىلگەن. بۇل – قاراعاندى, تۇركىستان, اقمولا, تاعى دا باسقا وبلىستارداعى جوبالار. كولىك سالاسىندا قتج ءۇشىن لوكوموتيۆتەر مەن جۇك ۆاگوندارىن جەتكىزۋ, اۆتوموبيل جولدارىن رەكونسترۋكتسيالاۋ جوبالارى قارجىلاندىرىلدى. تسيفرلىق باستامالار قورى مەن تەحنيكالىق جاردەمدەسۋ تەتىكتەرى ارقىلى جي مەن تسيفرلىق پلاتفورمالاردى دامىتۋ سالاسىنداعى جوبالارعا قولداۋ كورسەتىلەدى.
بيىل دا ەادب ءىرى جوبالاردى, ونىڭ ىشىندە وڭدەۋ ونەركاسىبىندە, تاۋ-كەن ءوندىرۋ سەكتورى مەن تاعى دا باسقا سالالاردا قارجىلاندىرۋدى جالعاستىرادى. اتاپ ايتقاندا, وسكەمەندەگى جەو-نى جاڭعىرتۋ جالعاسادى. بۇل قالانى جىلۋمەن جابدىقتاۋ سەنىمدىلىگىن ارتتىرۋعا, جابدىقتاردىڭ توزۋىن ازايتۋعا مۇمكىندىك بەرەدى. تۇركىستان مەن قىزىلوردا وبلىستارىندا جاڭا ءوندىرۋشى قۋاتتاردى ىسكە قوساتىن ەكى كۇن ەلەكتر ستانساسىن سالۋ جوسپارلانعان. تەلەكوممۋنيكاتسيا سالاسىندا بايلانىس ينفراقۇرىلىمى مەن تسيفرلىق قامتۋدى دامىتۋعا ينۆەستيتسيالار كوزدەلگەن. ونەركاسىپتە ءوندىرىستى ۇلعايتۋعا, جاڭا جۇمىس ورىندارىن اشۋعا باعىتتالعان جوبالاردى جۇزەگە اسىرۋ كوزدەلگەن.
ەادب باسقارما توراعاسى بانكتىڭ ەل ەكونوميكاسىن دامىتۋعا, ازاماتتاردىڭ ءومىر ءسۇرۋ ساپاسىن جاقسارتۋعا جان-جاقتى جاردەمدەسۋگە دايىن ەكەنىن اتاپ ءوتتى. سونداي-اق ەلىمىزدە جۇرگىزىلىپ جاتقان كونستيتۋتسيالىق رەفورما ينۆەستيتسيالىق احۋالدى دا ودان ءارى جاقسارتۋعا ىقپال ەتەتىنىن جەتكىزدى.
پرەمەر-مينيستر مەملەكەتتىڭ قازىرگى باسىمدىقتارىنا سايكەس كەلەتىن بازالىق ينفراقۇرىلىمدى دامىتۋعا ينۆەستيتسيا سالۋدىڭ ماڭىزدىلىعىنا توقتالدى. ءوزارا ءىس-قيمىلدىڭ باستى باعىتتارىنىڭ ءبىرى – ەلىمىزدە دە, باسقا ەلدەردە دە بەلسەندى دامىپ كەلە جاتقان تسيفرلىق كۇن ءتارتىبى. بۇل باعىتتا بىرلەسىپ جۇمىس ىستەۋگە ايتارلىقتاي الەۋەت بار.
كەزدەسۋ قورىتىندىسىندا سىندارلى ارىپتەستىكتى ودان ءارى نىعايتۋدىڭ, ەل ەكونوميكاسىنىڭ تۇراقتى دامۋى مۇددەسىندە ينۆەستيتسيالىق ىنتىماقتاستىقتى كەڭەيتۋدىڭ ماڭىزدى ەكەنى اتاپ ءوتىلدى.
