الماتىدا اۋداندىق ونكولوگتار مەن ماممولوگتاردىڭ ءىى رەسپۋبليكالىق سەمينار-كەڭەسى ءوتتى. ەلىمىزدىڭ تۇكپىر-تۇكپىرىنەن 330 دەلەگات قاتىسقان القالى جيىندا 14 وبلىس پەن الماتى, استانا قالالارىنىڭ دەنساۋلىق ساقتاۋ باسقارمالارىنىڭ وكىلدەرى, ونكولوگيالىق ديسپانسەر دارىگەرلەرى باس قوسىپ, ونكوقىزمەتتى جەتىلدىرۋ جولدارىن قاراستىرىپ, وتاندىق دەنساۋلىق سالاسىنىڭ ماڭىزدى ماسەلەلەرىن تالقىلادى.
الدىمەن جيىنعا كەلگەن مامانداردى پارلامەنت ءماجىلىسىنىڭ دەپۋتاتى ايتكۇل ساماقوۆا قۇتتىقتاپ, باسقوسۋدىڭ ماڭىزدىلىعىن اتاپ ءوتتى. «وتاندىق ونكولوگيا جىل سايىن دامىپ كەلەدى. قاتەرلى ىسىكپەن كۇرەستە ونكولوگتار مەن ماممولوگتاردىڭ قىزمەتى اسا ماڭىزدى. سوندىقتان جۇمىستارىڭىزعا تابىس تىلەيمىن», – دەدى ول.
بۇل جولعى سەميناردا نەگىزىنەن بەس ماسەلە كۇن تارتىبىنە قويىلدى. ولار – ونكولوگيالىق قىزمەت پەن امبۋلاتورلىق-ەمحانالىق ۇيىمدار قىزمەتىن بىرىكتىرۋ, ونكولوگيالىق, ماممولوگيالىق, ەرلەر جانە ايەلدەردى قاراۋ ءبولىمدەرىنىڭ جۇمىسىن جانداندىرۋ, 65 جانە ودان جوعارى جاستاعىلار اراسىندا قاتەرلى ىسىكتى ەرتە ساتىسىندا انىقتاۋ ءۇشىن سكرينينگتىك جانە وبىردىڭ الدىن الۋ باعدارلامالارىن جۇزەگە اسىرۋ, ونكولوگيالىق قىزمەت سالاسىنا مونيتورينگ جانە باعالاۋ جۇيەسىن ەنگىزۋ, قاتەرلى دەرتكە شالدىققان ناۋقاستارعا مەديتسينالىق-الەۋمەتتىك قىزمەت كورسەتۋ. جالپى بۇگىنگى تاڭدا 2012-2016 جىلدارعا ارنالعان قر ونكولوگيالىق كومەكتى جەتىلدىرۋ باعدارلاماسى اياسىندا 101 ونكولوگيالىق, 273 ماممولوگيالىق, 18 پروكتولوگيالىق ءبولىم اشىلىپ, جۇمىس جاساۋدا. سونىمەن قاتار, كۇن تارتىبىندە بۇل بولىمدەردىڭ جۇمىسىن جانداندىرىپ, قاتەرلى ىسىكتىڭ الدىن الۋ مەن ونى ەرتە ساتىسىندا انىقتاۋ دا ماڭىزدى ورىنعا يە. ەلىمىزدە اۋداندىق ونكولوگتار سانى 350-گە (2011ج. – 263), ال ماممولوگتار 207-گە (2013 ج. – 166) دەيىن ارتتى. رەسمي مالىمەتكە سۇيەنسەك, 2015 جىلدىڭ 6 ايىندا 17 130 قاتەرلى ىسىككە شالدىققان ناۋقاس تىركەلسە, ونىڭ 55,4 پايىزى I-II ساتىسىنداعىلار. وبىر دەرتىنىڭ كورسەتكىشى سولتۇستىك, شىعىس قازاقستان مەن پاۆلودار وبلىسىندا باسقالارعا قاراعاندا جوعارى. – بۇگىنگى سەميناردا اۋداندىق ونكولوگتار مەن ماممولوگتارعا 2016-2020 جىلدارعا ارنالعان باعدارلامانىڭ باعىتتارىن ءتۇسىندىرىپ, ءوزارا پىكىر الماسۋدى نەگىزگى ورىنعا قويدىق, – دەدى جۋرناليستەرگە بەرگەن سۇحباتىندا قازاق ونكولوگيا جانە راديولوگيا عزي ديرەكتورى قۋانىش نۇرعازيەۆ. – ال ولار ءار اۋداندا حالىقپەن ءتۇسىندىرۋ جۇمىستارىن ءجۇرگىزەتىن بولادى. وعان قوسا, ءار ادامنىڭ دەنساۋلىعىنا دەگەن جاۋاپكەرشىلىگىن كوتەرۋ شارالارىن دامىتادى. سونىمەن قاتار, جاڭا تەحنولوگيالار ەنگىزۋ ءۇردىسىن دامىتۋ ءۇشىن قىزمەتكەرلەرگە شەبەرلىك سىنىپتارىن ۇيىمداستىرۋ دا باستى نازارىمىزدا. سونداي-اق, فورۋمدا دەنساۋلىق ساقتاۋ جانە الەۋمەتتىك دامۋ مينيسترلىگىنىڭ مەديتسينالىق كومەكتى ۇيىمداستىرۋ دەپارتامەنتى ديرەكتورى گۇلنار قۇلقاەۆا اۋداندىق مامانداردى جيناپ وتىرعانداعى ماقساتتارى ونكواۋرۋلار بويىنشا ءولىم-ءجىتىم كورسەتكىشىن ازايتۋ ەكەندىگىن, تىلگە تيەك ەتە كەلىپ, بىزگە ءدال وسى جولدا اۋداندىق مامانداردىڭ كومەگى اسا قاجەتتىگىن, اسىرەسە, العاشقى كومەك كورسەتۋ قىزمەتىندە دە ولاردىڭ ەڭبەگى وراسان زور ەكەندىگىن اتاپ ءوتتى. سەمينار سوڭىندا ەلىمىزدەگى ونكوقىزمەتتى ارتتىرۋعا ۇلەس قوسقان اۋداندىق ونكولوگتار مەن ماممولوگتار ماراپاتتالدى.
گۇلزەينەپ سادىرقىزى, «ەگەمەن قازاقستان».
