قايىرىمدىلىقتى ناسيحاتتايتىن «التىن جۇرەك»

قوعامدا قايىرىمدىلىق قاعيداسىن ناسيحاتتاۋ نيەتىمەن جىل سايىن تاپسىرىلاتىن ۇلتتىق «التىن جۇرەك» سىيلىعى بيىل توعىزىنشى مارتە ۇيىمداستىرىلىپ وتىر. وسى ورايدا جوبانى ۇيىمداستىرۋشىلار الماتىداعى قازاقستان ءباسپاسوز كلۋبىندا جۋرناليستەرمەن كەزدەستى. «باۋىرجان» قايىرىمدىلىق قورى, مۇگەدەك بالالاردىڭ اتا-انالارى اسسوتسياتسياسى جانە «انا ءۇيى» ورتالىعى مەن اتالمىش سىيلىقتىڭ بۇدان بۇرىنعى يەگەرلەرى قاتىسقان ءباسپاسوز وتىرىسىندا ۇيىمداستىرۋشىلار توعىزىنشى مارتە وتكىزىلگەلى وتىرعان قايىرىمدىلىق سىي­لىعىن تاپسىرۋ راسىمىنە ەنگىزىلگەن جا­عىمدى جاڭالىقتار تۋرالى ايتىپ بەردى. بيىلعى ءراسىمنىڭ ءبىر ەرەكشەلىگى, سىيلىقتى سالتاناتتى تۇردە تاپسىرۋ كەشىندە قايىرىمدىلىق اۋكتسيو­ن­ى وتكىزىلىپ, اۋكتسيون لوتتارىنا ايگىلى «ميلان» فۋتبول كومانداسى ويىنشىلارىنىڭ قولتاڭباسى بار فۋتبول دوبى, الەم­دىك جانە وتاندىق سپورت جۇل­دىز­دارىنىڭ بۇيىمدارى مەن قۇرال-جابدىقتارى سەكىلدى باعالى سىيلىقتار قويىلادى. – «التىن جۇرەك» سىيلىعىن تاپسىرۋدى العاش قولعا العان كەزىمىزدە ەلىمىز بويىنشا 90 ادامنان عانا ءوتىنىش تۇسكەن ەدى. بىلتىر سىيلىققا ۇسىنۋشىلار سانى 200-گە جەتسە, بيىل بىزگە 10 كۇننىڭ ىشىندە ۇسىنىلعان ءۇمىت­كەرلەر سانى 100-دەن اسىپ وتىر. ءبىزدىڭ قوعامدا شىرىگەن بايلار ەمەس, قاراپايىم ادامدار قايى­رىمدىلىقپەن تۇراقتى تۇردە اينالىساتىندىعىن دا بىزدەگى كورسەتكىشتەن بايقاۋعا بولادى, – دەيدى «باۋىرجان» قايىرىمدىلىق قورىنىڭ پرەزيدەنتى جۇلدىز وماربەكوۆا. قايىرىمدىلىق جوباسى مەملەكەتتەن قارجىلاندىرىلمايتىن بولعاندىقتان بيىلدان باستاپ دەمەۋشىلىك كورسەتۋشىلەر ءۇشىن «فورتە بانكتەن» ارنايى جارنا-قايىرىمدىلىق ەسەبىن اشىپ, قارجىلىق قولداۋ قورىن قۇرىپ وتىر. بۇل قارجىلىق قوردىڭ ماق­ساتى كەلەشەكتە وتاندىق مە­تسە­ناتتارعا قارجىلىق كومەك كورسەتۋ. «التىن جۇرەك» ۇلتتىق قو­عام­دىق سىيلىعى 2007 جىلى مەتسەناتتىق جانە قايىرىمدىلىق يدەيالارىن ناسيحاتتاۋ ماقساتىندا «باۋىرجان» قايىرىمدىلىق قورىنىڭ باستاماسىمەن تاعايىن­دالعان بولاتىن. وسى ۋاقىت ارالى­عىندا ەلىمىزدە سان مىڭداعان قايىرىمدىلىق ىستەر اتقارىلىپ, قوعامدا باۋىرمالدىق پەن يگى شارالار اتقارۋ نيەتى ەداۋىر ارتتى. اتالمىش سىيلىق تاپسىرىلا باستاعان كەزدەن بەرى 100-دەن اسا مەكتەپ, 300 سپورت جانە ويىن الاڭدارى, 70 بالالار باقشاسى بوي كوتەرىپ, ون مىڭداي ادامنىڭ ءومىرى قۇتقارىلدى. ۇيىمداستىرۋشىلاردىڭ ايتۋىنشا, قۇرامىندا قايىرىمدىلىق ۇيىمدارىنىڭ باسشىلارى, قازاقستان رەسپۋبليكاسىنىڭ قوعام جانە مادەنيەت قايراتكەرلەرى بار ساراپتامالىق جانە قوعامدىق كەڭەس وتىنىشتەردى قاراپ, ۇمىتكەرلەردى ىرىكتەيدى جانە انىقتايتىن بولادى. «التىن جۇرەك» ۇلتتىق-قوعامدىق قايىرىمدىلىق سىي­لىعى «جەتىم بالالارعا كورسەتكەن قامقورلىعى ءۇشىن», «بىلىمگە قولداۋ كورسەتكەنى ءۇشىن», «مۇگەدەك جاندارعا كورسەتكەن قامقورلىعى ءۇشىن», «اقپاراتتىق قولداۋشى», «قازاقستاننىڭ وركەندەۋىنە قوسقان ۇلەسى ءۇشىن», «جىل مەتسەناتى» سەكىلدى 11 نوميناتسيادان تۇرادى. بيىلعى جوباعا ءوتىنىش قابىلداۋ ۋاقىتى تامىز ايىنىڭ باسىنان قىركۇيەك ايىنا دەيىن جۇرگىزىلىپ, سىيلىقتاردى سالتاناتتى تۇردە تاپسىرۋ ءراسىمى قازان ايىندا الماتى قالاسىندا وتەدى. قانات ەسكەندىر, «ەگەمەن قازاقستان». الماتى.