پوليتسيا قىزمەتكەرى... ادام ءولتىردى

ءيا, سولاي, پوليتسەي ايدىڭ-كۇننىڭ امانىندا ادام ءولتىردى. باسقاسى باسقا, پوليتسيا قىزمەتكەرى ادام ءولتىرۋشى مە ەدى دەيسىز عوي. ويتكەنى, ادام بىرەۋدەن ءزابىر كورسە, قۇقى تاپتالسا, كىسى ولتىرۋشىلەر كەلسە, ەڭ اۋەلى پوليتسەيلەرگە شاعىم ايتادى. بىراق, «ءبىر قارىن مايدى ءبىر قۇمالاق شىرىتەدى» دەگەندەي, قازىرگى كۇنى قوي تەرىسىن جامىلعان قاسقىر كەيپىندەگى پوگون تاققانداردىڭ كەزدەسەتىنى وكىنىشتى-اق. بۇلاي دەۋىمىزگە تالاي مىسال بار. سونىڭ ءبىرى اتىراۋداعى پوليتسيا قىزمەتكەرىنىڭ ادام ءولتىرۋ كۇدىگىمەن قاماۋعا الىنۋى دەر ەدىك. ناقتىلاي ايتقاندا, قۇقىق قورعاۋ ورنىنا جەرگىلىكتى ازامات ءوزىنىڭ تۋىسىنىڭ ءىز-ءتۇزسىز جوعالعانى تۋرالى شاعىمدانعان. جوعالعان ازاماتتى ىزدەستىرۋ بارىسىندا بۇل قىلمىسقا پوليتسيا قىزمەتكەرىنىڭ قاتىسى بار دەگەن اقپارات الىندى, دەپ حابارلادى وبلىستىق ىشكى ىستەر دەپارتامەنتىنىڭ ءباسپاسوز حاتشىسى گۇلنازيرا مۇحتاروۆا. سودان قازىرگى كۇنى وسى قىلمىسقا كۇدىكتى 1993 جىلى تۋعان پوليتسيا قىزمەتكەرى انىقتالىپ, ۇستالعان. ىزدەستىرۋ شارالارىمەن قالادان 33 شاقىرىم قاشىقتاعى اتىراۋ-يندەر تاس جولىنىڭ العا اۋىلى تۇسىندا, دالادا كومىلىپ تاستالعان جابىرلەنۋشىنىڭ دەنەسى تابىلعان. قازىر ادام ءولتىرۋ قىلمىسىنا كۇدىكتى ەكەۋ, ءبىرى – پوليتسيا قىزمەتكەرى, ەكىنشىسى – وزبەكستان رەسپۋبليكاسىنىڭ ازاماتى ۋاقىتشا وقشاۋلاۋ ورنىنا قاماۋعا الىندى. ال بۇدان كەيىن, ياعني قاراقشىلىق جولمەن ادام ولتىرگەن پوليتسەيلەرگە دەگەن سەنىم قاراپايىم حالىقتا قالاي بولماق؟ مۇنداي سوراقىلىققا ءىىم باسشىلىعى نە دەيدى؟ ادام ءولتىرۋ جالعاسا بەرە مە؟ الدە تىيىلا ما؟ جولداسبەك شوپەعۇل, «ەگەمەن قازاقستان». اتىراۋ.