بلوكچەين-زەرتتەۋلەرمەن اينالىساتىن ساراپشىلاردىڭ دەرەگىنشە, ءباا ۇكىمەتىمەن بايلانىستى كريپتوامياندا 6 786 بيتكوين ساقتاۋلى. قازىرگى باعام بويىنشا بۇل شامامەن 455 ملن دوللارعا تەڭ. ەل باسشىلىعى وندىرىلگەن مونەتالاردى ساۋداعا سالماي, بالانستا ساقتاۋ ستراتەگياسىن ۇستانىپ وتىر. ءامياننان سوڭعى قاراجات قوزعالىسى ءتورت اي بۇرىن تىركەلگەن.
وندىرىلگەن بيتكويندەر بويىنشا ىسكە اسىرىلماعان پايدا 344 ملن دوللار كولەمىندە باعالانىپ وتىر. الايدا بۇل ەسەپتەۋلەردە ماينينگتىڭ نەگىزگى شىعىنى – ەلەكتر ەنەرگياسىنىڭ قۇنى ەسكەرىلمەگەن.
«قارا التىن» ارزانداپ, بيتكوين قۇبىلدى: الەمدىك نارىقتى 2026 جىلى نە كۇتىپ تۇر؟
Arkham اگەنتتىگىنىڭ مالىمەتىنە سايكەس, كەيىنگى ون كۇندە ۇكىمەتتىك اميانعا كۇن سايىن ورتا ەسەپپەن 4,2 بيتكوين ءتۇسىپ وتىرعان. قازىرگى باعام (شامامەن 67 مىڭ دوللار) بويىنشا بۇل تاۋلىگىنە 280 مىڭ دوللار شاماسىندا. اقپان ايىنىڭ باسىندا تاۋلىكتىك ءتۇسىم 4 بيتكويننان اسپاعان ەدى.
مامانداردىڭ ەسەپتەۋىنشە, مۇنداي كولەمدى قامتاماسىز ەتۋ ءۇشىن جابدىق قۋاتى شامامەن 8,5 مىڭ پەتاحەش/سەكۋند بولۋى ءتيىس. ءوندىرىس Foundry ماينينگ-پۋلى ارقىلى جۇزەگە اسادى.
كريپتوۆاليۋتادان پايدا تاپپاق بولعان ازامات 1 ملن تەڭگەسىنەن ايىرىلدى
ءباا – بۇگىندە تىكەلەي ءوندىرىس (ماينينگ) ارقىلى بيتكوين قورىن قالىپتاستىرىپ وتىرعان ساناۋلى مەملەكەتتەردىڭ ءبىرى. مۇنداي ستراتەگيانى سونداي-اق بۋتان مەن سالۆادور قولدانادى.
BitcoinTreasuries پلاتفورماسىنىڭ دەرەگىنشە:
-
بۋتان – 5,6 مىڭ بيتكوين;
-
سالۆادور – 7,5 مىڭ بيتكوين;
-
ءباا – 6 786 بيتكوين.
ياعني امىرلىكتەر بۇل كورسەتكىش بويىنشا ەكى ەلدىڭ ورتاسىندا تۇر.
ال مەملەكەتتەر اراسىنداعى جاھاندىق رەيتينگتە كوش باستاپ تۇرعاندار:
-
اقش – 328 مىڭ بيتكوين;
-
قىتاي – 190 مىڭ بيتكوين;
-
ۇلىبريتانيا – 61 مىڭ بيتكوين.
الايدا بۇل ەلدەر نەگىزىنەن بيتكوين قورىن حاكەرلەر مەن كولەڭكەلى پلاتفورمالاردان تاركىلەۋ ارقىلى تولىقتىرادى. ال ءباا, بۋتان جانە سالۆادور ونەركاسىپتىك ماينينگكە باسىمدىق بەرىپ وتىر.
Arkham ساراپشىلارى مەملەكەتتىك كريپتوقورلاردىڭ ناقتى كولەمىن ءجىتى باقىلاۋ مۇمكىن ەمەس ەكەنىن اتاپ ءوتتى. سەبەبى الەم ەلدەرىنىڭ ۇكىمەتتەرىنە تيەسىلى تسيفرلىق ءاميانداردىڭ بارلىعى بىردەي جاريا ەتىلە بەرمەيدى.
