سوڭعى التى ايدا وڭتۇستىك قازاقستان وبلىسىندا 90 ملرد. تەڭگەدەن استام اۋىلشارۋاشىلىق ءونىمى ءوندىرىلدى. ونەركاسىپ ءونىمىنىڭ كولەمى وسى مەرزىمدە 3,6 پايىزعا كوبەيىپ, 281,1 ملرد. تەڭگەگە جەتتى. وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى اسقار ابدۋللاەۆ يندۋستريالاندىرۋ كارتاسى اياسىندا 65,8 ملرد. تەڭگەگە 36 جوبانى ىسكە اسىرىپ, 3200 جاڭا جۇمىس ورنىن اشۋ كوزدەلۋدە دەگەندى ايتادى. ەسەپتى كەزەڭدە 17,7 ملرد. تەڭگەگە 4 جوبا ىسكە قوسىلىپ, 1190 جۇمىس ورنى اشىلعان. ال اۋىل شارۋاشىلىعىندا جالپى ءونىمىنىڭ كولەمى 90,9 ملرد. تەڭگەنى قۇراسا, ونىڭ ىشىندە مال شارۋاشىلىعىندا – 78,8 ملرد. تەڭگە, ەگىن شارۋاشىلىعىندا 11,9 ملرد. تەڭگە ءونىمى ءوندىرىلدى. باسقارما باسشىسىنىڭ ايتۋىنشا, نەگىزگى كاپيتالعا سالىنعان ينۆەستيتسيالار كولەمى – 141,3 ملرد. تەڭگە. ال قۇرىلىس جۇمىستارىنىڭ كولەمى 65,2 ملرد. تەڭگەنى قۇراپ 8,4 پايىزعا ارتسا, ىسكە قوسىلعان تۇرعىن ۇيلەردىڭ الاڭى 179 مىڭ شارشى مەتر. سونىمەن قاتار, مەملەكەتتىك بيۋدجەتتىڭ كىرىسى 95,7 ملرد. تەڭگە, ول وتكەن جىلدىڭ وسى كەزەڭىمەن سالىستىرعاندا – 97,6 پايىز. وڭتۇستىك – اگرارلى وبلىس. تابيعاتى قاتال وڭىردەگى اعايىندارداي ەمەس, مۇندا جەردەن ءونىم الۋعا مۇمكىندىكتەر كوپ. بىراق, باياعىداي شىبىقتى تەرىس قاداساڭ دا كوكتەپ كەتەتىن, تۋسىرىلىپ جاتقان تىڭ جەر جوق. اگروتەحنيكالىق تالاپتار قاتاڭ ساقتالماسا كوڭىلدەگىدەي ءونىم الۋ قيىن. مۇنى عالىمدار دا ءجيى ايتىپ, دابىل ۇرىپ ءجۇر. امەريكا, قىتاي, ەۋروپا مەملەكەتتەرىندە فەرمەرلەر جەرىنىڭ ءبىر ۋىسىن قالتا قاپقا سالىپ عىلىمي-زەرتتەۋ ينستيتۋتىنا اپارىپ بەرسە, وعان قانداي تىڭايتقىشتار كەرەك ەكەندىگىن سول مەزەت ايقىنداپ بەرەدى. بىزدە عىلىمنىڭ وسى تۇسى اقساپ تۇر. ويتكەنى, اگرونوم ماماندىعىنان تۇك حابارى جوق, جۇرت ايتتى دەپ سەليترانى جەرگە مولشەردەن تىس كوپ بەرگەن ازاماتتاردىڭ ءبىرازى بيىل سالعان ينۆەستيتسياسىنىڭ ورنىن جابا الماي قالدى. وبلىس اكىمدىگى وسىنداي كەلەڭسىزدىكتەردى بولدىرماۋ ماقساتىندا ءجيى سەمينارلار وتكىزۋدە. حالقىنىڭ سانى ميلليونعا جەتەعابىل شىمكەنتتە بيىل اۋىل شارۋاشىلىعى ماقساتىنداعى جەردىڭ كولەمى بەس ەسە ءوستى. بۇل 2014 جىلعى باس جوسپارعا سايكەس سايرام, تولە بي جانە ورداباسى اۋداندارىنان قوسىلعان جەر كولەمى ارقىلى كوبەيگەن. وڭتۇستىك جاعدايىندا شىمكەنتتىڭ مەگاپوليس ەكەندىگىن ەسكەرسەك, وسى جەرلەر ارقىلى قالانىڭ كوكونىس, باۋ-باقشا ونىمدەرىنە قاجەتتىلىگىن تولىق شەشىپ الۋعا بولادى. بۇگىندە وبلىستىڭ بيۋدجەتى 461 ملرد. بولسا, وزىندىك كىرىس 17 ملرد. تەڭگەدەن ءسال اسادى. بيىل 1 شىلدەگە دەيىن تۇسكەن سالىقتار مەن باسقا تولەمدەردىڭ مولشەرى 95,7 ملرد. تەڭگەگە جەتكەن. بۇنى جىلىكتەگەندە رەسپۋبليكالىق بيۋدجەتكە 49,4 ملرد. تەڭگە, جەرگىلىكتى بيۋدجەتكە 46,3 ملرد. تەڭگە تۇسكەن. وبلىس اكىمى وسىنىڭ ءبارىن شوتقا سالىپ, كوبىرەك تابىس تابۋ, جاڭا جۇمىس ورىندارىن اشۋ, وبلىس مۇمكىندىگىن ءتيىمدى پايدالانۋ ماسەلەسىنە وراي ءجيى جيىن وتكىزەدى. جاقىندا وتكەن كەڭەستە ءوڭىر نارىعىن وتاندىق تۇتىنۋ تاۋارلارىمەن قامتۋ ماسەلەسى تالقىلاندى. كەڭەستە «شىمكەنت» الەۋمەتتىك كاسىپكەرلىك كورپوراتسياسى جۇرگىزگەن تالداۋ ناتيجەلەرى تانىستىرىلدى. بۇگىندە ءوڭىر نارىعى 5,5 ترلن. تەڭگە بولسا, سونىڭ 30 پايىزعا جۋىعىن ازىق-ت ۇلىك تاۋارلارى, قالعانىن بۇل ساناتقا جاتپايتىن ساۋدا ونىمدەرى قۇراعان. وسىعان بايلانىستى ساراپشىلار حالىقتىڭ ءوندىرىس پەن تۇتىنۋ مولشەرىن ايقىنداپ, ءار اۋدان, قالالاردا قانداي جوبالارعا باسىمدىلىق بەرۋىن زەردەلەگەن. تاماق ونەركاسىبى سالاسىن دامىتۋ باعىتىندا ازىرلەنگەن بۇل جوبادا ءار ايماقتىڭ تابيعي-كليماتتىق ەرەكشەلىكتەرى مەن قاجەتتى شيكىزات ءوندىرۋ ءمۇمكىندىكتەرى ەسكەرىلگەن. جاسالعان ءىس-شارالار جوسپارىنا سايكەس وڭىرىمىزدە 215 جوبانى ىسكە اسىرۋ جوسپارلانۋدا. ياعني, ءار اۋداندا 15 جوبادان قولعا الىنباقشى. الدىن الا جاسالعان بولجامدارعا سايكەس وسى كاسىپورىنداردا 10 مىڭعا جۋىق جاڭا جۇمىس ورىندارى قۇرىلماق. جوبالار تاماق ونەركاسىبىمەن قاتار قۇرىلىس ونىمدەرىن دە وندىرۋگە باعىتتالعان. تالداۋ ناتيجەلەرىن ساراپقا سالعان ءوڭىر باسشىسى باستى مىندەت – يمپورتتىق تاۋەلدىلىكتەن ارىلۋ ەكەندىگىن نازارعا الىپ, ازىق-ت ۇلىك تاۋارلارىن وندىرۋدە وتاندىق كاسىپورىنداردىڭ وندىرىستىك قۋاتتىلىعىن تەرەڭىنەن تالداپ, شىعاراتىن تاۋار اسسورتيمەنتتەرىن ايقىنداۋ جانە دايىن ءونىمدى ساتۋ نارىعىن بەلگىلەۋدە اتقارىلاتىن جۇمىستاردى اتقارۋدى تاپسىردى. ءسۇت, ەت وڭدەۋ كاسىپورىندارىنىڭ جۇمىسىن جەتىلدىرۋ باعىتىندا دۇرىس لوگيستيكا جۇيەسىن قالىپتاستىرۋدى مىندەتتەدى. وڭتۇستىك قازاقستان وبلىسى ەلىمىزدەگى اگرارلىق شارۋاشىلىعى وركەندەگەن وڭىرلەردىڭ ءبىرى ەكەندىگىنە كوڭىل بولگەن وبلىس اكىمى ىشكى نارىقتى اۋىلشارۋاشىلىق ونىمدەرىمەن جىل بويى قامتۋ وزەكتى مىندەت دەپ بەلگىلەدى. وسى ورايدا اۋىلشارۋاشىلىق ونىمدەرىن ساقتايتىن قويمالاردى زاماناۋي تالاپتارعا سايكەستەندىرىپ, ونىمدەردى جىل بويى ساقتاۋعا جانە قاجەتتى لوگيستيكانى دامىتۋعا جاعداي جاساۋ كەرەك دەدى. ىشكى نارىقتى قاجەتتى ونىمدەرمەن جىل بويى قامتىپ وتىرعان شارۋالارعا مەملەكەتتىك قولداۋ شارالارىن قاراستىرۋدى تاپسىردى. سونداي-اق, ءوڭىر باسشىسى وبلىستىڭ برەندى رەتىندە قاقتالعان قاۋىن ءونىمىن ەحرو-2017 كورمەسىنە شىعارۋدى ۇسىنىپ, وسى باعىتتا جۇمىستار اتقارۋدى جۇكتەدى. وڭتۇستىكتە وسىنداي شارالار كەزەڭ-كەزەڭىمەن ىسكە اسىپ جاتىر. قازىر «الما ءپىس, اۋزىما ءتۇس» دەيتىن زامان ەمەس. دەر كەزىندە قامدانىپ قالعاندار ۋاقىتتان ۇتادى, شارۋاسى ىلگەرىلەيدى. بۇگىندە وبلىس اكىمى باسقارما باسشىلارىن قاسىنا الىپ, ءار اۋدان, قالاعا جۇمىس ساپارىمەن بارۋدا. جىل باسىندا اكىمدىك تاراپىنان بەرىلگەن تاپسىرمالاردىڭ قالاي ورىندالعاندىعىنا باقىلاۋ جۇرگىزىپ, جەرگىلىكتى جەردەگى قوردالانعان ماسەلەلەردى شەشۋدىڭ جولىن ايقىندايدى.
باقتيار تايجان, «ەگەمەن قازاقستان».
وڭتۇستىك قازاقستان وبلىسى.
