ەلىمىزدىڭ بارلىق ءوڭىرىن قامتىعان اقپاراتتىق ناۋقاننىڭ اۋقىمى كۇن ساناپ كەڭەيىپ كەلەدى. ءتۇسىندىرۋ جۇمىستارى ەندى اۋىل-ايماقتارعا دەيىن جەتىپ, وڭىرلەردە «ەسىكتەن ەسىككە» اكتسياسى باستاۋ الدى. سونىمەن قاتار, كواليتسيا قۇرامىنداعى رەسپۋبليكالىق جاستار ۇيىمدارى جوعارى وقۋ ورىندارى مەن كوللەدج ستۋدەنتتەرى اراسىندا ارنايى كەزدەسۋلەر وتكىزىپ, رەفەرەندۋمنىڭ ءمانى مەن ماڭىزىن جان-جاقتى تۇسىندىرۋدە.
جالپىۇلتتىق كواليتسيا شتابىنىڭ مۇشەسى, اباي وبلىستىق «جاستار رۋحى» توراعاسى تەمىرلان باقتياروۆ ناۋقاننىڭ جاڭاسەمەي اۋدانىنا قاراستى جارقىن اۋىلىندا جالعاسىپ جاتقانىن اتاپ ءوتتى.
«كواليتسيا بەلسەندىلەرى وبلىس ورتالىقتارى مەن قالالاردان بولەك, اۋدان جانە اۋىل تۇرعىندارىن دا تولىق قامتۋعا باسىمدىق بەرىپ وتىر. بۇگىن جارقىن اۋىلىندا حالىقپەن جۇزدەسىپ, الداعى رەفەرەندۋمنىڭ تاريحي ماڭىزىن جانە ۇسىنىلىپ وتىرعان جاڭا كونستيتۋتسيا جوباسىنىڭ نەگىزگى باعىتتارىن تۇسىندىردىك. تۇرعىندار تاراپىنان قويىلعان ساۋالدارعا ناقتى جاۋاپ بەرىلىپ, اشىق پىكىر الماسۋ ۇيىمداستىرىلدى», دەدى ول.
ناۋقانعا كواليتسيا قۇرامىنا ەنگەن رەسپۋبليكالىق جاستار بىرلەستىكتەرى دە بەلسەندى اتسالىسۋدا. اتاپ ايتقاندا, «جاستار رۋحى» جاستار قاناتى, «Esbol Qory», «اسسامبلەيا جاستارى» رەسپۋبليكالىق جاستار ۇيىمى, «جاسىل ەل» رەسپۋبليكالىق جاستار ەڭبەك جاساعى جانە «اۋىل جاستارى» قاناتىنىڭ جەتەكشىلەرى باستاعان توپ كوكشەتاۋ قالاسىندا اقپاراتتىق-ءتۇسىندىرۋ شارالارىن وتكىزدى.
سونداي-اق, اكتسيا اياسىندا باستاۋ العان «ەسىكتەن ەسىككە» باستاماسى ارقىلى تۇرعىندارمەن جەكە كەزدەسۋلەر ۇيىمداستىرىلىپ, ءار ازاماتقا رەفەرەندۋم توڭىرەگىندەگى وزگەرىستەر كەڭىنەن باياندالۋدا. قوسىمشا اقپاراتتىق پاراقشالار تاراتىلىپ, ۇسىنىستار مەن پىكىرلەر نازارعا الىنۋدا.
جامبىل وبلىسى تالاس اۋدانى كوكتال اۋىلىنىڭ تۇرعىنى ءبيبىجان تاسپانقىزى ناۋقان جونىندە ويىن ورتاعا سالدى.
«جاستاردىڭ اۋىلىمىزعا ارنايى كەلىپ, ءار باعىتتى قاراپايىم تىلمەن ءتۇسىندىرىپ بەرگەنى قۋانتادى. كوپشىلىكتىڭ كوكەيىندە جۇرگەن سۇراقتارعا جاۋاپ الدىق. وسىنداي اشىق كەزدەسۋلەر حالىقتىڭ سانالى شەشىم قابىلداۋىنا كومەكتەسەدى دەپ ويلايمىن», دەدى ول.
قازىرگى تاڭدا كواليتسيا مۇشەلەرى ايماقتارداعى ءتۇسىندىرۋ كەزدەسۋلەرىن ودان ءارى جالعاستىرۋدا. رەفەرەندۋم قارساڭىندا ەڭبەك ۇجىمدارىمەن, ساراپشىلار قاۋىمىمەن جانە جەرگىلىكتى تۇرعىندارمەن جۇزدەسۋلەر وتكىزۋ ارقىلى اشىق ديالوگ الاڭدارىن كەڭەيتۋ جوسپارلانعان. باستى ماقسات – ءار ازاماتتىڭ جان-جاقتى اقپارات الىپ, ەل بولاشاعىنا قاتىستى شەشىمدى جاۋاپكەرشىلىكپەن قابىلداۋىنا مۇمكىندىك جاساۋ.
