اقمولا وبلىسىندا ەكى مەديتسينا قىزمەتكەرى پارامەن ۇستالدى

كوكشەتاۋ. 13 مامىر. اقمولا وبلىسىندا دەنساۋلىق ساقتاۋ سالاسىندا قىزمەت اتقاراتىن ەكى مەملەكەتتىك قىزمەتكەر پارا الدى دەگەن كۇدىكپەن قولعا ءتۇستى. بۇل تۋرالى قالالىق پروكۋراتۋرانىڭ دەرەگىنە سۇيەنگەن egemen.kz ءتىلشىسى حابارلادى. كوكشەتاۋ قالالىق پروكۋراتۋراسىنىڭ ءبولىم باستىعى ءاليا سۇلەيمەنوۆانىڭ ايتۋىنا قاراعاندا, ولار تەندەردە ۇتىسقا جەتكىزۋ ءۇشىن وبلىس ورتالىعىنداعى ءبىر سەرىكتەستىكتەن 600 مىڭ تەڭگە اقشا تالاپ ەتكەن. ال مۇنداي سوماداعى قارجىعا ءشوپتىڭ باسىن سىندىرماي-اق ءبىر ساتتە قارىق بولىپ قالعىسى كەلگەندەر وبلىستىق دەنساۋلىق ساقتاۋ باسقارماسى باستىعىنىڭ ورىنباسارى مەن مەملەكەتتىك ساتىپ الۋ ءبولىمىنىڭ باسشىسى بولىپ شىقتى. «اتالعان لاۋازىمدى تۇلعالار پارانى مەملەكەتتىك ساتىپ الۋدا تەندەردى جەڭىپ الۋ ءۇشىن كومەكتەسەمىز دەپ العان. ونىڭ كولەمىن كەلىسىمشارتتا كورسەتىلگەن سومانىڭ 10 پايىزى دەپ كەلىسىپتى. كۇدىكتىلەر بۇل ارەكەتتەرىن الدىن الا ويلاستىرىپ, جوسپارلاپ جاساعان. ەكى جاق ءبىر-بىرىمەن تەلەفون ارقىلى حابارلاسىپ وتىرعان. قازىرگى تاڭدا اتالعان دەرەك بويىنشا قىلمىستىق ءىس قوزعالدى», - دەدى پروكۋراتۋرا وكىلى. باقبەرگەن امالبەك. دەرەك, سۋرەت: egemen.kz.